ਤਪਾ ਮੰਡੀ, 6 ਮਈ (ਪ੍ਰਵੀਨ ਗਰਗ)-ਬੀਤੀ ਰਾਤ ਯੋਗੀ ਬਸਤੀ ਸਥਿਤ ਪੀਰਾਂ ਦੀ ਜਗਾ 'ਚ ਅੱਗ ਲੱਗਣ ਨਾਲ ਹਜ਼ਾਰਾਂ ਰੁਪਏ ਦਾ ਨੁਕਸਾਨ ਹੋ ਜਾਣ ਦਾ ਸਮਾਚਾਰ ਹੈ ਜਦਕਿ ਜਾਨੀ ਨੁਕਸਾਨ ਤੋਂ ਬਚਾ ਰਿਹਾ | ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਯੋਗੀ ਪਾਗਲਾ ਨਾਥ ਨੇ ਦੱਸਿਆ ਕਿ ਉਸ ਨੇ ਆਪਣੇ ਘਰ ਵਿਚ ਪੀਰਾਂ ਦੀ ਜਗ੍ਹਾ ਬਣਾਈ ਹੋਈ ਹੈ, ਜਿਸ ਦੀ ਉਹ ਪਿਛਲੇ 30 ਸਾਲਾਂ ਤੋਂ ਸੇਵਾ ਕਰਦਾ ਆ ਰਿਹਾ ਹੈ | ਬੀਤੀ ਰਾਤ ਉਹ ਆਪਣੇ ਘਰ ਅੰਦਰ ਸੁੱਤੇ ਪਏ ਸਨ ਕਿ ਅਚਾਨਕ ਪੀਰਾਂ ਦੀ ਜਗ੍ਹਾ ਵਾਲੀ ਥਾਂ 'ਤੇ ਬਿਜਲੀ ਸਪਾਰਕਿੰਗ ਨਾਲ ਅੱਗ ਲੱਗ ਗਈ, ਜਿਸ ਦਾ ਪਤਾ ਲੱਗਣ 'ਤੇ ਉਨ੍ਹਾਂ ਤੁਰੰਤ ਸ਼ੋਰ ਮਚਾ ਦਿੱਤਾ ਦਾ ਰੌਲਾ ਸੁਣ ਕੇ ਗੁਆਂਢ 'ਚ ਰਹਿੰਦੇ ਯੋਗੀ ਨਾਥ ਇਕੱਠੇ ਹੋ ਗਏ, ਜਿਨ੍ਹਾਂ ਪਾਣੀ ਦੀ ਬਾਲਟੀਆਂ ਨਾਲ ਅੱਗ 'ਤੇ ਕਾਬੂ ਪਾਇਆ | ਇਸ ਅੱਗ ਦੀ ਲਪੇਟ 'ਚ ਦੋ ਨੌਬਤਾਂ, ਹਜ਼ਾਰਾਂ ਰੁਪਏ ਦੀ ਨਗਦੀ ਜੋ ਉਸ ਨੇ ਵਿਆਜ 'ਤੇ ਲਿਆ ਕੇ ਆਪਣਾ ਘਰ ਬਣਾਉਣ ਲਈ ਉਕਤ ਜਗ੍ਹਾ 'ਤੇ ਰੱਖੀ ਹੋਈ ਸੀ, ਫ਼ੋਟੋਆਂ, ਗੱਲੇ ਅਤੇ ਹੋਰ ਸਮਾਨ ਸੜ ਕੇ ਸੁਆਹ ਹੋ ਗਿਆ | ਉਨ੍ਹਾਂ ਸੂਬਾ ਸਰਕਾਰ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਤੋਂ ਮੰਗ ਕਰਦਿਆਂ ਕਿਹਾ ਕਿ ਅੱਗ ਦੀ ਘਟਨਾ ਨਾਲ ਹੋਏ ਨੁਕਸਾਨ ਦਾ ਬਣਦਾ ਢੁਕਵਾਂ ਮੁਆਵਜ਼ਾ ਦਿੱਤਾ ਜਾਵੇ | ਇਸ ਮੌਕੇ ਜਗਰਾਜ ਨਾਥ, ਸਲੀਮ ਨਾਥ, ਮੰਦਰ ਨਾਥ, ਕੇਵਲ ਨਾਥ, ਸੋਨੀ ਆਦਿ ਮੌਜੂਦ ਸਨ |