ਜ਼ਿਲ੍ਹਾ ਸੰਗਰੂਰ 'ਚ ਵੱਡੀ ਗਿਣਤੀ ਕਿਸਾਨ ਖ਼ਰਬੂਜ਼ੇ ਦੀ ਕਾਸ਼ਤ ਕਰਨ ਲੱਗੇ
ਅਜੀਤ ਡੈਸਕ
27-05-2026
ਖ਼ਰਬੂਜ਼ੇ ਦਾ ਬੀਜ ਵੇਚ ਕੇ 3 ਲੱਖ ਰੁਪਏ ਪ੍ਰਤੀ ਏਕੜ ਕੀਤੀ ਜਾ ਸਕਦੀ ਹੈ ਕਮਾਈ- ਉੱਦਮੀ ਕਿਸਾਨ ਬਲਵਿੰਦਰ ਸਿੰਘ
ਧੂਰੀ ਲਾਗਲੇ ਪਿੰਡ ਭੜੀ ਮਾਨਸਾ ਦੇ ਕਿਸਾਨ ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਉਹ ਚਾਰ ਪੰਜ ਸਾਲਾਂ ਤੋਂ ਖ਼ਰਬੂਜ਼ੇ ਦੀ ਕਾਸ਼ਤ ਕਰ ਰਿਹਾ ਹੈ ਪਰ ਇਸ ਵਾਰ ਉਹ ਖ਼ਰਬੂਜ਼ਾ ਨਹੀਂ ਵੇਚ ਰਿਹਾ, ਬਲਕਿ ਬੀਜ ਤਿਆਰ ਕਰਕੇ ਖ਼ਰਬੂਜ਼ਾ ਕਾਸ਼ਤਕਾਰਾਂ ਨੂੰ ਬੀਜ ਵੇਚੇਗਾ | ਖ਼ਰਬੂਜ਼ਾ ਤਾਂ ਉਹ ਲੋਕਾਂ ਨੂੰ ਮੁਫ਼ਤ 'ਚ ਹੀ ਖਵਾ ਰਿਹਾ ਹੈ | ਉੱਦਮੀ ਕਿਸਾਨ ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਇਸ ਵਾਰ ਉਸ ਨੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਨਾਲ ਸਮਝੌਤਾ ਕਰ ਕੇ ਡੇਢ ਏਕੜ 'ਚ ਯੂਨੀਵਰਸਿਟੀ ਦੀ ਖ਼ਰਬੂਜ਼ੇ ਦੀ ਕਿਸਮ 'ਪੰਜਾਬ ਅੰਮਿ੍ਤ' ਦੀ ਡੇਢ ਏਕੜ 'ਚ ਕਾਸ਼ਤ ਕੀਤੀ ਹੈ ਜਿਵੇਂ ਕਿ ਯੂਨੀਵਰਸਿਟੀ ਦੇ ਖੇਤੀ ਵਿਗਿਆਨੀਆਂ ਨੇ ਦੱਸਿਆ ਹੈ ਕਿ ਇਸ ਡੇਢ ਏਕੜ ਦੇ ਰਕਬੇ 'ਚ 50 ਕਿੱਲੋ ਬੀਜ ਤਿਆਰ ਹੋਵੇਗਾ | ਬੀਜ ਦੀਆਂ ਥੈਲੀਆਂ ਤੇ ਉਹ ਬਾਕਾਇਦਾ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਨਾਲ ਹੋਏ ਸਮਝੌਤੇ ਬਾਰੇ ਅਤੇ ਖ਼ਰਬੂਜ਼ੇ ਦੀ ਕਿਸਮ ਪੰਜਾਬ ਅੰਮਿ੍ਤ ਬਾਰੇ ਲਿਖੇਗਾ | ਇਹ ਬੀਜ ਮਾਰਕੀਟ ਵਿੱਚ ਘੱਟੋ ਘੱਟ 10 ਹਜ਼ਾਰ ਰੁਪਏ ਪ੍ਰਤੀ ਕਿੱਲੋ ਵਿਕੇਗਾ, ਜਿਵੇਂ ਕਿ ਪ੍ਰਾਈਵੇਟ ਕੰਪਨੀਆਂ ਖ਼ਰਬੂਜ਼ੇ ਦੇ ਬੀਜ ਨੂੰ 80-85 ਹਜ਼ਾਰ ਰੁਪਏ ਕਿੱਲੋ ਤੱਕ ਵੇਚ ਰਹੀਆਂ ਹਨ, ਉਸ ਮੁਤਾਬਕ ਪੈਦਾ ਹੋਣ ਵਾਲੇ ਬੀਜ ਦਾ ਜ਼ਿਆਦਾ ਮੁੱਲ ਵੀ ਮਿਲ ਸਕਦਾ ਹੈ | ਹੋਰ ਜਾਣਕਾਰੀ ਦਿੰਦਿਆਂ ਇਸ ਕਿਸਾਨ ਨੇ ਦੱਸਿਆ ਕਿ ਇੱਕ ਏਕੜ ਵਿੱਚ ਕਾਸ਼ਤ ਕਰਨ ਲਈ 150 ਗ੍ਰਾਮ ਬੀਜ ਦੀ ਜ਼ਰੂਰਤ ਹੁੰਦੀ ਹੈ | ਕੁੱਲ ਖਰਚਾ 50 ਹਜ਼ਾਰ ਰੁਪਏ ਪ੍ਰਤੀ ਏਕੜ ਆ ਜਾਂਦਾ ਹੈ | ਇਸ ਕਿਸਾਨ ਨੇ ਹੋਰ ਦੱਸਿਆ ਕਿ ਜੇਕਰ ਖ਼ਰਬੂਜ਼ੇ ਨੂੰ ਵੇਚਿਆ ਜਾਵੇ ਤਾਂ ਇੱਕ ਏਕੜ 'ਚ 100 ਕੁਇੰਟਲ ਤੱਕ ਖ਼ਰਬੂਜ਼ਾ ਪੈਦਾ ਹੁੰਦਾ ਹੈ, ਜਿਸ ਦਾ ਮਾਰਕੀਟ ਵਿੱਚ 25 ਰੁਪਏ ਕਿੱਲੋ ਤੱਕ ਦਾ ਰੇਟ ਮਿਲ ਜਾਂਦਾ ਹੈ | ਦੋਵੇਂ ਪਾਸੇ ਚੋਖਾ ਮੁਨਾਫ਼ਾ ਮਿਲਦਾ ਹੈ | ਬਾਕੀ ਮੌਸਮ ਅਤੇ ਮੰਡੀ ਦੀ ਮੰਗ 'ਤੇ ਵੀ ਨਿਰਭਰ ਕਰਦਾ ਹੈ |
ਕਿਸਾਨਾਂ ਨੂੰ ਖੇਤੀ ਵਿਭਿੰਨਤਾ ਵੱਲ ਆਉਣਾ ਚਾਹੀਦਾ ਹੈ - ਡਾ. ਮਾਨ
ਜ਼ਿਲ੍ਹਾ ਸੰਗਰੂਰ 'ਚ ਲੱਗਦੀਆਂ ਹਫ਼ਤਾਵਾਰੀ ਪਹਿਲ ਮੰਡੀਆਂ ਦੀ ਅਗਵਾਈ ਕਰ ਰਹੇ ਡਾ. ਅਮਰਜੀਤ ਸਿੰਘ ਮਾਨ ਨੇ ਕਿਸਾਨਾਂ ਨੂੰ ਖੇਤੀ ਵਿਭਿੰਨਤਾ ਵੱਲ ਆਉਣ ਦਾ ਸੱਦਾ ਦਿੰਦਿਆਂ ਕਿਹਾ ਕਿ ਕਿਸਾਨਾਂ ਨੂੰ ਝੋਨਾ ਤੇ ਕਣਕ ਹੇਠ ਰਕਬਾ ਘਟਾ ਕੇ ਸਬਜ਼ੀਆਂ, ਦਾਲਾਂ ਅਤੇ ਹਲਦੀ ਆਦਿ ਦੀ ਕਾਸ਼ਤ ਵੱਲ ਆਉਣਾ ਚਾਹੀਦਾ ਹੈ | ਘਰ ਦੀ ਜ਼ਰੂਰਤ ਲਈ ਰਸਾਇਣਿਕ ਮੁਕਤ ਸਬਜ਼ੀਆਂ ਪੈਦਾ ਕਰ ਕੇ ਬਾਜ਼ਾਰ 'ਤੇ ਨਿਰਭਰਤਾ ਘਟਾਉਣੀ ਚਾਹੀਦੀ ਹੈ | ਇਹ ਜਿੱਥੇ ਆਮਦਨ ਪੱਖੋਂ ਲਾਹੇਵੰਦ ਹੋਵੇਗਾ, ਉੱਥੇ ਧਰਤੀ ਦੀ ਉਪਜਾਊ ਸ਼ਕਤੀ ਨੂੰ ਬਚਾਉਣ ਦੇ ਨਾਲ ਨਾਲ ਵਾਤਾਵਰਨ ਦੀ ਸੰਭਾਲ ਕਰਨ 'ਚ ਵੀ ਸਹਾਈ ਹੋਵੇਗਾ |
