ਗਲਾਸਗੋ, 2 ਅਗਸਤ (ਏਜੰਸੀ)-ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ’ਚ ਭਾਰਤੀ ਮੁੱਕੇਬਾਜ਼ ਲਵਲੀਨਾ ਬੋਰਗੋਹੇਨ ਸਮੇਤ ਸਾਰੇ ਮੁੱਕੇਬਾਜ਼ਾਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਲਵਲੀਨਾ ਨੇ ਔਰਤਾਂ ਦੇ 75 ਕਿਲੋਗ੍ਰਾਮ ਵਰਗ ’ਚ ਆਪਣਾ ਪਹਿਲਾ ਚਾਂਦੀ ਦਾ ਤਗਮਾ ਜਿੱਤਿਆ, ਜਿਸ ਨਾਲ ਦੇਸ਼ ਨੂੰ ਮਾਣ ਮਿਲਿਆ। ਆਪਣੇ ਖੇਡ ਪ੍ਰਦਰਸ਼ਨ ਤੋਂ ਇਲਾਵਾ, ਉਸਨੇ ਇਕ ਹੋਰ ਕਾਰਨ ਕਰਕੇ ਵੀ ਸੁਰਖੀਆਂ ਬਟੋਰੀਆਂ ਹਨ। ਗਲਾਸਗੋ ’ਚ ਇਕ ਪ੍ਰਸਿੱਧ ਭਾਰਤੀ ਰੈਸਟੋਰੈਂਟ ‘ਮਿਸਟਰ ਸਿੰਘਜ਼ ਇੰਡੀਆ - ਦ ਹੋਮ ਆਫ ਕਰੀ’ ਵਲੋਂ 2026 ਦੀਆਂ ਰਾਸ਼ਟਰਮੰਡਲ ਖੇਡਾਂ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਵਾਲੇ ਭਾਰਤੀ ਐਥਲੀਟਾਂ ਨੂੰ ਉੱਥੇ ਰਾਤ ਦੇ ਖਾਣੇ ਲਈ ਸੱਦਾ ਦਿੱਤਾ ਗਿਆ ਸੀ। ਰੈਸਟੋਰੈਂਟ ’ਚ ਐਥਲੀਟਾਂ ਨੂੰ ਦਿੱਤੇ ਗਏ ਨੈਪਕਿਨਾਂ ’ਚ ਭਾਰਤ ਦਾ ਇਕ ਅਧੂਰਾ ਨਕਸ਼ਾ ਸੀ, ਜਿਸ ’ਚ ਉੱਤਰ-ਪੂਰਬੀ ਰਾਜ ਪੂਰੀ ਤਰ੍ਹਾਂ ਗਾਇਬ ਸਨ। ਇਸ ਗਲਤੀ ਨੂੰ ਦੇਖਦੇ ਹੋਏ, ਭਾਰਤ ਦੀ ਸਟਾਰ ਮਹਿਲਾ ਮੁੱਕੇਬਾਜ਼, ਲਵਲੀਨਾ ਬੋਰਗੋਹੇਨ ਨੇ ਤੁਰੰਤ ਸਖ਼ਤ ਇਤਰਾਜ਼ ਜਤਾਇਆ। ਨੇੜਿਓਂ ਦੇਖਣ ’ਤੇ ਪਤਾ ਲੱਗਾ ਕਿ ਨਾ ਸਿਰਫ਼ ਨੈਪਕਿਨ, ਸਗੋਂ ਰੈਸਟੋਰੈਂਟ ਦੀ ਕੰਧ ’ਤੇ ਪ੍ਰਦਰਸ਼ਿਤ ਇੱਕ ਵੱਡੇ ਨਕਸ਼ੇ ਵਿੱਚ ਉੱਤਰ-ਪੂਰਬੀ ਖੇਤਰ ਅਤੇ ਜੰਮੂ-ਕਸ਼ਮੀਰ ਦੇ ਕੁਝ ਹਿੱਸੇ ਵੀ ਗਾਇਬ ਸਨ। ਲਵਲੀਨਾ ਨੇ ਰੈਸਟੋਰੈਂਟ ’ਤੇ ਉੱਤਰ-ਪੂਰਬ ਨੂੰ ਨਕਸ਼ੇ ਤੋਂ ਬਾਹਰ ਕਰਕੇ ਭਾਰਤ ਨੂੰ ਗਲਤ ਢੰਗ ਨਾਲ ਪੇਸ਼ ਕਰਨ ਦਾ ਦੋਸ਼ ਲਗਾਇਆ। ਬਾਕਸਿੰਗ ਫੈਡਰੇਸ਼ਨ ਆਫ ਇੰਡੀਆ (ਬੀ.ਐਫ.ਆਈ.) ਦੇ ਪ੍ਰਧਾਨ ਅਜੈ ਸਿੰਘ ਨੇ ਸਟਾਰ ਮੁੱਕੇਬਾਜ਼ ਦਾ ਸਮਰਥਨ ਕੀਤਾ। ਉਨ੍ਹਾਂ ਨੇ ਰੈਸਟੋਰੈਂਟ ਪ੍ਰਬੰਧਨ ਨੂੰ ਅਪੀਲ ਕੀਤੀ ਕਿ ਉਹ ਤੁਰੰਤ ਨੈਪਕਿਨ ਵਾਪਸ ਲੈਣ ਤੇ ਭਾਰਤ ਦੀ ਪੂਰੀ ਖੇਤਰੀ ਅਖੰਡਤਾ ਨੂੰ ਸਹੀ ਢੰਗ ਨਾਲ ਦਰਸਾਉਣ ਲਈ ਨਕਸ਼ੇ ਨੂੰ ਠੀਕ ਕਰਨ। ਗਲਾਸਗੋ ਦੇ ਰੈਸਟੋਰੈਂਟ ਨੇ ਵੀ ਭਾਰਤੀ ਦਲ ਨੂੰ ਭਰੋਸਾ ਦਿੱਤਾ ਹੈ ਕਿ ਉਹ ਆਪਣੇ ਅਹਾਤੇ ’ਚ ਪ੍ਰਦਰਸ਼ਿਤ ਭਾਰਤ ਦੇ ਨਕਸ਼ੇ ਨੂੰ ਠੀਕ ਕਰੇਗਾ।
