ਗਰਮੀਆਂ ਦਾ ਮੌਸਮ ਆਪਣੇ ਨਾਲ ਤੇਜ਼ ਧੁੱਪ, ਉੱਚ ਤਾਪਮਾਨ ਅਤੇ ਨਮੀ ਲੈ ਕੇ ਆਉਂਦਾ ਹੈ | ਅਜਿਹੇ ਸਮੇਂ ਵਿਚ ਕੰਮਕਾਜੀ ਔਰਤਾਂ ਲਈ ਸਹੀ ਪਹਿਰਾਵੇ ਦੀ ਚੋਣ ਸਿਰਫ਼ ਫੈਸ਼ਨ ਦਾ ਹਿੱਸਾ ਨਹੀਂ, ਸਗੋਂ ਉਨ੍ਹਾਂ ਦੀ ਸਿਹਤ, ਆਰਾਮ ਅਤੇ ਪੇਸ਼ੇਵਰ ਸ਼ਖ਼ਸੀਅਤ ਲਈ ਬੇਹੱਦ ਮਹੱਤਵਪੂਰਨ ਹੈ |
ਸਹੀ ਕੱਪੜੇ ਅਤੇ ਰੰਗਾਂ ਦੀ ਚੋਣ
ਗਰਮੀ ਦੇ ਮੌਸਮ ਵਿਚ ਕੱਪੜੇ ਦੇ ਸਟੱਫ਼ (ਫੈਬਰਿਕ) ਦੀ ਚੋਣ ਸਭ ਤੋਂ ਅਹਿਮ ਹੁੰਦੀ ਹੈ | ਇਸ ਮੌਸਮ ਵਿਚ ਸੂਤੀ , ਲਿਨਨ, ਖਾਦੀ ਅਤੇ ਹਲਕੇ ਰੇਅਨ ਵਰਗੇ ਕੱਪੜੇ ਸਭ ਤੋਂ ਵਧੀਆ ਮੰਨੇ ਜਾਂਦੇ ਹਨ ਕਿਉਂਕਿ ਇਹ ਹਵਾਦਾਰ ਹੁੰਦੇ ਹਨ ਅਤੇ ਪਸੀਨੇ ਨੂੰ ਜਲਦੀ ਸੋਖ ਲੈਂਦੇ ਹਨ | ਇਸ ਦੇ ਉਲਟ ਨਾਈਲੋਨ, ਪੋਲਿਸਟਰ ਜਾਂ ਬਹੁਤ ਜ਼ਿਆਦਾ ਸਿੰਥੈਟਿਕ ਕੱਪੜਿਆਂ ਤੋਂ ਪ੍ਰਹੇਜ਼ ਕਰਨਾ ਚਾਹੀਦਾ ਹੈ ਕਿਉਂਕਿ ਇਹ ਸਰੀਰ ਵਿਚ ਗਰਮੀ ਨੂੰ ਕੈਦ ਕਰਦੇ ਹਨ, ਜਿਸ ਨਾਲ ਚਮੜੀ ਦੀਆਂ ਐਲਰਜੀਆਂ ਹੋ ਸਕਦੀਆਂ ਹਨ |
ਰੰਗਾਂ ਦੇ ਮਾਮਲੇ ਵਿਚ ਹਲਕੇ ਅਤੇ ਸ਼ਾਂਤਮਈ ਰੰਗ ਜਿਵੇਂ ਕਿ ਚਿੱਟਾ, ਕਰੀਮ, ਹਲਕਾ ਨੀਲਾ, ਗੁਲਾਬੀ, ਆਸਮਾਨੀ, ਹਲਕਾ ਹਰਾ ਅਤੇ ਲੈਵੇਂਡਰ ਬਿਹਤਰ ਵਿਕਲਪ ਹਨ | ਇਹ ਰੰਗ ਸੂਰਜ ਦੀ ਗਰਮੀ ਨੂੰ ਘੱਟ ਸੋਖਦੇ ਹਨ, ਅੱਖਾਂ ਨੂੰ ਠੰਢਕ ਦਿੰਦੇ ਹਨ ਅਤੇ ਦਫ਼ਤਰ ਵਿਚ ਇਕ ਬਹੁਤ ਹੀ ਸੰਜੀਦਾ ਤੇ ਪੇਸ਼ੇਵਰ ਦਿੱਖ ਪ੍ਰਦਾਨ ਕਰਦੇ ਹਨ |
ਆਰਾਮਦਾਇਕ ਡਿਜ਼ਾਈਨ ਅਤੇ ਸਟਾਈਲਿੰਗ
ਦਫ਼ਤਰ ਵਿਚ ਲੰਬੇ ਸਮੇਂ ਤੱਕ ਸੁਖਾਲੇ ਹੋ ਕੇ ਕੰਮ ਕਰਨ ਲਈ ਕੱਪੜਿਆਂ ਦੀ ਫਿਟਿੰਗ ਦਾ ਆਰਾਮਦਾਇਕ ਹੋਣਾ ਬਹੁਤ ਜ਼ਰੂਰੀ ਹੈ | ਬਹੁਤ ਜ਼ਿਆਦਾ ਤੰਗ ਕੱਪੜੇ ਪਾਉਣ ਤੋਂ ਬਚਣਾ ਚਾਹੀਦਾ ਹੈ ਕਿਉਂਕਿ ਇਹ ਹਵਾ ਦੇ ਆਵਾਜਾਈ ਨੂੰ ਰੋਕਦੇ ਹਨ | ਗਰਮੀਆਂ ਲਈ ਹਲਕੇ ਢਿੱਲੇ-ਢਾਲੇ ਸੂਤੀ ਸੂਟ, ਸਿੱਧੇ ਕੱਟ ਵਾਲੇ ਕੁਰਤੇ, ਕਾਟਨ ਪਲਾਜ਼ੋ ਜਾਂ ਆਰਾਮਦਾਇਕ ਟਰਾਊਜ਼ਰ ਸਭ ਤੋਂ ਉੱਤਮ ਹਨ | ਜਿੱਥੇ ਵੈਸਟਰਨ ਫਾਰਮਲਸ ਪਹਿਨਣ ਦੀ ਸਹੂਲਤ ਹੋਵੇ, ਉੱਥੇ ਕਾਟਨ ਸ਼ਰਟਾਂ ਅਤੇ ਹਲਕੇ ਫਾਰਮਲ ਟਰਾਊਜ਼ਰ ਪਹਿਨੇ ਜਾ ਸਕਦੇ ਹਨ | ਇਸ ਦੇ ਨਾਲ ਹੀ ਬਾਹਰ ਆਉਣ-ਜਾਣ ਸਮੇਂ ਇਕ ਹਲਕਾ ਸੂਤੀ ਦੁਪੱਟਾ ਜਾਂ ਸਟੋਲ ਸਿਰਫ਼ ਪਹਿਰਾਵੇ ਦੀ ਸੁੰਦਰਤਾ ਹੀ ਨਹੀਂ ਵਧਾਉਂਦਾ, ਸਗੋਂ ਚਿਹਰੇ ਅਤੇ ਗਰਦਨ ਨੂੰ ਤੇਜ਼ ਧੁੱਪ ਤੇ ਧੂੜ-ਮਿੱਟੀ ਤੋਂ ਵੀ ਬਚਾਉਂਦਾ ਹੈ |
-ਮੌੜਮੰਡੀ (ਬਠਿੰਡਾ )
ਮੋਬਾਈਲ : 98763-49858
