ਤੁਸੀਂ ਉਹ ਕਹਾਣੀ ਪੜ੍ਹੀ ਹੋਵੇਗੀ ਜਿਸ ਵਿਚ ਇਕ ਚੋਰ ਨੂੰ ਜਦੋਂ ਚੋਰੀ ਦੀ ਸਜ਼ਾ ਸੁਣਾਈ ਜਾਂਦੀ ਹੈ ਤਾਂ ਉਹ ਜੱਜ ਸਾਹਿਬ ਨੂੰ ਕਹਿੰਦਾ ਹੈ ਕਿ ਅਪਰਾਧ ਤਾਂ ਉਸ ਨੇ ਹੀ ਕੀਤਾ ਹੈ, ਪਰ ਇਸ ਦੇ ਅਸਲ ਅਪਰਾਧੀ ਉਸ ਦੇ ਪਿਤਾ ਹਨ ਕਿਉਂਕਿ ਬਚਪਨ ਵਿਚ ਜਦੋਂ ਉਹ ਇਸ ਤਰ੍ਹਾਂ ਦੇ ਛੋਟੇ-ਛੋਟੇ ਅਪਰਾਧ ਕਰਦਾ ਸੀ ਤਾਂ ਪਿਤਾ ਨੇ ਉਸ ਨੂੰ ਇਹ ਕਰਨ ਤੋਂ ਰੋਕਿਆ ਨਹੀਂ ਅਤੇ ਹੌਲੀ-ਹੌਲੀ ਚੋਰੀ ਉਸ ਦੀ ਆਦਤ ਬਣ ਗਈ |
ਦਰਅਸਲ ਬੱਚਿਆਂ ਨੂੰ ਮਹਿੰਗਾ ਵਾਹਨ ਜਾਂ ਮੋਬਾਈਲ ਦਾ ਤੋਹਫ਼ਾ ਦੇਣਾ ਤੁਹਾਡਾ ਪਿਆਰ ਨਹੀਂ ਹੈ | ਸਮੇਂ ਤੋਂ ਪਹਿਲਾਂ ਇਸ ਤਰ੍ਹਾਂ ਦੇ ਤੋਹਫ਼ੇ ਮਿਲਣ 'ਤੇ ਬੱਚਿਆਂ ਨੂੰ ਮਿਹਨਤ ਨਾਲ ਕਮਾਏ ਧਨ ਦੇ ਮਹੱਤਵ ਬਾਰੇ ਪਤਾ ਨਹੀਂ ਲੱਗਦਾ | ਇਸ ਦੇ ਨਾਲ ਹੀ ਤੇਜ਼ ਰਫ਼ਤਾਰ ਮੋਟਰਸਾਈਕਲ ਵਰਗੇ ਵਾਹਨਾਂ ਨਾਲ ਬੱਚੇ ਬੇਵਜ੍ਹਾ ਸੜਕ 'ਤੇ ਕਰੱਤਵ ਦਿਖਾ ਕੇ ਨਾ ਸਿਰਫ਼ ਖ਼ੁਦ ਨੂੰ ਸਗੋਂ ਦੂਜਿਆਂ ਦੇ ਜੀਵਨ ਨੂੰ ਵੀ ਸੰਕਟ ਵਿਚ ਪਾਉਂਦੇ ਹਨ | ਮਹਿੰਗੀ ਮੋਟਰਸਾਈਕਲ ਅਤੇ ਮੋਬਾਈਲ ਨਾਲ ਬੱਚਿਆਂ ਵਿਚ ਮਿੱਤਰਾਂ ਵਿਚਾਲੇ ਦਿਖਾਵਾ ਕਰਨ ਦਾ ਰੁਝਾਨ ਵਧਦਾ ਹੈ | ਇਹ ਰੁਝਾਨ ਬੱਚੇ ਦੇ ਚਰਿੱਤਰ ਨਿਰਮਾਣ ਵਿਚ ਰੁਕਾਵਟ ਬਣਦਾ ਹੈ |
ਸਾਨੂੰ ਸਮਝਣ ਦੀ ਜ਼ਰੂਰਤ ਹੈ ਕਿ ਵਿਗਿਆਨਕ ਸਮਾਨ ਸਹੂਲਤਾਂ ਲਈ ਹੈ, ਲਾਡ ਦਿਖਾਉਣ ਲਈ ਨਹੀਂ | ਕਲਪਨਾ ਕਰੋ ਕਿ ਤੁਹਾਨੂੰ ਬਿਨਾਂ ਜ਼ਰੂਰਤ, ਬਿਨਾਂ ਮਿਹਨਤ ਜ਼ਿਆਦਾ ਨਵੀਆਂ ਚੀਜ਼ਾਂ ਮਿਲ ਜਾਣ ਤਾਂ ਤੁਹਾਡੀ ਕੀ ਮਨੋਦਸ਼ਾ ਹੋਵੇਗੀ? ਇਹੀ ਹਾਲ ਬੱਚਿਆਂ ਦਾ ਹੁੰਦਾ ਹੈ ਜਦੋਂ ਉਨ੍ਹਾਂ ਨੂੰ ਇਸ ਤਰ੍ਹਾਂ ਦੇ ਤੋਹਫ਼ੇ ਮਾਂ-ਬਾਪ ਤੋਂ ਲਾਡ ਵਿਚ ਮਿਲ ਜਾਂਦੇ ਹਨ |
ਬੱਚਿਆਂ ਨੂੰ ਲੋੜੀਂਦੇ ਸਾਮਾਨ ਤੋਂ ਵਾਂਝੇ ਨਾ ਰੱਖੋ ਅਤੇ ਫ਼ਜ਼ੂਲ ਦੀ ਸਹੂਲਤਾਂ ਅਤੇ ਜ਼ਰੂਰਤਾਂ ਵਿਚਾਲੇ ਇਕ ਸੰਤੁਲਨ ਰੱਖ ਕੇ ਬੱਚਿਆਂ ਦਾ ਸਹੀ ਵਿਕਾਸ ਕਰੋ | ਇਸ ਤਰ੍ਹਾਂ ਦੇ ਮਹਿੰਗੇ ਤੋਹਫ਼ੇ ਦੇਣ ਦੇ ਸਮਰੱਥ ਜੇਕਰ ਤੁਹਾਨੂੰ ਰੱਬ ਨੇ ਦਿੱਤੀ ਹੈ ਤਾਂ ਉਸ ਪੈਸੇ ਨੂੰ ਸਹੀ ਪਾਸੇ ਖ਼ਰਚ ਕਰੋ | ਬੱਚਿਆਂ ਦੀ ਸਿਹਤ ਲਈ ਉਸ ਨੂੰ ਜਿੰਮ ਭੇਜਿਆ ਜਾ ਸਕਦਾ ਹੈ, ਉਸ ਦੀ ਸਿੱਖਿਆ ਨੂੰ ਬਿਹਤਰ ਬਣਾਉਣ ਲਈ ਖਰਚ ਕੀਤਾ ਜਾ ਸਕਦਾ ਹੈ, ਉਸ ਨੂੰ ਸੰਸਕਾਰੀ ਬਣਾਉਣ ਵਾਲਾ ਸਾਹਿਤ ਤੋਹਫ਼ੇ ਵਿਚ ਦਿੱਤਾ ਜਾ ਸਕਦਾ ਹੈ, ਉਸ ਨੂੰ ਸੈਰ-ਸਪਾਟੇ ਲਈ ਭੇਜਿਆ ਜਾ ਸਕਦਾ ਹੈ, ਉਸ ਤੋਂ ਚੰਗੇ ਕੰਮਾਂ ਲਈ ਦਾਨ ਦਿਵਾਇਆ ਜਾ ਸਕਦਾ ਹੈ ਪਰ ਇਸ ਤਰ੍ਹਾਂ ਦੇ ਤੋਹਫ਼ੇ ਦੇਣ ਤੋਂ ਬਚਣਾ ਚਾਹੀਦਾ ਹੈ |
