ਭਾਰਤ-ਨਿਊਜ਼ੀਲੈਂਡ ਵਿਚਕਾਰ ਖਿਤਾਬੀ ਮੁਕਾਬਲਾ ਅੱਜ

ਅਹਿਮਦਾਬਾਦ, 7 ਮਾਰਚ (ਏਜੰਸੀਆਂ)-ਟੀ-20 ਵਿਸ਼ਵ ਕੱਪ 2026 ਹੁਣ ਆਪਣੇ ਆਖਰੀ ਪੜਾਅ 'ਤੇ ਪਹੁੰਚ ਗਿਆ ਹੈ | ਚੱਲ ਰਹੇ ਟੂਰਨਾਮੈਂਟ ਦਾ ਫਾਈਨਲ ਮੈਚ 8 ਮਾਰਚ ਨੂੰ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ 'ਚ ਭਾਰਤ ਤੇ ਨਿਊਜ਼ੀਲੈਂਡ ਵਿਚਕਾਰ ਖੇਡਿਆ ਜਾਣਾ ਹੈ | ਭਾਰਤੀ ਟੀਮ ਇਸ ਮੈਚ ਨੂੰ ਜਿੱਤ ਕੇ ਇਤਿਹਾਸ ਰਚਣ ਦੀ ਕੋਸ਼ਿਸ਼ ਕਰੇਗੀ | ਹਾਲਾਂਕਿ, ਇਸ ਮੈਚ 'ਚ ਨਿਊਜ਼ੀਲੈਂਡ ਨੂੰ ਹਰਾਉਣਾ ਭਾਰਤੀ ਟੀਮ ਲਈ ਸੌਖਾ ਨਹੀਂ ਹੋਵੇਗਾ | ਦਰਅਸਲ, ਟੀ-20 ਵਿਸ਼ਵ ਕੱਪ 'ਚ ਨਿਊਜ਼ੀਲੈਂਡ ਵਿਰੁੱਧ ਭਾਰਤੀ ਟੀਮ ਦਾ ਰਿਕਾਰਡ ਹੁਣ ਤੱਕ ਮਾੜਾ ਹੀ ਰਿਹਾ ਹੈ | ਟੀ-20 ਅੰਤਰਰਾਸ਼ਟਰੀ ਮੈਚਾਂ 'ਚ ਪਿਛਲੇ ਅੰਕੜਿਆਂ ਦੀ ਗੱਲ ਕਰੀਏ ਤਾਂ ਭਾਰਤ ਤੇ ਨਿਊਜ਼ੀਲੈਂਡ ਵਿਚਕਾਰ ਕੁੱਲ 30 ਮੈਚ ਖੇਡੇ ਗਏ ਹਨ | ਭਾਰਤੀ ਟੀਮ ਨੇ ਇਨ੍ਹਾਂ 'ਚੋਂ 18 ਜਿੱਤੇ ਹਨ, ਇਨ੍ਹਾਂ ਵਿੱਚੋਂ 2 ਜਿੱਤਾਂ ਸੁਪਰ ਓਵਰਾਂ 'ਚ ਆਈਆਂ | ਨਿਊਜ਼ੀਲੈਂਡ ਨੇ 11 ਮੈਚ ਜਿੱਤੇ ਹਨ, ਜਿਨ੍ਹਾਂ ਵਿੱਚੋਂ ਇਕ ਮੀਂਹ ਕਾਰਨ ਰੱਦ ਕਰ ਦਿੱਤਾ ਗਿਆ ਸੀ | ਭਾਰਤ ਨੇ ਘਰੇਲੂ ਧਰਤੀ 'ਤੇ ਨਿਊਜ਼ੀਲੈਂਡ ਵਿਰੁੱਧ 16 ਵਿੱਚੋਂ 11 ਮੈਚ ਜਿੱਤੇ ਹਨ | ਇੱਥੇ, ਭਾਰਤੀ ਟੀਮ ਦਾ ਹੱਥ ਉੱਪਰ ਜਾਪਦਾ ਹੈ | ਟੀ-20 ਅੰਤਰਰਾਸ਼ਟਰੀ ਮੈਚਾਂ 'ਚ ਭਾਰਤੀ ਟੀਮ ਨਿਊਜ਼ੀਲੈਂਡ 'ਤੇ ਭਾਰੂ ਹੈ, ਪਰ ਟੀ-20 ਵਿਸ਼ਵ ਕੱਪ ਵਿੱਚ ਦੋਵਾਂ ਟੀਮਾਂ ਦੇ ਆਹਮੋ-ਸਾਹਮਣੇ ਦੇ ਰਿਕਾਰਡ ਨੂੰ ਦੇਖਦੇ ਹੋਏ, ਕਹਾਣੀ ਵੱਖਰੀ ਹੈ | ਭਾਰਤ ਤੇ ਨਿਊਜ਼ੀਲੈਂਡ ਨੇ ਹੁਣ ਤੱਕ ਤਿੰਨ ਟੀ-20 ਵਿਸ਼ਵ ਕੱਪ ਮੈਚ ਖੇਡੇ ਹਨ | ਨਿਊਜ਼ੀਲੈਂਡ ਨੇ ਤਿੰਨੋਂ ਮੈਚ ਜਿੱਤੇ ਹਨ | ਨਿਊਜ਼ੀਲੈਂਡ ਨੇ 2007, 2016 ਤੇ 2021 ਟੂਰਨਾਮੈਂਟਾਂ 'ਚ ਭਾਰਤ ਨੂੰ ਹਰਾਇਆ ਸੀ | ਇਸ ਲਈ, ਭਾਰਤੀ ਟੀਮ ਹੁਣ ਇਸ ਮੈਚ ਨੂੰ ਜਿੱਤ ਕੇ ਇਸ ਰਿਕਾਰਡ ਨੂੰ ਬਦਲਣ ਦੀ ਕੋਸ਼ਿਸ਼ ਕਰੇਗੀ | ਟੀ-20 ਵਿਸ਼ਵ ਕੱਪ 2026 ਤੋਂ ਠੀਕ ਪਹਿਲਾਂ, ਨਿਊਜ਼ੀਲੈਂਡ ਦੀ ਟੀਮ ਨੇ ਇਕ ਵ੍ਹਾਈਟ-ਬਾਲ ਸੀਰੀਜ਼ ਲਈ ਭਾਰਤ ਦਾ ਦੌਰਾ ਕੀਤਾ ਸੀ | ਇਸ ਸੀਰੀਜ਼ ਦÏਰਾਨ, ਦੋਵਾਂ ਦੇਸ਼ਾਂ ਨੇ ਪੰਜ ਟੀ-20 ਮੈਚ ਖੇਡੇ ਤੇ ਭਾਰਤੀ ਟੀਮ ਨੇ 4-1 ਨਾਲ ਜਿੱਤ ਪ੍ਰਾਪਤ ਕੀਤੀ | ਕੀਵੀਆਂ ਨੂੰ ਭਾਰਤ ਵਿੱਚ ਖੇਡਣ ਦਾ ਕਾਫ਼ੀ ਤਜਰਬਾ ਹੈ ਤੇ ਉਹ ਇਸ ਫਾਈਨਲ 'ਚ ਭਾਰਤੀ ਟੀਮ ਲਈ ਇਕ ਸਖ਼ਤ ਚੁਣÏਤੀ ਪੇਸ਼ ਕਰਨਗੇ | ਇਸ ਵਿਸ਼ਵ ਕੱਪ 'ਚ ਭਾਰਤ ਤੇ ਨਿਊਜ਼ੀਲੈਂਡ ਦੇ ਪ੍ਰਦਰਸ਼ਨ ਦੀ ਗੱਲ ਕਰੀਏ ਤਾਂ ਭਾਰਤੀ ਟੀਮ ਇਸ ਟੂਰਨਾਮੈਂਟ 'ਚ ਹੁਣ ਤੱਕ ਸਿਰਫ਼ ਇਕ ਮੈਚ ਹਾਰੀ ਹੈ | ਜਦੋਂ ਕਿ ਨਿਊਜ਼ੀਲੈਂਡ ਨੂੰ ਇਸ ਵਿਸ਼ਵ ਕੱਪ 'ਚ ਦੱਖਣੀ ਅਫਰੀਕਾ ਤੇ ਇੰਗਲੈਂਡ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ |