ਲੰਡਨ, 12 ਮਈ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਲੇਬਰ ਪਾਰਟੀ 'ਚ ਚੱਲ ਰਹੇ ਤਣਾਅ 'ਤੇ ਇਕ ਬਿਆਨ ਜਾਰੀ ਕਰਦੇ ਹੋਏ ਸਿੱਖ ਫੈਡਰੇਸ਼ਨ ਯੂ.ਕੇ. ਨੇ ਕਿਹਾ ਕਿ ਲੇਬਰ ਦੇ ਨਤੀਜੇ ਹੋਰ ਵੀ ਮਾੜੇ ਹੋ ਸਕਦੇ ਸਨ ਜੇਕਰ ਸਿੱਖ ਭਾਈਚਾਰੇ ਨੇ ਰੈੱਡਬਿ੍ਜ, ਈਲਿੰਗ ਤੇ ਵੁਲਵਰਹੈਂਪਟਨ ਵਰਗੀਆਂ ਥਾਵਾਂ 'ਤੇ ਪਾਰਟੀ ਦਾ ਸਮਰਥਨ ਨਾ ਕਰਨ ਦਾ ਫੈਸਲਾ ਕੀਤਾ ਹੁੰਦਾ | ਸੈਂਡਵੈੱਲ, ਸਲੋਹ, ਹੰਸਲੋ, ਕਵੈਂਟਰੀ ਤੇ ਵਾਲਸਾਲ ਵਿਖੇ ਸਿੱਖ ਭਾਈਚਾਰੇ 'ਚ ਨਿਰਾਸ਼ਾ ਵੇਖੀ ਗਈ ਹੈ | ਖੁਸ਼ਕਿਸਮਤੀ ਨਾਲ ਡਰਬੀ, ਲੈਸਟਰ ਅਤੇ ਗ੍ਰੇਵਸ਼ੈਮ ਵਿਖੇ ਕੋਈ ਚੋਣਾਂ ਨਹੀਂ ਹੋਈਆਂ | ਫੈਡਰੇਸ਼ਨ ਨੇ ਕਿਹਾ ਕਿ ਤਿੰਨ ਮਹੀਨੇ ਪਹਿਲਾਂ ਕੀਰ ਸਟਾਰਮਰ ਨੂੰ ਲੇਬਰ ਲੀਡਰਸ਼ਿਪ ਵਲੋਂ ਸਿੱਖ ਭਾਈਚਾਰੇ ਨਾਲ ਕੀਤੇ ਗਏ ਖਾਸ ਵਾਅਦੇ ਯਾਦ ਦਵਾਏ ਗਏ | ਜਿਸ ਦੇ ਜਵਾਬ 'ਚ ਸਿੱਖ ਭਾਈਚਾਰੇ ਨਾਲ ਸਰਕਾਰ ਦੇ ਸਬੰਧ ਬਿਹਤਰ ਬਣਾਉਣ ਬਾਰੇ ਤਾਂ ਕਿਹਾ ਪਰ ਉਹ ਢੁਕਵਾਂ ਜਵਾਬ ਨਹੀਂ ਸੀ | ਫੈਡਰੇਸ਼ਨ ਵੱਲੋਂ ਭਾਈ ਜਸਪਾਲ ਸਿੰਘ ਨੇ ਕਿਹਾ ਕਿ ਲੇਬਰ ਨੂੰ ਨਵੀਂ ਲੀਡਰਸ਼ਿਪ ਦੀ ਲੋੜ ਹੈ ਤੇ ਅਸੀਂ ਸਾਰੇ ਲੇਬਰ ਸੰਸਦ ਮੈਂਬਰਾਂ ਨੂੰ ਲਿਖ ਰਹੇ ਹਾਂ ਕਿ ਉਹ ਇਕ ਨਵੇਂ ਨੇਤਾ ਦੀ ਚੋਣ ਲਈ ਸਮਾਂ-ਸਾਰਣੀ ਦੇ ਸੱਦੇ ਦਾ ਸਮਰਥਨ ਕਰਨ |
