ਨਿਊਯਾਰਕ, 18 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਕੈਨੇਡਾ ’ਚ ਭੜਕ ਰਹੀਆਂ ਜੰਗਲੀ ਅੱਗਾਂ ਦਾ ਘਣਾ ਧੂੰਆ ਲਗਾਤਾਰ ਤੀਜੇ ਦਿਨ ਵੀ ਅਮਰੀਕਾ ਦੇ ਕਈ ਹਿੱਸਿਆਂ ’ਤੇ ਛਾਇਆ ਰਿਹਾ, ਜਿਸ ਨਾਲ ਮਿਡਵੈਸਟ ਤੇ ਉੱਤਰ-ਪੂਰਬੀ ਰਾਜਾਂ ’ਚ ਹਵਾ ਦੀ ਗੁਣਵੱਤਾ ਖ਼ਤਰਨਾਕ ਪੱਧਰ ਤੱਕ ਡਿੱਗ ਗਈ। ਨਿਊਯਾਰਕ ਸਮੇਤ ਕਈ ਵੱਡੇ ਸ਼ਹਿਰਾਂ ਦੀ ਅਸਮਾਨੀ ਰੇਖਾ ਧੂੰਏਂ ਨਾਲ ਢੱਕੀ ਨਜ਼ਰ ਆਈ ਤੇ ਲੋਕਾਂ ਨੂੰ ਬਾਹਰੀ ਸਰਗਰਮੀਆਂ ਘਟਾਉਣ ਦੀ ਸਲਾਹ ਦਿੱਤੀ ਗਈ। ਮੌਸਮ ਵਿਗਿਆਨੀਆਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਧੂੰਏਂ ਦਾ ਇਹ ਸੰਕਟ ਫੀਫਾ ਵਿਸ਼ਵ ਕੱਪ ਫਾਈਨਲ ’ਤੇ ਵੀ ਅਸਰ ਪਾ ਸਕਦਾ ਹੈ। ਜੇ ਹਵਾ ਦੀ ਦਿਸ਼ਾ ਤੇ ਮੌਸਮੀ ਹਾਲਾਤ ਨਾ ਬਦਲੇ ਤਾਂ ਮੈਚ ਦੇ ਸਮੇਂ ਦ੍ਰਿਸ਼ਟਤਾ, ਖਿਡਾਰੀਆਂ ਦੀ ਸਿਹਤ ਤੇ ਦਰਸ਼ਕਾਂ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਾ ਵਧ ਸਕਦੀ ਹੈ।
