ਬਾਲੋਗਨ ਲਾਲ ਕਾਰਡ ਮਾਮਲੇ ’ਚ ਇੰਫੈਂਟੀਨੋ ’ਤੇ ਕਾਰਵਾਈ ਦੀ ਸੰਭਾਵਨਾ ਘੱਟ, ਫੀਫਾ ਦੀ ਸਿਆਸੀ ਨਿਰਪੱਖਤਾ ’ਤੇ ਸਵਾਲ ਕਾਇਮ
ਅਜੀਤ ਡੈਸਕ
19-07-2026
ਮਨੁੱਖੀ ਅਧਿਕਾਰ ਸੰਸਥਾ ਫੇਅਰਸਕਵੇਅਰ ਨੇ ਆਈਓਸੀ ਕੋਲ ਇੰਫੈਂਟੀਨੋ ਖ਼ਿਲਾਫ਼ ਅਧਿਕਾਰਕ ਸ਼ਿਕਾਇਤ ਦਰਜ ਕਰਵਾਈ ਹੈ। ਸ਼ਿਕਾਇਤ ਵਿੱਚ ਦੋਸ਼ ਲਗਾਇਆ ਗਿਆ ਹੈ ਕਿ ਇੰਫੈਂਟੀਨੋ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨਾਲ ਆਪਣੇ ਸੰਪਰਕ ਦੌਰਾਨ ਸਿਆਸੀ ਨਿਰਪੱਖਤਾ ਦੇ ਨਿਯਮਾਂ ਦੀ ਉਲੰਘਣਾ ਕੀਤੀ।
ਇਹ ਵਿਵਾਦ ਉਸ ਸਮੇਂ ਸ਼ੁਰੂ ਹੋਇਆ ਜਦੋਂ ਬਾਲੋਗਨ ਨੂੰ ਬੋਸਨੀਆ-ਹਰਜ਼ੇਗੋਵੀਨਾ ਖ਼ਿਲਾਫ਼ ਮੈਚ ਵਿੱਚ ਲਾਲ ਕਾਰਡ ਮਿਲਣ ਤੋਂ ਬਾਅਦ ਇੱਕ ਮੈਚ ਦੀ ਆਟੋਮੈਟਿਕ ਪਾਬੰਦੀ ਲੱਗੀ। ਟਰੰਪ ਨੇ ਬਾਅਦ ਵਿੱਚ ਖੁੱਲ੍ਹੇ ਤੌਰ ’ਤੇ ਦੱਸਿਆ ਕਿ ਉਨ੍ਹਾਂ ਨੇ ਇੰਫੈਂਟੀਨੋ ਨੂੰ ਫ਼ੋਨ ਕਰਕੇ ਇਸ ਪਾਬੰਦੀ ਦੀ ਸਮੀਖਿਆ ਕਰਨ ਲਈ ਕਿਹਾ ਸੀ।
ਇਸ ਤੋਂ ਬਾਅਦ ਫੀਫਾ ਦੀ ਅਨੁਸ਼ਾਸਨ ਕਮੇਟੀ ਨੇ ਇੱਕ ਬੇਮਿਸਾਲ ਫ਼ੈਸਲਾ ਕਰਦਿਆਂ ਬਾਲੋਗਨ ਦੀ ਪਾਬੰਦੀ ਨੂੰ 12 ਮਹੀਨਿਆਂ ਲਈ ਮੁਅੱਤਲ ਕਰ ਦਿੱਤਾ। ਇਸ ਫ਼ੈਸਲੇ ਨਾਲ ਬਾਲੋਗਨ ਨੂੰ ਬੈਲਜੀਅਮ ਖ਼ਿਲਾਫ਼ ਰਾਊਂਡ ਆਫ 16 ਦਾ ਮੈਚ ਖੇਡਣ ਦੀ ਇਜਾਜ਼ਤ ਮਿਲ ਗਈ, ਹਾਲਾਂਕਿ ਅਮਰੀਕੀ ਟੀਮ 4-1 ਨਾਲ ਹਾਰ ਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਗਈ।
ਆਲੋਚਕਾਂ ਦਾ ਕਹਿਣਾ ਹੈ ਕਿ ਕਿਸੇ ਦੇਸ਼ ਦੇ ਰਾਸ਼ਟਰਪਤੀ ਵੱਲੋਂ ਫੀਫਾ ਮੁਖੀ ਨੂੰ ਸਿੱਧਾ ਫ਼ੋਨ ਕਰਨ ਤੋਂ ਬਾਅਦ ਅਨੁਸ਼ਾਸਨਕ ਫ਼ੈਸਲੇ ਵਿੱਚ ਤਬਦੀਲੀ ਆਉਣਾ ਸੰਸਥਾ ਦੀ ਸੁਤੰਤਰਤਾ ਨੂੰ ਸ਼ੱਕ ਦੇ ਘੇਰੇ ਵਿੱਚ ਲਿਆਉਂਦਾ ਹੈ। ਦੂਜੇ ਪਾਸੇ ਫੀਫਾ ਦਾ ਦਾਅਵਾ ਹੈ ਕਿ ਉਸ ਦੀਆਂ ਨਿਆਂਇਕ ਅਤੇ ਅਨੁਸ਼ਾਸਨਕ ਸੰਸਥਾਵਾਂ ਸੁਤੰਤਰ ਤੌਰ ’ਤੇ ਕੰਮ ਕਰਦੀਆਂ ਹਨ।
ਭਾਵੇਂ ਇੰਫੈਂਟੀਨੋ ’ਤੇ ਸਜ਼ਾ ਦੀ ਸੰਭਾਵਨਾ ਫਿਲਹਾਲ ਘੱਟ ਮੰਨੀ ਜਾ ਰਹੀ ਹੈ, ਪਰ ਇਹ ਮਾਮਲਾ 2026 ਵਿਸ਼ਵ ਕੱਪ ਦੇ ਸਭ ਤੋਂ ਵੱਡੇ ਪ੍ਰਸ਼ਾਸਕੀ ਵਿਵਾਦਾਂ ਵਿੱਚ ਸ਼ਾਮਲ ਹੋ ਗਿਆ ਹੈ। ਇਸ ਨੇ ਇੱਕ ਵਾਰ ਫਿਰ ਇਹ ਸਵਾਲ ਖੜ੍ਹਾ ਕਰ ਦਿੱਤਾ ਹੈ ਕਿ ਕੀ ਫੀਫਾ ਤਾਕਤਵਰ ਸਰਕਾਰਾਂ ਅਤੇ ਸਿਆਸੀ ਆਗੂਆਂ ਦੇ ਪ੍ਰਭਾਵ ਤੋਂ ਪੂਰੀ ਤਰ੍ਹਾਂ ਆਜ਼ਾਦ ਰਹਿ ਸਕਦਾ ਹੈ।
