ਨਿਊਯਾਰਕ, 22 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ )-ਐਲਬਨੀ ਤੋਂ ਨਿਊਯਾਰਕ ਸਿਟੀ ਜਾ ਰਹੀ ਯਾਤਰੀ ਬੱਸ ਅਲਸਟਰ ਕਾਊਂਟੀ ਵਿਚ ਨਿਊਯਾਰਕ ਸਟੇਟ ਥਰੂਵੇਅ ’ਤੇ ਪਲਟ ਗਈ। ਹਾਦਸਾ ਦੱਖਣ ਵੱਲ ਜਾਣ ਵਾਲੇ ਰਸਤੇ ਉੱਤੇ ਐਗਜ਼ਿਟ 18 ਅਤੇ 17 ਵਿਚਕਾਰ ਵਾਪਰਿਆ। ਬੱਸ ਵਿੱਚ ਕਰੀਬ 23 ਯਾਤਰੀ ਸਵਾਰ ਸਨ। ਪੁਲਿਸ ਅਨੁਸਾਰ 17 ਯਾਤਰੀਆਂ ਨੂੰ ਕੋਈ ਸੱਟ ਨਹੀਂ ਲੱਗੀ, ਜਦਕਿ ਬਾਕੀ ਛੇ ਨੂੰ ਘਟਨਾ ਸਥਾਨ ’ਤੇ ਡਾਕਟਰੀ ਸਹਾਇਤਾ ਦਿੱਤੀ ਗਈ ਜਾਂ ਸਥਾਨਕ ਹਸਪਤਾਲਾਂ ਵਿੱਚ ਲਿਜਾਇਆ ਗਿਆ। ਕਿਸੇ ਦੀ ਸੱਟ ਜਾਨਲੇਵਾ ਨਹੀਂ ਦੱਸੀ ਗਈ। ਹਾਦਸੇ ਮਗਰੋਂ ਪੁਲਿਸ, ਫਾਇਰ ਬ੍ਰਿਗੇਡ ਅਤੇ ਐਮਰਜੈਂਸੀ ਟੀਮਾਂ ਮੌਕੇ ’ਤੇ ਪਹੁੰਚੀਆਂ। ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਜਾਰੀ ਹੈ।
