ਨਿਊਯਾਰਕ, 22 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ )-ਅਮਰੀਕਾ ਦੇ ਨਿਊਯਾਰਕ ਸ਼ਹਿਰ ’ਚ ਇਕ ਬਿਨਾਂ ਲਾਇਸੰਸ ਵਾਲੇ ਫ਼ਰਜ਼ੀ ਡਾਕਟਰ ਵੱਲੋਂ ਲਗਾਏ ਗਏ ਟੀਕੇ ਕਰਕੇ 27 ਸਾਲਾ ਮੁਟਿਆਰ ਦੀ ਜਾਨ ਚਲੀ ਗਈ। ਜਾਣਕਾਰੀ ਮੁਤਾਬਕ ਘਟਨਾ ਬ੍ਰੌਂਕਸ ਇਲਾਕੇ ਦੇ ਰਿਵਰਡੇਲ ਐਵੇਨਿਊ ਸਥਿਤ ‘ਬੇਰੇਸ਼ਿਥ ਲਾਈਫਸਟਾਈਲ ਸੈਂਟਰ’ ਦੀ ਹੈ। ਮ੍ਰਿਤਕਾ ਦੀ ਪਛਾਣ ਐਲਿਜ਼ਾਬੈਥ ਬੈਰਨ (27) ਵਜੋਂ ਹੋਈ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਐਲਿਜ਼ਾਬੈਥ ਐਤਵਾਰ ਨੂੰ ਸੈਂਟਰ ਵਿਚ ਇਲਾਜ ਲਈ ਗਈ ਸੀ, ਜਿੱਥੇ ਲੁਈਸ ਰੋਜਾਸ ਨਾਮ ਦੇ ਵਿਅਕਤੀ ਨੇ ਉਸ ਨੂੰ ਕੋਈ ਸੀਰਮ ਇੰਜੈਕਸ਼ਨ ਲਗਾਇਆ। ਇੰਜੈਕਸ਼ਨ ਲੱਗਦਿਆਂ ਹੀ ਉਹ ਅਚਾਨਕ ਬੇਹੋਸ਼ ਹੋ ਗਈ। ਉਸ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ, ਪਰ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪੁਲਿਸ ਤਫ਼ਤੀਸ਼ ਵਿਚ ਖ਼ੁਲਾਸਾ ਹੋਇਆ ਹੈ ਕਿ ਰੋਜਾਸ ਕੋਲ ਡੋਮਿਨਿਕਨ ਰਿਪਬਲਿਕ ਵਿਚ ਡਾਕਟਰੀ ਦਾ ਲਾਇਸੰਸ ਤਾਂ ਸੀ, ਪਰ ਅਮਰੀਕਾ ਵਿਚ ਡਾਕਟਰੀ ਪ੍ਰੈਕਟਿਸ ਕਰਨ ਦੀ ਕੋਈ ਕਾਨੂੰਨੀ ਮਨਜ਼ੂਰੀ ਨਹੀਂ ਸੀ। ਉਹ ਆਪਣੀ ਵੈੱਬਸਾਈਟ ‘ਤੇ ਖ਼ੁਦ ਨੂੰ ਹੋਲਿਸਟਿਕ (ਵੈਦਿਕ/ਕੁਦਰਤੀ) ਡਾਕਟਰ ਦੱਸ ਕੇ ਲੋਕਾਂ ਦਾ ਇਲਾਜ ਕਰ ਰਿਹਾ ਸੀ। ਪੁਲਿਸ ਨੇ ਮਾਮਲਾ ਦਰਜ ਕਰ ਲਿਆ ਹੈ।
