9/11 ਸਮਾਗਮ ’ਚ ਮੇਅਰ ਮਮਦਾਨੀ ਦੀ ਸ਼ਮੂਲੀਅਤ ਨੂੰ ਰੋਕਣ ਦੀ ਮੰਗ, 13,900 ਤੋਂ ਵੱਧ ਦਸਤਖ਼ਤ

ਅ

ਅਜੀਤ ਡੈਸਕ 29-07-2026

ਨਿਊਯਾਰਕ, 28 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ )-11 ਸਤੰਬਰ ਦੇ ਹਮਲਿਆਂ ਦੀ 25ਵੀਂ ਬਰਸੀ ਤੋਂ ਪਹਿਲਾਂ ਮੇਅਰ ਜ਼ੋਹਰਾਨ ਮਮਦਾਨੀ ਨੂੰ ਲੈ ਕੇ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਹਮਲਿਆਂ ਵਿੱਚ ਆਪਣੇ ਪਰਿਵਾਰਕ ਮੈਂਬਰ ਗੁਆਉਣ ਵਾਲੇ ਕੁਝ ਲੋਕਾਂ ਨੇ ਮਮਦਾਨੀ ਨੂੰ ਯਾਦਗਾਰੀ ਸਮਾਗਮ ਵਿੱਚ ਨਾ ਆਉਣ ਦੇਣ ਲਈ ਆਨਲਾਈਨ ਪਟੀਸ਼ਨ ਸ਼ੁਰੂ ਕੀਤੀ ਹੈ। ਇਸ ਉੱਤੇ 13,900 ਤੋਂ ਵੱਧ ਲੋਕਾਂ ਦੇ ਦਸਤਖ਼ਤ ਹੋਣ ਦੀ ਜਾਣਕਾਰੀ ਹੈ। ਇਹ ਪਟੀਸ਼ਨ ਜਿਓਵਾਨੀ ਗਲਾਂਟੇ ਨੇ ਸ਼ੁਰੂ ਕੀਤੀ ਹੈ। ਉਨ੍ਹਾਂ ਦੀ ਪਤਨੀ ਗ੍ਰੇਸ ਕੈਥਰੀਨ ਗਲਾਂਟੇ 9/11 ਹਮਲੇ ਵਿੱਚ ਮਾਰੀ ਗਈ ਸੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਦਿਨ ਪੀੜਤ ਪਰਿਵਾਰਾਂ ਲਈ ਬਹੁਤ ਦੁੱਖ ਭਰਿਆ ਅਤੇ ਪਵਿੱਤਰ ਹੈ। ਇਸ ਲਈ ਸਮਾਗਮ ਵਿੱਚ ਕਿਸੇ ਅਜਿਹੇ ਵਿਅਕਤੀ ਨੂੰ ਨਹੀਂ ਆਉਣਾ ਚਾਹੀਦਾ, ਜਿਸ ਦੇ ਵਿਚਾਰਾਂ ਨਾਲ ਪਰਿਵਾਰਾਂ ਨੂੰ ਇਤਰਾਜ਼ ਹੋਵੇ।ਪਟੀਸ਼ਨ ਕਰਨ ਵਾਲਿਆਂ ਨੇ ਮਮਦਾਨੀ ਦੇ ਕੁਝ ਪੁਰਾਣੇ ਬਿਆਨਾਂ ਅਤੇ ਵਿਵਾਦਿਤ ਲੋਕਾਂ ਨਾਲ ਉਨ੍ਹਾਂ ਦੇ ਸਬੰਧਾਂ ਉੱਤੇ ਸਵਾਲ ਚੁੱਕੇ ਹਨ ਅਤੇ ਉਨ੍ਹਾਂ ਦਾ ਦੋਸ਼ ਹੈ ਕਿ ਮਮਦਾਨੀ ਨੇ “ਗਲੋਬਲਾਈਜ਼ ਦਿ ਇੰਤਿਫ਼ਾਦਾ” ਵਰਗੇ ਵਿਵਾਦਿਤ ਨਾਅਰੇ ਦਾ ਸਾਫ਼ ਵਿਰੋਧ ਨਹੀਂ ਕੀਤਾ।

ਮਮਦਾਨੀ ਨੇ ਕਿਹਾ ਹੈ ਕਿ ਉਹ ਵਿਰੋਧ ਦੇ ਬਾਵਜੂਦ 9/11 ਸਮਾਗਮ ਵਿੱਚ ਜ਼ਰੂਰ ਜਾਣਗੇ। ਉਨ੍ਹਾਂ ਕਿਹਾ ਕਿ ਉਹ ਮਾਰੇ ਗਏ ਲੋਕਾਂ ਦੇ ਪਰਿਵਾਰਾਂ, ਹਮਲੇ ਵਿੱਚੋਂ ਬਚੇ ਲੋਕਾਂ ਅਤੇ ਮਦਦ ਲਈ ਸਭ ਤੋਂ ਪਹਿਲਾਂ ਪਹੁੰਚੇ ਕਰਮਚਾਰੀਆਂ ਨਾਲ ਖੜ੍ਹ ਕੇ ਸ਼ਰਧਾਂਜਲੀ ਦੇਣਗੇ।
ਕੁਝ ਲੋਕਾਂ ਨੇ ਮਮਦਾਨੀ ਨੂੰ ਰੋਕਣ ਦੀ ਮੰਗ ਨੂੰ ਗ਼ਲਤ ਵੀ ਦੱਸਿਆ ਹੈ। 9/11 ਮੈਮੋਰੀਅਲ ਦੇ ਪ੍ਰਬੰਧਕਾਂ ਦਾ ਕਹਿਣਾ ਹੈ ਕਿ ਸਮਾਗਮ ਨੂੰ ਰਾਜਨੀਤੀ ਤੋਂ ਦੂਰ ਰੱਖਿਆ ਜਾਂਦਾ ਹੈ। ਉੱਥੇ ਆਉਣ ਵਾਲੇ ਸਿਆਸੀ ਆਗੂ ਭਾਸ਼ਣ ਨਹੀਂ ਦਿੰਦੇ, ਸਗੋਂ ਚੁੱਪਚਾਪ ਪੀੜਤਾਂ ਨੂੰ ਸ਼ਰਧਾਂਜਲੀ ਦਿੰਦੇ ਹਨ।