ਜਨਤਕ ਸੁਰੱਖਿਆ ਦੇ ਨਾਂ ’ਤੇ ਸਰਕਾਰੀ ਪ੍ਰੋਗਰਾਮ ਬਣਿਆ ਸਿਆਸੀ ਅਖਾੜਾ, ਟਰੰਪ ਨੇ ਬਲੇਕਮੈਨ ਲਈ ਮੰਗੀਆਂ ਵੋਟਾਂ —- ਪੁਲਿਸ ਅਕੈਡਮੀ ਦੇ ਮੰਚ ਤੋਂ ਡੈਮੋਕ੍ਰੇਟਾਂ ’ਤੇ ਹਮਲੇ, ਅਪਰਾਧਾਂ ’ਚ ਕਮੀ ਦਾ ਲਿਆ ਸਿਹਰਾ

ਨਿਊਯਾਰਕ, 16 ਅਗਸਤ (ਰਾਜੂ ਸਹਿਬਾਜ਼ਪੁਰਾ)-ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਲਾਂਗ ਆਈਲੈਂਡ ਫੇਰੀ ਦੌਰਾਨ ਅਪਰਾਧ, ਨਿਊਯਾਰਕ ਦੀ ਗਵਰਨਰ ਚੋਣ ਅਤੇ ਇਰਾਨ ਜੰਗ ਮੁੱਖ ਮੁੱਦੇ ਬਣੇ ਰਹੇ। ਨਸਾਊ ਕਾਊਂਟੀ ਪੁਲਿਸ ਅਕੈਡਮੀ ਵਿਚ ਜਨਤਕ ਸੁਰੱਖਿਆ ਬਾਰੇ ਰੱਖਿਆ ਪ੍ਰੋਗਰਾਮ ਛੇਤੀ ਹੀ ਸਿਆਸੀ ਰੈਲੀ ਦਾ ਰੂਪ ਧਾਰ ਗਿਆ। ਟਰੰਪ ਨੇ ਰਿਪਬਲਿਕਨ ਉਮੀਦਵਾਰ ਬਰੂਸ ਬਲੇਕਮੈਨ ਲਈ ਵੋਟਾਂ ਮੰਗੀਆਂ ਅਤੇ ਗਵਰਨਰ ਕੈਥੀ ਹੋਕਲ ਨੂੰ ਅਪਰਾਧ ਦੇ ਮੁੱਦੇ ਉੱਤੇ ਘੇਰਿਆ। ਟਰੰਪ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਸਮਰਥਕ ਸਵੇਰ ਤੋਂ ਕਤਾਰਾਂ ਵਿੱਚ ਲੱਗ ਗਏ ਸਨ, ਜਦਕਿ ਅੱਧਾ ਮੀਲ ਦੂਰ ਨਸਾਊ ਕਮਿਊਨਿਟੀ ਕਾਲਜ ਵਿੱਚ ਵਿਰੋਧੀਆਂ ਨੇ ਪ੍ਰਦਰਸ਼ਨ ਕੀਤਾ। ਸਮਰਥਕਾਂ ਨੇ ਟਰੰਪ ਅਤੇ ਬਲੇਕਮੈਨ ਨੂੰ ਮਜ਼ਬੂਤ ਆਗੂ ਦੱਸਿਆ, ਪਰ ਵਿਰੋਧੀਆਂ ਨੇ ਮਹਿੰਗੇ ਕਰਿਆਨੇ, ਪੈਟਰੋਲ ਅਤੇ ਇਮੀਗ੍ਰੇਸ਼ਨ ਕਾਰਵਾਈਆਂ ਦਾ ਮੁੱਦਾ ਚੁੱਕਿਆ। ਐੱਫ.ਬੀ.ਆਈ. ਦੇ ਨਵੇਂ ਅੰਕੜਿਆਂ ਮੁਤਾਬਕ 2025 ਵਿਚ ਅਮਰੀਕਾ ਅੰਦਰ ਹਿੰਸਕ ਅਪਰਾਧਾਂ ਵਿਚ 9.3 ਫ਼ੀਸਦੀ ਅਤੇ ਕਤਲਾਂ ਵਿੱਚ 18 ਫ਼ੀਸਦੀ ਤੋਂ ਵੱਧ ਦੀ ਕਮੀ ਆਈ। ਹੱਤਿਆ ਦਰ 75 ਸਾਲਾਂ ਦੇ ਸਭ ਤੋਂ ਹੇਠਲੇ ਪੱਧਰ ਉੱਤੇ ਪਹੁੰਚ ਗਈ। ਟਰੰਪ ਨੇ ਇਸ ਗਿਰਾਵਟ ਨੂੰ ਆਪਣੇ ਪ੍ਰਸ਼ਾਸਨ ਦੀ ਸਖ਼ਤ ਨੀਤੀ ਦਾ ਨਤੀਜਾ ਦੱਸਿਆ, ਹਾਲਾਂਕਿ ਮਾਹਿਰਾਂ ਅਨੁਸਾਰ ਅਪਰਾਧਾਂ ਵਿੱਚ ਕਮੀ ਦਾ ਰੁਝਾਨ 2022 ਤੋਂ ਜਾਰੀ ਹੈ ਅਤੇ ਇਸ ਦਾ ਸਿਹਰਾ ਕਿਸੇ ਇੱਕ ਕਾਰਨ ਨੂੰ ਨਹੀਂ ਦਿੱਤਾ ਜਾ ਸਕਦਾ। ਰੈਲੀ ’ਚ ਅਟਾਰਨੀ ਜਨਰਲ ਟੌਡ ਬਲਾਂਚ ਅਤੇ ਐੱਫਬੀਆਈ ਡਾਇਰੈਕਟਰ ਕਸ਼ ਪਟੇਲ ਵੀ ਮੌਜੂਦ ਰਹੇ। ਟਰੰਪ ਨੇ ਨੈਸ਼ਨਲ ਗਾਰਡ ਦੀ ਤਾਇਨਾਤੀ, ਟੈਕਸ ਕਟੌਤੀਆਂ ਅਤੇ ਓਵਰਟਾਈਮ ਉੱਤੇ ਰਾਹਤ ਦਾ ਜ਼ਿਕਰ ਕਰਦਿਆਂ ਅਮਰੀਕਾ ਨੂੰ ਹੋਰ ਸੁਰੱਖਿਅਤ ਬਣਾਉਣ ਦਾ ਵਾਅਦਾ ਕੀਤਾ। ਉਨ੍ਹਾਂ ਨੇ ਬ੍ਰੋਂਕਸ ਵਿੱਚ ਅਵਾਰਾ ਗੋਲੀ ਨਾਲ ਮਾਰੇ ਗਏ 12 ਸਾਲਾ ਜੈਕਬ ਫਰੇਟਸ ਦੇ ਮਾਪਿਆਂ ਨੂੰ ਮੰਚ ਤੋਂ ਉਤਰ ਕੇ ਮਿਲਿਆ। ਗਵਰਨਰ ਦੀ ਚੋਣ ਵਿੱਚ ਹੋਕਲ ਅਜੇ ਵੀ ਬਲੇਕਮੈਨ ਤੋਂ ਅੱਗੇ ਹਨ, ਪਰ ਉਨ੍ਹਾਂ ਦੀ ਬੜ੍ਹਤ ਜੂਨ ਦੇ 20 ਅੰਕਾਂ ਤੋਂ ਘਟ ਕੇ 10 ਅੰਕ ਰਹਿ ਗਈ ਹੈ। ਤਾਜ਼ਾ ਸਰਵੇਖਣ ਵਿੱਚ ਹੋਕਲ ਨੂੰ 49 ਅਤੇ ਬਲੇਕਮੈਨ ਨੂੰ 39 ਫ਼ੀਸਦੀ ਸਮਰਥਨ ਮਿਲਿਆ। ਇਸ ਕਰਕੇ ਟਰੰਪ ਦੀ ਫੇਰੀ ਨੂੰ ਬਲੇਕਮੈਨ ਦੇ ਨਾਲ ਨਸਾਊ ਕਾਊਂਟੀ ਦੀਆਂ ਦੋ ਕਾਂਗਰਸੀ ਸੀਟਾਂ ਉੱਤੇ ਰਿਪਬਲਿਕਨਾਂ ਦੀ ਪਕੜ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਮੰਨਿਆ ਜਾ ਰਿਹਾ ਹੈ। ਟਰੰਪ ਨੇ ਇਸੇ ਮੰਚ ਤੋਂ ਕਿਹਾ ਕਿ ਇਰਾਨ ਦੀ ਹਾਰ ਮਗਰੋਂ ਉਹ ਹਾਰਮੁਜ਼ ਜਲਡਮਰੂ ਨੂੰ ਅਮਰੀਕੀ ਖੇਤਰ ਐਲਾਨਣਗੇ। ਉਨ੍ਹਾਂ ਨਿਊਯਾਰਕ ਵਾਸੀਆਂ ਨੂੰ ਇਰਾਨ ਜੰਗ ਦੌਰਾਨ ਪੈਟਰੋਲ ਲਈ ਕੁਝ ਵੱਧ ਕੀਮਤ ਦੇਣ ਨੂੰ ਵੀ ਕਿਹਾ। ਉਨ੍ਹਾਂ ਮੁਤਾਬਕ ਪਰਮਾਣੂ ਹਥਿਆਰਾਂ ਤੋਂ ਇਰਾਨ ਨੂੰ ਰੋਕਣ ਲਈ ਲੋਕਾਂ ਨੂੰ ਇਹ ਕੀਮਤ ਸਹਿਣੀ ਪਵੇਗੀ। ਦੂਜੇ ਪਾਸੇ ਕਰੀਬ ਨੌਂ ਮਹੀਨਿਆਂ ਤੋਂ ਸਮੁੰਦਰ ਵਿੱਚ ਤਾਇਨਾਤ ਯੂਐੱਸਐੱਸ ਅਬਰਾਹਮ ਲਿੰਕਨ ਉੱਤੇ ਖਾਣੇ, ਸਪਲਾਈ ਅਤੇ ਜਵਾਨਾਂ ਦੀ ਮਾਨਸਿਕ ਸਿਹਤ ਬਾਰੇ ਪਰਿਵਾਰਾਂ ਨੇ ਗੰਭੀਰ ਚਿੰਤਾ ਜਤਾਈ ਹੈ। ਟਰੰਪ ਨੇ ਲੰਮੀ ਤਾਇਨਾਤੀ ਸਬੰਧੀ ਸਵਾਲਾਂ ਨੂੰ ਖਾਰਜ ਕਰ ਦਿੱਤਾ। ਇਸ ਤਰ੍ਹਾਂ ਉਨ੍ਹਾਂ ਦੀ ਨਿਊਯਾਰਕ ਫੇਰੀ ਵਿੱਚ ਸਥਾਨਕ ਚੋਣ ਤੋਂ ਲੈ ਕੇ ਅਪਰਾਧ, ਜੰਗ ਅਤੇ ਮਹਿੰਗੇ ਪੈਟਰੋਲ ਤੱਕ ਹਰ ਮੁੱਦਾ ਗੂੰਜਿਆ। Trump-Blakeman-Ap-Img (1) ਫੋਟੋ ’ਚ ਬਰੂਸ ਬਲੇਕਮੈਨ ਅਤੇ ਰਾਸ਼ਟਰਪਤੀ ਟਰੰਪ