ਤਿੰਨ ਵੱਡੇ ਸਮੁੰਦਰੀ ਹਾਦਸਿਆਂ ’ ਚੋਂ ਜ਼ਿੰਦਾ ਬਚਣ ਵਾਲੀ ਵਾਇਲਟ ਜੈਸਪ ਦੀ ਹੈਰਾਨੀਜਨਕ ਕਹਾਣੀ ਨੂੰ ਅੱਜ ਵੀ ਕੀਤਾ ਜਾਂਦਾ ਹੈ ਯਾਦ
ਲੰਡਨ, 12 ਨਵੰਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਸਮੁੰਦਰੀ ਸਫ਼ਰ ਦੇ ਇਤਿਹਾਸ ਵਿਚ ਵਾਇਲਟ ਜੈਸਪ ਦਾ ਨਾਂਅ ਇਕ ਅਜਿਹੀ ਬਹਾਦਰ ਔਰਤ ਵਜੋਂ ਦਰਜ ਹੈ, ਜਿਸ ਨੇ ਤਿੰਨ ਵੱਡੇ ਸਮੁੰਦਰੀ ਹਾਦਸਿਆਂ ਦਾ ਸਾਹਮਣਾ ਕੀਤਾ ਅਤੇ ਹਰ ਵਾਰ ਸੁਰੱਖਿਅਤ ਬਚ ਨਿਕਲੀ। ਵਾਇਲਟ ਜੈਸਪ ਸਮੁੰਦਰੀ ਜਹਾਜ਼ਾਂ ਵਿੱਚ ਸੇਵਾਵਾਂ ਨਿਭਾਉਂਦੀ ਸੀ।
ਲੰਡਨ, 12 ਨਵੰਬਰ (ਮਨਪ੍ਰੀਤ ਸਿੰਘ ਬੱਧਨੀ ਕਲਾਂ)-ਸਮੁੰਦਰੀ ਸਫ਼ਰ ਦੇ ਇਤਿਹਾਸ ਵਿਚ ਵਾਇਲਟ ਜੈਸਪ ਦਾ ਨਾਂਅ ਇਕ ਅਜਿਹੀ ਬਹਾਦਰ ਔਰਤ ਵਜੋਂ ਦਰਜ ਹੈ, ਜਿਸ ਨੇ ਤਿੰਨ ਵੱਡੇ ਸਮੁੰਦਰੀ ਹਾਦਸਿਆਂ ਦਾ ਸਾਹਮਣਾ ਕੀਤਾ ਅਤੇ ਹਰ ਵਾਰ ਸੁਰੱਖਿਅਤ ਬਚ ਨਿਕਲੀ। ਵਾਇਲਟ ਜੈਸਪ ਸਮੁੰਦਰੀ ਜਹਾਜ਼ਾਂ ਵਿੱਚ ਸੇਵਾਵਾਂ ਨਿਭਾਉਂਦੀ ਸੀ। ਸਾਲ 1911 ਵਿੱਚ ਉਹ ਆਰ ਐੱਮ ਐੱਸ ਓਲੰਪਿਕ ਜਹਾਜ਼ ਵਿੱਚ ਸਵਾਰ ਸੀ, ਜਦੋਂ ਇਸ ਦੀ ਬਰਤਾਨਵੀ ਜੰਗੀ ਜਹਾਜ਼ ਐੱਚ ਐੱਮ ਐੱਸ ਹਾਕ ਨਾਲ ਟੱਕਰ ਹੋ ਗਈ। ਖੁਸ਼ਕਿਸਮਤੀ ਨਾਲ ਉਹ ਇਸ ਹਾਦਸੇ ਵਿੱਚ ਬਚ ਗਈ। ਇਸ ਤੋਂ ਅਗਲੇ ਸਾਲ, 1912 ਵਿੱਚ, ਉਹ ਦੁਨੀਆ ਦੇ ਪ੍ਰਸਿੱਧ ਸਮੁੰਦਰੀ ਜਹਾਜ਼ ਟਾਈਟੈਨਿਕ ਵਿੱਚ ਸਵਾਰ ਸੀ। ਜਦੋਂ ਟਾਈਟੈਨਿਕ ਬਰਫ਼ ਦੇ ਪਹਾੜ ਨਾਲ ਟਕਰਾ ਕੇ ਡੁੱਬ ਗਿਆ, ਤਾਂ ਵਾਇਲਟ ਜੈਸਪ ਉਨ੍ਹਾਂ ਖੁਸ਼ਕਿਸਮਤ ਯਾਤਰੀਆਂ ਅਤੇ ਕਰਮਚਾਰੀਆਂ ਵਿੱਚ ਸ਼ਾਮਲ ਸੀ, ਜਿਨ੍ਹਾਂ ਦੀ ਜਾਨ ਬਚ ਗਈ। ਸਾਲ 1916 ਵਿੱਚ ਪਹਿਲੇ ਵਿਸ਼ਵ ਯੁੱਧ ਦੌਰਾਨ ਉਹ ਹਸਪਤਾਲ ਜਹਾਜ਼ ਐੱਚ ਐੱਮ ਐੱਚ ਐੱਸ ਬ੍ਰਿਟੈਨਿਕ ਵਿੱਚ ਨਰਸ ਵਜੋਂ ਸੇਵਾ ਕਰ ਰਹੀ ਸੀ । ਇਹ ਜਹਾਜ਼ ਸਮੁੰਦਰ ਵਿੱਚ ਬਾਰੂਦੀ ਸੁਰੰਗ ਨਾਲ ਟਕਰਾ ਕੇ ਡੁੱਬ ਗਿਆ, ਪਰ ਵਾਇਲਟ ਇਸ ਹਾਦਸੇ ਵਿੱਚੋਂ ਵੀ ਜ਼ਿੰਦਾ ਬਚ ਨਿਕਲੀ। ਇਨ੍ਹਾਂ ਤਿੰਨ ਵੱਡੇ ਹਾਦਸਿਆਂ ਵਿੱਚੋਂ ਬਚਣ ਕਾਰਨ ਵਾਇਲਟ ਜੈਸਪ ਨੂੰ ‘ਮਿਸ ਅਨਸਿੰਕੇਬਲ’ ਦੇ ਨਾਂ ਨਾਲ ਜਾਣਿਆ ਜਾਣ ਲੱਗਾ। ਵਾਇਲਟ ਜੈਸਪ ਦਾ 1971 ਵਿੱਚ 83 ਸਾਲ ਦੀ ਉਮਰ ਵਿੱਚ ਦੇਹਾਂਤ ਹੋ ਗਿਆ। ਉਸ ਦੀ ਅਸਾਧਾਰਨ ਜੀਵਨ ਕਹਾਣੀ ਅੱਜ ਵੀ ਦੁਨੀਆ ਭਰ ਦੇ ਲੋਕਾਂ ਨੂੰ ਹੈਰਾਨ ਕਰਦੀ ਹੈ।
