ਕਾਲਾਂਵਾਲੀ/ਸਿਰਸਾ, 4 ਜਨਵਰੀ (ਭੁਪਿੰਦਰ ਪੰਨੀਵਾਲੀਆ)-ਗੁਰੂ ਗੋਬਿੰਦ ਸਿੰਘ ਜੀ ਦੇ ਪ੍ਰਕਾਸ਼ ਪੁਰਬ ਮੌਕੇ ਕਾਲਾਂਵਾਲੀ ਪਿੰਡ ਤੇ ਮੰਡੀ ਵਿਚ ਨਗਰ ਕੀਰਤਨ ਸਜਾਇਆ | ਇਸ ਨਗਰ ਕੀਰਤਨ ਦੀ ਅਗਵਾਈ ਗੁਰੂ ਜੀ ਦੇ ਪੰਜ ਪਿਆਰਿਆਂ ਨੇ ਕੀਤੀ | ਗੁਰੂ ਗ੍ਰੰਥ ਸਾਹਿਬ ਦੀ ਪਾਲਕੀ ਨੂੰ ਸੁੰਦਰ ਢੰਗ ਨਾਲ ਸਜਾਇਆ ਗਿਆ ਸੀ | ਇਹ ਨਗਰ ਕੀਰਤਨ ਪਿੰਡ ਦੇ ਗੁਰਦੁਆਰਾ ਦੁਖ ਨਿਵਾਰਨ ਸਾਹਿਬ ਤੋਂ ਸ਼ੁਰੂ ਹੋ ਕੇ ਡੱਬਵਾਲੀ ਰੋਡ, ਬੱਸ ਅੱਡੇ, ਅਨਾਜ ਮੰਡੀ, ਪੰਜਾਬ ਬੱਸ ਅੱਡਾ, ਪੰਜ ਰਤਨ ਸਿਨੇਮਾ ਰੋਡ, ਵਾਟਰ ਵਰਕਸ ਰੋਡ, ਸਬਜ਼ੀ ਮੰਡੀ, ਤਖ਼ਤਮੱਲ ਰੇਲਵੇ ਫਾਟਕ ਤੇ ਦੇਸੂ ਰੋਡ ਸ਼ਾਮਲ ਤੋਂ ਹੁੰਦਾ ਹੋਇਆ ਵਾਪਸ ਗੁਰਦੁਆਰਾ ਸਾਹਿਬ ਪਹੁੰਚਿਆ | ਨਗਰ ਕੀਰਤਨ 'ਚ ਸ਼ਰਧਾਲੂ ਪਾਲਕੀ ਦੇ ਨਾਲ-ਨਾਲ ਸਤਿਨਾਮ ਵਾਹਿਗੁਰੂ ਦਾ ਜਾਪ ਕਰਦੇ ਹੋਏ ਚੱਲ ਰਹੇ ਸਨ | ਅਨਾਜ ਮੰਡੀ ਪਹੁੰਚਣ 'ਤੇ ਵਪਾਰੀਆਂ ਨੇ ਨਗਰ ਕੀਰਤਨ ਦਾ ਸਵਾਗਤ ਕੀਤਾ ਤੇ ਸ਼ਰਧਾਲੂਆਂ ਲਈ ਲੰਗਰ ਲਗਾਇਆ | ਇਸ ਦੌਰਾਨ ਨਗਰ ਕੀਰਤਨ ਦਾ ਸਵਾਗਤ ਵੱਖ-ਵੱਖ ਥਾਵਾਂ 'ਤੇ ਫੁੱਲਾਂ ਦੀ ਵਰਖਾ ਨਾਲ ਕੀਤਾ | ਦੇਸੂ ਰੋਡ 'ਤੇ ਮਨਜੀਤ ਸਿੰਘ ਦੇ ਆਰਾ ਵਿਖੇ ਪੰਜ ਪਿਆਰਿਆਂ ਨੂੰ ਸਿਰੋਪਾਓ ਨਾਲ ਸਨਮਾਨਿਤ ਕੀਤਾ | ਰਾਗੀ ਢਾਡੀ ਜਥਿਆਂ ਨੇ ਗੁਰੂ ਗੋਬਿੰਦ ਸਿੰਘ ਜੀ ਦੇ ਜੀਵਨ 'ਤੇ ਚਾਨਣਾ ਪਾਇਆ | ਸਮਾਗਮ ਦੌਰਾਨ ਅਕਾਲੀ ਬਾਬਾ ਫੂਲਾ ਸਿੰਘ ਗੱਤਕਾ ਅਕੈਡਮੀ ਕਾਲਾਂਵਾਲੀ ਦੇ ਗਤਕਾ ਪਾਰਟੀ ਦੇ ਮੈਂਬਰਾਂ ਨੇ ਗਤਕਾ ਖੇਡਦੇ ਹੋਏ ਕਈ ਸ਼ਾਨਦਾਰ ਕਰਤੱਬ ਦਿਖਾਏ | ਇਸ ਮੌਕੇ ਵੱਡੀ ਗਿਣਤੀ 'ਚ ਸ਼ਰਧਾਲੂ ਮੌਜੂਦ ਸਨ |
