ਨਵੀਂ ਦਿੱਲੀ, 10 ਅਪ੍ਰੈਲ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਵਿਚ ਅੱਜ-ਕੱਲ੍ਹ ਲੋਕਾਂ ਨੂੰ ਫਰਜ਼ੀ ਕਾਲਾਂ, ਐਸ.ਐਮ.ਐਸ. ਅਤੇ ਵੱਟਸਅੱਪ, ਜਿਸ ਵਿਚ ਜਲ ਬੋਰਡ, ਬਿਜਲੀ ਵਿਭਾਗ ਤੇ ਬੈਂਕਾਂ ਨੂੰ ਲਿਆ ਜਾਂਦਾ ਹੈ | ਜੋ ਲੋਕ ਫਰਜ਼ੀ ਕਾਲਾਂ ਦੇ ਝਾਂਸੇ ਵਿਚ ਆ ਜਾਂਦੇ ਹਨ, ਪੈਸੇ ਦੀ ਠੱਗੀ ਦਾ ਸ਼ਿਕਾਰ ਹੋ ਜਾਂਦੇ ਹਨ | ਉਪਰੋਕਤ ਵਿਭਾਗਾਂ ਵਲੋਂ ਵਾਰ-ਵਾਰ ਲੋਕਾਂ ਨੂੰ ਅਪੀਲਾਂ ਵੀ ਕੀਤੀਆਂ ਜਾ ਰਹੀਆਂ ਹਨ ਕਿ ਫਰਜ਼ੀ ਕਾਲਾਂ ਪ੍ਰਤੀ ਹਮੇਸ਼ਾ ਸੁਚੇਤ ਰਿਹਾ ਜਾਵੇ ਪ੍ਰੰਤੂ ਫਿਰ ਵੀ ਲੋਕ ਧੋਖਾ ਖਾ ਰਹੇ ਹਨ | ਇਨ੍ਹਾਂ ਵਿਭਾਗਾਂ ਨੇ ਇਹ ਵੀ ਦੱਸਿਆ ਹੈ ਕਿ ਜੇਕਰ ਠੱਗੀ ਹੋ ਜਾਂਦੀ ਹੈ ਤਾਂ ਤੁਰੰਤ ਸਾਈਬਰ ਕਰਾਇਮ ਹੈਲਪਲਾਈਨ 1930 ਜਾਂ ਸਰਕਾਰੀ ਪੋਰਟਲ 'ਤੇ ਸ਼ਿਕਾਇਤ ਕੀਤੀ ਜਾਵੇ | ਠੱਗੀ ਮਾਰਨ ਵਾਲੇ ਗਰੋਹ ਵਾਲੇ ਆਪਣੇ ਆਪ ਨੂੰ ਵਿਭਾਗ ਦਾ ਕਰਮਚਾਰੀ ਦੱਸਦੇ ਹਨ | ਪਾਣੀ ਦਾ ਕੁਨੈਕਸ਼ਨ ਕੱਟਣ, ਬਿਜਲੀ ਕੱਟਣ ਤੇ ਬੈਂਕ ਦਾ ਖਾਤਾ ਸੀਲ ਕਰਨ ਬਾਰੇ ਲੋਕਾਂ ਨੂੰ ਡਰਾਉਂਦੇ ਹਨ | ਇਸ ਤੋਂ ਇਲਾਵਾ ਦਿੱਲੀ ਪੁਲਿਸ ਵੀ ਵਾਰ-ਵਾਰ ਲੋਕਾਂ ਨੂੰ ਸੁਨੇਹਾ ਦੇ ਰਹੀ ਹੈ ਕਿ ਆਈ ਫਰਜ਼ੀ ਕਾਲ ਜਾਂ ਸੰਦੇਸ਼ 'ਤੇ ਕਿਸੇ ਵੀ ਕਿਸਮ ਦੀ ਜਾਣਕਾਰੀ ਸਾਂਝੀ ਨਾ ਕੀਤੀ ਜਾਵੇ | ਵਰਨਣਯੋਗ ਹੈ ਕਿ ਵਿਸ਼ੇਸ਼ ਤੌਰ 'ਤੇ ਇਹ ਧੰਦਾ ਜ਼ੋਰਾਂ 'ਤੇ ਚੱਲ ਰਿਹਾ ਹੈ ਅਤੇ ਲੋਕ ਸ਼ਿਕਾਰ ਵੀ ਹੋ ਰਹੇ ਹਨ |
