ਨਵੀਂ ਦਿੱਲੀ, 29 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦਿੱਲੀ ਦੀਆਂ ਰੇਲਵੇ ਲਾਈਨਾਂ ਦੇ ਆਸਪਾਸ ਕਈ ਇਲਾਕਿਆਂ ਵਿਚ ਝੁੱਗੀਆਂ ਦੀ ਬਹੁਤ ਭਰਮਾਰ ਹੈ ਅਤੇ ਝੁੱਗੀਆਂ ਵਾਲੇ ਰੇਲਵੇ ਦੀ ਜ਼ਮੀਨ 'ਤੇ ਕਬਜ਼ਾ ਕਰੀ ਬੈਠੇ ਹਨ ਅਤੇ ਕਈਆਂ ਨੇ 2-3 ਝੁੱਗੀਆਂ ਬਣਾ ਕੇ ਕਿਰਾਏ 'ਤੇ ਵੀ ਦਿੱਤੀਆਂ ਹਨ | ਇਸ ਤਰ੍ਹਾਂ ਉਨ੍ਹਾਂ ਦਾ ਧੰਦਾ ਚੱਲ ਰਿਹਾ ਹੈ | ਇਨ੍ਹਾਂ ਝੁੱਗੀਆਂ ਵਾਲਿਆਂ ਦੇ ਬੱਚੇ ਸਵੇਰੇ ਤੋਂ ਲੈ ਕੇ ਸ਼ਾਮ ਤੱਕ ਰੇਲਵੇ ਲਾਈਨ ਦੇ ਆਸਪਾਸ ਖੇਡਦੇ ਤੇ ਹੋਰ ਗਤੀਵਿਧੀਆਂ ਕਰਦੇ ਨਜ਼ਰ ਆਉਂਦੇ ਹਨ | ਕਈ ਵਾਰ ਰੇਲ ਗੱਡੀਆਂ ਆਉਣ 'ਤੇ ਹਾਦਸੇ ਵੀ ਹੋਏ ਹਨ ਪ੍ਰੰਤੂ ਫਿਰ ਵੀ ਲੋਕ ਬਾਜ਼ ਨਹੀਂ ਆਉਂਦੇ | ਰੇਲਵੇ ਵਲੋਂ ਆਪਣੀ ਜ਼ਮੀਨ ਖ਼ਾਲੀ ਕਰਵਾਉਣ ਲਈ ਕਈ ਵਾਰ ਕਾਰਵਾਈ ਕੀਤੀ ਗਈ ਹੈ ਪ੍ਰੰਤੂ ਇਹ ਲੋਕ ਫਿਰ ਵੀ ਬਾਜ਼ ਨਹੀਂ ਆ ਰਹੇ ਅਤੇ ਦੁਬਾਰਾ ਫਿਰ ਆਪਣੀਆਂ ਝੁੱਗੀਆਂ ਬਣਾ ਲੈਂਦੇ ਹਨ | ਇਸ ਮਾਮਲੇ ਪ੍ਰਤੀ ਰੇਲਵੇ ਵਿਭਾਗ ਪ੍ਰੇਸ਼ਾਨ ਵੀ ਹੈ | ਜੋ ਝੁੱਗੀਆਂ ਰੇਲਵੇ ਸਟੇਸ਼ਨਾਂ ਦੇ ਆਸਪਾਸ ਹਨ, ਉਨ੍ਹਾਂ ਝੁੱਗੀਆਂ ਵਿਚ ਕੁਝ ਨੌਜਵਾਨ ਲੜਕੇ ਝਪਟਮਾਰੀ ਦੀਆਂ ਵਾਰਦਾਤਾਂ ਵੀ ਕਰਦੇ ਹਨ | ਉਹ ਜਦੋਂ ਰੇਲਵੇ ਸਟੇਸ਼ਨ 'ਤੇ ਆਉਣ ਵਾਲੀ ਗੱਡੀ ਚੱਲਦੀ ਹੈ ਤਾਂ ਲੋਕਾਂ ਦੇ ਮੋਬਾਈਲ ਝਪਟ ਮਾਰ ਕੇ ਖੋਹ ਲੈਂਦੇ ਹਨ ਅਤੇ ਉਸੇ ਸਮੇਂ ਦੌੜ ਜਾਂਦੇ ਹਨ |
