ਟੋਹਾਣਾ, 15 ਜੁਲਾਈ (ਮਨਜੀਤ ਸਿੰਘ)-ਉਪਮੰਡਲ ਟੋਹਾਣਾ ਦੇ ਪਿੰਡ ਸਮੈਣ ਵਿੱਚ ਇੱਕ ਪਸ਼ੂਆਂ ਦੇ ਵਾੜੇ ਵਿੱਚ ਪਿਛਲੇ ਕਈ ਮਹੀਨਿਆਂ ਤੋਂ ਵਾਰ-ਵਾਰ ਇੱਕ ਸੱਪ ਨਜ਼ਰ ਆ ਰਿਹਾ ਸੀ। ਸੱਪ ਦੇ ਲਗਾਤਾਰ ਦਿਖਾਈ ਦੇਣ ਕਾਰਨ ਪਰਿਵਾਰ ਅਤੇ ਆਲੇ-ਦੁਆਲੇ ਦੇ ਪਿੰਡ ਵਾਸੀਆਂ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣਿਆ ਹੋਇਆ ਸੀ। ਪਸ਼ੂਆਂ ਲਈ ਪੱਠੇ ਲੈਣ ਜਾਂਦੇ ਲੋਕਾਂ ਨੂੰ ਵੀ ਅਕਸਰ ਇਹ ਸੱਪ ਦਿਖਾਈ ਦਿੰਦਾ ਸੀ, ਜਿਸ ਕਾਰਨ ਕਿਸੇ ਅਣਹੋਣੀ ਦਾ ਡਰ ਬਣਿਆ ਰਹਿੰਦਾ ਸੀ। ਪਿੰਡ ਵਾਸੀਆਂ ਨੇ ਇਸ ਦੀ ਸੂਚਨਾ ਸਨੇਕ ਰੈਸਕਿਊਰ ਨਵਜੋਤ ਸਿੰਘ ਢਿੱਲੋਂ ਨੂੰ ਦਿੱਤੀ। ਸੂਚਨਾ ਮਿਲਦਿਆਂ ਹੀ ਉਹ ਮੌਕੇ ‘ਤੇ ਪਹੁੰਚੇ ਅਤੇ ਪੂਰੀ ਸਾਵਧਾਨੀ ਨਾਲ ਰੈਸਕਿਊ ਕਰਕੇ ਸੱਪ ਨੂੰ ਸੁਰੱਖਿਅਤ ਕਾਬੂ ਕਰ ਲਿਆ। ਸੱਪ ਦੇ ਸੁਰੱਖਿਅਤ ਰੈਸਕਿਊ ਤੋਂ ਬਾਅਦ ਪਰਿਵਾਰ ਅਤੇ ਪਿੰਡ ਵਾਸੀਆਂ ਨੇ ਸੁੱਖ ਦਾ ਸਾਹ ਲਿਆ। ਨਵਜੋਤ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਫੜਿਆ ਗਿਆ ਸੱਪ ਇੰਡੀਅਨ ਰੈਟ ਸਨੇਕ (ਘੋੜਾ ਪਛਾੜ) ਹੈ, ਜੋ ਕਿ ਜ਼ਹਿਰੀਲਾ ਨਹੀਂ ਹੁੰਦਾ। ਇਹ ਖੇਤਾਂ ਅਤੇ ਪਿੰਡਾਂ ਵਿੱਚ ਚੂਹਿਆਂ ਦੀ ਗਿਣਤੀ ਨੂੰ ਕਾਬੂ ਵਿੱਚ ਰੱਖਣ ਕਰਕੇ ਕਿਸਾਨਾਂ ਲਈ ਬਹੁਤ ਲਾਹੇਵੰਦ ਸਾਬਤ ਹੁੰਦਾ ਹੈ। ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜੇਕਰ ਕਿਤੇ ਸੱਪ ਦਿਖਾਈ ਦੇਵੇ ਤਾਂ ਘਬਰਾਉਣ ਜਾਂ ਉਸ ਨੂੰ ਮਾਰਨ ਦੀ ਕੋਸ਼ਿਸ਼ ਨਾ ਕਰਨ। ਇਸ ਦੀ ਬਜਾਏ ਤੁਰੰਤ ਸਿਖਲਾਈ ਪ੍ਰਾਪਤ ਸਨੇਕ ਰੈਸਕਿਊ ਟੀਮ ਨੂੰ ਸੂਚਨਾ ਦਿੱਤੀ ਜਾਵੇ ਤਾਂ ਜੋ ਸੱਪ ਦਾ ਸੁਰੱਖਿਅਤ ਰੈਸਕਿਊ ਕਰਕੇ ਉਸ ਨੂੰ ਉਸ ਦੇ ਕੁਦਰਤੀ ਜਗ੍ਹਾ ਵਿੱਚ ਛੱਡਿਆ ਜਾ ਸਕੇ। ਰੈਸਕਿਊ ਤੋਂ ਬਾਅਦ ਘੋੜਾ ਪਛਾੜ ਸੱਪ ਨੂੰ ਸੁਰੱਖਿਅਤ ਢੰਗ ਨਾਲ ਬਾਹਰ ਛੱਡ ਦਿੱਤਾ ਗਿਆ।
