ਜਲੰਧਰ, 15 ਮਈ (ਡਾ.ਜਤਿੰਦਰ ਸਾਬੀ) ਸਰਕਾਰੀ ਆਰਟਸ ਅਤੇ ਸਪੋਰਟਸ ਕਾਲਜ ਜਲੰਧਰ ਨੇ 2026-27 ਸੈਸ਼ਨ ਤੋਂ ਦੋ ਨਵੇਂ ਅੰਡਰਗ੍ਰੈਜੁਏਟ ਪੇਸ਼ੇਵਰ ਬੀ.ਸੀ.ਏ+ਐਮ.ਸੀ.ਏ (4+1 ਸਾਲ) ਬੀ.ਕਾਮ+ਐਮ.ਕਾਮ (4+1 ਸਾਲ) ਕੋਰਸ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ | ਇਹ ਜਾਣਕਾਰੀ ਪਿ੍ੰਸੀਪਲ ਡਾ ਰਣਬੀਰ ਸਿੰਘ ਵੱਲੋਂ ਦਿੱਤੀ ਗਈ | ਉਨਾਂ ਦੱਸਿਆ ਕਿ ਇਨ੍ਹਾਂ ਕੋਰਸਾਂ ਦੀ ਸ਼ੁਰੂਆਤ ਇਸ ਸੰਸਥਾ ਲਈ ਇੱਕ ਨਵੀਂ ਪੈੜ ਦੀ ਨਿਸ਼ਾਨਦੇਹੀ ਕਰਦੀ ਹੈ | ਕਾਲਜ ਲੰਬੇ ਸਮੇਂ ਤੋਂ ਖੇਡਾਂ ਖੇਤਰ ਵਿੱਚ ਬੁਲੰਦੀਆਂ ਉੱਪਰ ਰਿਹਾ ਹੈ | ਕਾਲਜ, ਹੁਣ ਮਹਾਰਾਜਾ ਭੁਪਿੰਦਰ ਸਿੰਘ ਪੰਜਾਬ ਸਪੋਰਟਸ ਯੂਨੀਵਰਸਿਟੀ ,ਪਟਿਆਲਾ ਦਾ ਇੱਕ ਸੰਵਿਧਾਨਕ ਕਾਲਜ ਹੈ, ਜੋ ਬੁਨਿਆਦੀ ਢਾਂਚੇ ਅਤੇ ਜ਼ਰੂਰੀ ਸਹੂਲਤਾਂ ਨਾਲ ਲੈਸ ਹੈ | ਕਾਲਜ ਵਿੱਚ ਪਹਿਲਾਂ ਹੀ ਸਿੰਥੈਟਿਕ ਐਥਲੈਟਿਕਸ ਟਰੈਕ, ਬਾਸਕਟਬਾਲ ਕੋਰਟ, ਬੈਡਮਿੰਟਨ ਕੋਰਟ, ਬਾਕਸਿੰਗ ਰਿੰਗ, ਸਵੀਮਿੰਗ ਪੂਲ ਅਤੇ ਜਿਮਨਾਸਟਿਕ ਹਾਲ ਹਨ ਅਤੇ ਪਿਛਲੇ ਦਿਨੀਂ ਅੰਤਰਰਾਸ਼ਟਰੀ ਪੱਧਰ ਦਾ ਹੈਂਡਬਾਲ ਕੋਰਟ ਬਣਕੇ ਤਿਆਰ ਹੋਇਆ ਹੈ | ਵਿਦਿਆਰਥੀਆਂ ਦੀ ਵਰਤੋਂ ਲਈ ਟੈਕਨੋਉਪਕਰਣਾਂ ਵਾਲਾ ਜਿਮ, ਕੰਪਿਊਟਰ ਲੈਬ, ਐਨਾਟੋਮੀ ਅਤੇ ਫਿਜ਼ੀਓਲੋਜੀ ਲੈਬ ਅਤੇ ਵਿਦਿਆਰਥੀਆਂ ਦੀ ਵਰਤੋਂ ਲਈ ਇੱਕ ਏਅਰ ਕੰਡੀਸ਼ਨਡ ਲਾਇਬ੍ਰੇਰੀ ਹੈ | ਕਾਲਜ ਵਿਖੇ ਸਮਾਰਟ ਕਲਾਸਰੂਮ, ਈ-ਪੋਡੀਅਮ, ਪ੍ਰੋਜੈਕਟਰ ਅਤੇ ਹੋਰ ਸਮਾਰਟ ਡਿਵਾਈਸਾਂ ਨਾਲ ਪੜ੍ਹਾਉਣ ਦੀ ਸਹੂਲਤ ਹੈ | ਇਹ ਧਿਆਨ ਦੇਣ ਯੋਗ ਹੈ ਕਿ ਵਿਦਿਆਰਥੀ ਇਹਨਾਂ ਸਾਰੀਆਂ ਅੰਤਰਰਾਸ਼ਟਰੀ ਮਿਆਰੀ ਸਹੂਲਤਾਂ ਨੂੰ ਨਾਮਾਤਰ ਕਾਲਜ ਫੀਸ ਅਤੇ ਬਿਨਾਂ ਕਿਸੇ ਵਾਧੂ ਕੀਮਤ 'ਤੇ ਪ੍ਰਾਪਤ ਕਰ ਸਕਦੇ ਹਨ | ਐਸ.ਸੀ ਵਿਦਿਆਰਥੀਆਂ ਅਤੇ ਰਾਸ਼ਟਰੀ ਅਤੇ ਰਾਜ ਤਗਮਾ ਜੇਤੂਆਂ ਲਈ ਸਕਾਲਰਸ਼ਿਪ ਉਪਲਬਧ ਹਨ | ਪਿ੍ੰਸੀਪਲ ਡਾ. ਰਣਬੀਰ ਸਿੰਘ ਨੇ ਅੱਗੇ ਕਿਹਾ ਕਿ ਕਾਲਜ ਆਪਣੇ 30 ਏਕੜ ਤੋਂ ਵੱਧ ਹਰੇ-ਭਰੇ ਕੈਂਪਸ ਅਤੇ ਅੰਤਰਰਾਸ਼ਟਰੀ-ਮਿਆਰੀ ਖੇਡ ਦੇ ਮੈਦਾਨਾਂ ਕਰਕੇ ਆਪਣੀ ਵਿਲੱਖਣ ਪਛਾਣ ਰੱਖਦਾ ਹੈ | ਕਾਲਜ ਪਹਿਲਾਂ ਹੀ ਬੀ.ਏ., ਬੀ.ਪੀ.ਈ.ਐਸ., ਯੋਗਾ ਵਿੱਚ ਪੀ.ਜੀ. ਡਿਪਲੋਮਾ ਅਤੇ ਐਮ.ਐਸ.ਸੀ. (ਯੋਗਾ) ਵਰਗੇ ਪ੍ਰੋਗਰਾਮ ਸਥਾਪਤ ਕਰ ਚੁੱਕਾ ਹੈ ਜੋ ਕਾਲਜ ਦੇ ਵਿਦਿਆਰਥੀਆਂ ਦੁਆਰਾ ਯੂਨੀਵਰਸਿਟੀ ਪੱਧਰ ਦੀਆਂ ਪ੍ਰੀਖਿਆਵਾਂ ਵਿੱਚ ਮੈਰਿਟ ਪ੍ਰਾਪਤ ਕਰਨ ਦੇ ਨਾਲ ਸਫਲਤਾਪੂਰਵਕ ਚੱਲ ਰਹੇ ਹਨ | ਬੀਸੀਏ+ਐਮਸੀਏ (4+1 ਸਾਲ) ਅਤੇ ਬੀ.ਕਾਮ+ਐਮ.ਕਾਮ (4+1 ਸਾਲ) ਵਰਗੇ ਕੋਰਸ ਵਿਦਿਆਰਥੀਆਂ ਲਈ ਬਹੁਤ ਲਾਹੇਵੰਦ ਸਾਬਤ ਹੋਣਗੇ | ਉਨ੍ਹਾਂ ਅੱਗੇ ਕਿਹਾ ਕਿ ਕਾਲਜ ਦੇ ਸਾਰੇ ਕੋਰਸ ਨਵੀਂ ਸਿੱਖਿਆ ਨੀਤੀ 2020 ਦੇ ਅਨੁਸਾਰ ਹਨ |
