ਟਿਊਬਵੈੱਲ ਬਿੱਲਾਂ ਦਾ ਪਾਵਰਕਾਮ ਨੇ ਨਗਰ ਨਿਗਮ ਤੋਂ ਮੰਗਿਆ 36 ਕਰੋੜ

ਅ

ਅਜੀਤ ਡੈਸਕ 22-05-2026

ਜਲੰਧਰ, 21 ਮਈ (ਸ਼ਿਵ)- ਸ਼ਹਿਰ ਦੀਆਂ 1 ਲੱਖ ਦੇ ਕਰੀਬ ਸਟਰੀਟ ਲਾਈਟਾਂ ਤੇ ਟਿਊਬਵੈੱਲਾਂ ਦੇ ਬਿੱਲਾਂ ਦੀ ਅਦਾਇਗੀ ਨੂੰ ਲੈ ਕੇ ਰੇੜਕਾ ਸ਼ੁਰੂ ਹੋ ਗਿਆ ਹੈ ਤੇ ਜੇਕਰ ਇਸ ਬਾਰੇ ਬਿੱਲਾਂ ਦੀ ਅਦਾਇਗੀ ਸਮੇਂ ਸਿਰ ਨਹੀਂ ਹੁੰਦੀ ਤਾਂ ਇਸ ਨਾਲ ਸ਼ਹਿਰ ਦੀਆਂ ਲਾਈਟਾਂ ਤੇ ਟਿਊਬਵੈੱਲਾਂ ਦੇ ਬੰਦ ਹੋਣ ਦੀ ਸ਼ੰਕਾ ਜ਼ਾਹਿਰ ਕੀਤੀ ਜਾ ਰਹੀ ਹੈ | ਮਾਮਲਾ ਸ਼ਹਿਰ ਵਿਚ ਨਿਗਮ ਦੇ ਚੱਲਦੇ 700 ਟਿਊਬਵੈੱਲਾਂ ਦੀ ਬਿੱਲਾਂ ਦੀ ਅਦਾਇਗੀ ਨੂੰ ਲੈ ਕੇ ਖੜ੍ਹਾ ਹੋ ਗਿਆ ਹੈ ਕਿਉਂਕਿ ਇਕ ਪਾਸੇ ਪਾਵਰਕਾਮ ਨੇ ਟਿਊਬਵੈੱਲਾਂ ਦੇ ਬਿੱਲਾਂ ਦੀ ਬਕਾਇਆ ਪਈ ਅਦਾਇਗੀ ਜਿਹੜੀ ਕਿ ਕਰੀਬ 36 ਕਰੋੜ ਰੁਪਏ ਦੇ ਕਰੀਬ ਬਣਦੀ ਹੈ, ਉਸ ਦੀ ਵਸੂਲੀ ਕਰਨ ਲਈ ਨਗਰ ਨਿਗਮ ਨੂੰ ਕਿਹਾ ਹੈ ਪਰ ਦੂਜੇ ਪਾਸੇ ਨਗਰ ਨਿਗਮ ਵਲੋਂ ਇਸ ਵਸੂਲੀ ਨੂੰ ਦੇਣ ਤੋਂ ਸਪਸ਼ਟ ਨਾਂਹ ਕਰ ਦਿੱਤੀ ਹੈ ਕਿ ਜਿਹੜੇ ਟਿਊਬਵੈੱਲਾਂ ਦੇ ਬਿੱਲਾਂ ਦੀ ਅਦਾਇਗੀ ਹੈ, ਉਹ ਨਗਰ ਨਿਗਮ ਨਹੀਂ ਸਗੋਂ ਸਰਕਾਰ ਵਲੋਂ ਕੀਤੀ ਜਾਂਦੀ ਹੈ | ਫ਼ਿਲਹਾਲ ਮਾਮਲੇ ਨੂੰ ਲੈ ਕੇ ਨਵਾਂ ਰੇੜਕਾ ਸ਼ੁਰੂ ਹੋ ਗਿਆ ਹੈ ਤੇ ਇਸ ਮਾਮਲੇ ਵਿਚ ਨਗਰ ਨਿਗਮ ਅਤੇ ਪਾਵਰਕਾਮ ਵਿਚਕਾਰ ਸਿੰਗ ਫਸ ਗਏ ਹਨ | ਪੰਜਾਬ ਸਰਕਾਰ ਨੇ ਕੁੱਝ ਸਮਾਂ ਪਹਿਲਾਂ ਸਾਰੇ ਸਰਕਾਰੀ ਵਿਭਾਗ ਦੇ ਪ੍ਰੀ-ਪੇਡ ਬਿਜਲੀ ਦੇ ਮੀਟਰ ਲਗਾਉਣ ਦੀ ਹਦਾਇਤ ਦਿੱਤੀ ਸੀ ਤਾਂ ਪਾਵਰਕਾਮ ਵਲੋਂ ਸਰਕਾਰੀ ਹਸਪਤਾਲਾਂ ਨੂੰ ਛੱਡ ਕੇ ਸਾਰੇ ਸਰਕਾਰੀ ਵਿਭਾਗਾਂ ਦੇ ਕਰੀਬ 40 ਹਜ਼ਾਰ ਬਿਜਲੀ ਮੀਟਰ ਲਗਾ ਦਿੱਤੇ ਗਏ ਸਨ | ਜਲੰਧਰ ਵਿਚ ਵੀ ਪਾਵਰਕਾਮ ਵਲੋਂ ਸਟਰੀਟ ਲਾਈਟਾਂ ਅਤੇ ਟਿਊਬਵੈੱਲਾਂ ਦੀ ਬਿਜਲੀ ਸਪਲਾਈ ਲਈ ਪ੍ਰੀ-ਪੇਡ ਬਿਜਲੀ ਮੀਟਰ ਲਗਾ ਦਿੱਤੇ ਸਨ | ਪਾਵਰਕਾਮ ਹੁਣ ਤੱਕ ਸਟਰੀਟ ਲਾਈਟਾਂ ਅਤੇ ਹੋਰ ਬਿੱਲਾਂ ਦੀ ਸਪਲਾਈ ਵਸੂਲ ਕੀਤੇ ਜਾਂਦੇ ਮਿਉਂਸਪਲ ਟੈਕਸ ਅਤੇ ਗਊ ਟੈਕਸ ਵਿਚੋਂ ਐਡਜਸਟ ਕਰ ਲੈਂਦਾ ਸੀ | ਪਾਵਰਕਾਮ ਨੇ ਖਪਤਕਾਰਾਂ ਤੋਂ ਮਿਉਂਸਪਲ ਟੈਕਸ ਅਤੇ ਗਊ ਟੈਕਸ ਵਸੂਲ ਕੇ ਨਿਗਮਾਂ ਨੂੰ ਦੇਣੇ ਹੁੰਦੇ ਹਨ ਪਰ ਇਹ ਰਕਮ ਬਿਜਲੀ ਬਿੱਲਾਂ ਵਿਚ ਐਡਜਸਟ ਕਰ ਲਈ ਜਾਂਦੀ ਹੈ | ਹੁਣ ਜਦੋਂ ਕਿ ਬਿਜਲੀ ਦੇ ਪ੍ਰੀ-ਪੇਡ ਮੀਟਰ ਸਟਰੀਟ ਲਾਈਟਾਂ ਤੇ ਟਿਊਬਵੈੱਲਾਂ ਦੇ ਉੱਪਰ ਲੱਗ ਗਏ ਹਨ ਤਾਂ ਨਿਗਮ ਨੂੰ ਹੁਣ ਆਪਣੀ ਪੇਸ਼ਗੀ ਅਦਾਇਗੀ ਕਰਨੀ ਪਵੇਗੀ | ਉਂਝ ਟਿਊਬਵੈੱਲਾਂ ਦੇ ਬਿੱਲਾਂ ਬਾਰੇ ਜੇਕਰ ਫ਼ੈਸਲਾ ਹੋ ਜਾਂਦਾ ਹੈ ਤਾਂ ਸਟਰੀਟ ਲਾਈਟ ਦੇ ਬਿੱਲਾਂ ਦੀ ਅਦਾਇਗੀ ਕਰਨੀ ਪਵੇਗੀ | ਦੱਸਿਆ ਜਾਂਦਾ ਹੈ ਕਿ ਅੱਜ ਵਿਭਾਗੀ ਅਫ਼ਸਰ ਵਲੋਂ ਮੇਅਰ ਵਨੀਤ ਧੀਰ ਨਾਲ ਮੁਲਾਕਾਤ ਕਰਕੇ ਉਨਾਂ ਦੇ ਧਿਆਨ ਵਿਚ ਇਹ ਮਾਮਲਾ ਲਿਆਂਦਾ ਗਿਆ ਕਿ ਪਾਵਰਕਾਮ ਵਲੋਂ ਇਨ੍ਹਾਂ ਬਿੱਲਾਂ ਦੀ ਕਰੀਬ 36 ਕਰੋੜ ਦੀ ਵਸੂਲੀ ਕੱਢੀ ਗਈ ਹੈ | ਜੇਕਰ ਇਸ ਬਾਰੇ ਫ਼ੈਸਲਾ ਨਾ ਕੀਤਾ ਗਿਆ ਤਾਂ ਆਉਣ ਵਾਲੇ ਸਮੇਂ ਵਿਚ ਸਟਰੀਟ ਲਾਈਟਾਂ ਅਤੇ ਟਿਊਬਵੈੱਲ ਬੰਦ ਹੋ ਸਕਦੇ ਹਨ ਤਾਂ ਜੇਕਰ ਟਿਊਬਵੈੱਲ ਬੰਦ ਹੋ ਗਏ ਤਾਂ ਪਾਣੀ ਸੰਕਟ ਆ ਸਕਦਾ ਹੈ | ਵਿਭਾਗੀ ਅਫ਼ਸਰ ਨੇ ਇਸ ਮਾਮਲੇ ਨੂੰ ਵਿਭਾਗੀ ਮੰਤਰੀ ਕੋਲ ਉਠਾਉਣ ਦੀ ਵੀ ਅਪੀਲ ਕੀਤੀ |
ਉਧਰ ਮੇਅਰ ਵਨੀਤ ਧੀਰ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨਾਂ ਦੱਸਿਆ ਕਿ ਪੰਜਾਬ ਸਰਕਾਰ ਨੇ 2021 ਵਿਚ ਫ਼ੈਸਲਾ ਕਰ ਦਿੱਤਾ ਸੀ ਕਿ ਟਿਊਬਵੈੱਲਾਂ ਦੇ ਬਿੱਲਾਂ ਦੀ ਅਦਾਇਗੀ ਨਗਰ ਨਿਗਮਾਂ ਨਹੀਂ ਕਰਨਗੀਆਂ ਸਗੋਂ ਇਨ੍ਹਾਂ ਬਿੱਲਾਂ ਦੀ ਅਦਾਇਗੀ ਸਰਕਾਰ ਕਰੇਗੀ | ਸ੍ਰੀ ਧੀਰ ਨੇ ਕਿਹਾ ਕਿ ਉਹ ਇਸ ਦੀ ਅਦਾਇਗੀ ਨਹੀਂ ਕਰਨਗੇ | ਸ਼ਾਮ ਨੂੰ ਨਿਗਮ ਕਮਿਸ਼ਨਰ ਸੰਦੀਪ ਰਿਸ਼ੀ ਨੇ ਸਥਾਨਕ ਸਰਕਾਰਾਂ ਵਿਭਾਗ ਦੇ ਡਾਇਰੈਕਟਰ ਨੂੰ ਇਕ ਚਿੱਠੀ ਲਿਖ ਕੇ ਇਸ ਬਾਰੇ ਮਸਲਾ ਉਠਾ ਕੇ ਇਸ ਨੂੰ ਹੱਲ ਕਰਵਾਉਣ ਦੀ ਸਿਫ਼ਾਰਸ਼ ਕੀਤੀ ਹੈ |

ਟਿਊਬਵੈੱਲ ਬਿੱਲਾਂ ਦਾ ਪਾਵਰਕਾਮ ਨੇ ਨਗਰ ਨਿਗਮ ਤੋਂ ਮੰਗਿਆ 36 ਕਰੋੜ

ਸੰਬੰਧਿਤ ਖ਼ਬਰਾਂ