ਲਾਂਬੜਾ, 4 ਜੁਲਾਈ (ਗੁਰਮੇਲ ਸਿੰਘ)-ਬੀਤੀ ਰਾਤ ਥਾਣਾ ਲਾਂਬੜਾ ਦੇ ਅਧੀਨ ਆਉਂਦੇ ਪਿੰਡ ਲੱਲੀਆਂ ਖੁਰਦ ਵਿਚ 3 ਘਰਾਂ ਦੇ 6 ਪਸ਼ੂ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਸੰਬੰਧੀ ਪੀੜਤ ਕਿਸਾਨ ਨਰਿੰਦਰ ਸਿੰਘ ਪੁੱਤਰ ਜਗੀਰ ਸਿੰਘ ਵਾਸੀ ਪਿੰਡ ਲੱਲੀਆਂ ਖੁਰਦ ਨੇ ਦੱਸਿਆ ਰਾਤ ਕਰੀਬ 8 ਵਜੇ ਉਹ ਆਪਣੇ ਪਸ਼ੂ ਰੋਜਾਨਾ ਦੀ ਤਰ੍ਹਾਂ ਹਵੇਲੀ ਦੇ ਨੇੜੇ ਬਣ ਕੇ ਘਰ ਚਲੇ ਗਏ। ਉਨ੍ਹਾਂ ਦੇ ਪਸ਼ੂ ਚੋਰੀ ਹੋਣ ਦੀ ਜਾਣਕਾਰੀ ਤੜਕੇ ਸਵੇਰੇ 4 ਵਜੇ ਮਿਲੀ। ਕਿਸਾਨ ਨਰਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੀ ਹਵੇਲੀ ਦੇ ਨੇੜੇ ਹੀ ਕਿਸਾਨ ਅਮਨਦੀਪ ਸਿੰਘ ਦਾ ਖੂਹ ਹੈ। ਉਨ੍ਹਾਂ ਦੇ ਖੂਹ ’ਤੇ ਪ੍ਰਵਾਸੀ ਮਜ਼ਦੂਰ ਰਾਜੂ ਰਹਿੰਦਾ ਹੈ। ਪ੍ਰਵਾਸੀ ਮਜ਼ਦੂਰ ਰਾਜੂ ਵਲੋਂ ਉਨ੍ਹਾਂ ਨੂੰ ਦਿੱਤੀ ਜਾਣਕਾਰੀ ਅਨੁਸਾਰ ਰਾਤ ਕਰੀਬ 2 ਵਜੇ 5-6 ਬੰਦਿਆਂ ਨੇ ਆਣ ਕੇ ਮੈਨੂੰ ਜਬਰਦਸਤੀ ਉਠਾਇਆ ਤੇ ਉਨ੍ਹਾਂ ਕੋਲ ਇਕ ਰਿਵਾਲਵਰ ਤੇ ਤੇਜ਼ਧਾਰ ਹਥਿਆਰ ਦੀ ਨੋਕ ’ਤੇ ਮੇਰੇ ਨਾਲ ਕੁੱਟਮਾਰ ਕੀਤੀ ਤੇ ਮੈਨੂੰ ਰੱਸੀ ਨਾਲ ਬੰਨ ਦਿੱਤਾ। ਲੁਟੇਰੇ ਇਸ ਖੂਹ ਤੋਂ ਇਕ ਗਾਂ ਆਪਣੇ ਨਾਲ ਲੈ ਗਏ। ਇਸੇ ਤਰ੍ਹਾਂ ਉਸ ਤੋਂ ਦੂਜੇ ਪਾਸੇ ਨਰਿੰਦਰ ਸਿੰਘ ਦੇ ਖੂਹ ’ਤੇ ਉਨ੍ਹਾਂ ਦੇ ਪਸ਼ੂਆਂ ਵਿਚੋਂ ਇਕ ਮੱਝ, ਇਕ ਝੋਟੀ, ਇਕ ਕੱਟੀ ਲੁਟੇਰੇ ਆਪਣੇ ਨਾਲ ਲੈ ਕੇ ਇਸੇ ਤਰ੍ਹਾਂ ਇਨ੍ਹਾਂ ਦੇ ਨਜ਼ਦੀਕ ਕਿਸਾਨ ਮਲਕੀਤ ਸਿੰਘ ਦੇ ਖੂਹ ਤੋਂ ਇਕ ਮੱਝ ਤੇ ਇਕ ਕੱਟੀ ਵੀ ਖੋਲ੍ਹ ਕੇ ਆਪਣੇ ਨਾਲ ਕਿਸੇ ਵਾਨ ਰਾਹੀਂ ਲੈ ਗਏ। ਕਿਸਾਨ ਨਰਿੰਦਰ ਸਿੰਘ ਨੇ ਦੱਸਿਆ ਕਿ ਮਜ਼ਦੂਰ ਰਾਜੂ ਨੇ ਤੜਕੇ ਕਰੀਬ 4 ਵਜੇ ਕਿਸ ਤਰ੍ਹਾਂ ਆਪਣੇ ਆਪ ਨੂੰ ਖੋਲ੍ਹ ਕੇ ਇਸ ਵਾਰਦਾਤ ਦੀ ਸੂਚਨਾ ਕਿਸਾਨਾਂ ਨੂੰ ਦਿੱਤੀ। ਇਸ ਸੰਬੰਧੀ ਪਿੰਡ ਦੇ ਸਰਪੰਚ ਜਗਜੀਤ ਸਿੰਘ ਨੇ ਆਖਿਆ ਕਿ ਪ੍ਰਸ਼ਾਸਨ ਨੂੰ ਰਾਤ ਸਮੇਂ ਵੀ ਨਾਕੇ ਲਗਾਉਣਾ ਚਾਹੀਦੇ ਹਨ। ਕਿਸਾਨਾਂ ਵਲੋਂ ਇਸ ਵਾਰਦਾਤ ਦੀ ਸੂਚਨਾ ਲਾਭੜਾ ਪੁਲਿਸ ਨੂੰ ਦੇ ਦਿੱਤੀ ਗਈ ਸੀ।
