ਲੋਹੀਆਂ ਖਾਸ, 4 ਜੁਲਾਈ (ਗੁਰਪਾਲ ਸਿੰਘ ਸ਼ਤਾਬਗੜ੍ਹ, ਕੁਲਦੀਪ ਸਿੰਘ ਖਾਲਸਾ)-ਲੋਹੀਆਂ ਇਲਾਕੇ ’ਚ ਚੋਰ ਲੁਟੇਰੇ ਇਸ ਕਦਰ ਬੇਖੌਫ਼ ਨਜ਼ਰ ਆ ਰਹੇ ਹਨ ਕਿ ਜਿਵੇਂ ਉਨ੍ਹਾਂ ਨੂੰ ਕਿਸੇ ‘ਕਾਨੂੰਨ’ ਦਾ ਪ੍ਰਵਾਹ ਹੀ ਨਾ ਹੋਵੇ, ਨਵਾਂ ਪਿੰਡ ਦੋਨੇਵਾਲ ’ਚ ਚੋਰਾਂ ਵਲੋਂ ਐਸੀ ਹੀ ਇਕ ਚੋਰੀ ਦੀ ਘਟਨਾ ਨੂੰ ਅਜ਼ਾਮ ਦਿੱਤਾ ਗਿਆ ਹੈ, ਕਿ ਚੋਰਾਂ ਨੇ ਬੜੇ ਆਰਾਮ ਨਾਲ ਦਿਨ ਦੇ ਦੁਪਹਿਰੇ ਇਕ ਹਵੇਲੀ ਦਾ ਜਿੰਦਰਾ ਭੰਨ ਕੇ ਅੰਦਰ ਦਾਖਲ ਹੁੰਦੇ ਹੋਏ ਹਵੇਲੀ ’ਚ ਖੜ੍ਹੇ ਵੱਡੇ ਜਨਰੇਟਰ ਦੀ ਮੋਟਰ ’ਚੋਂ ਤਾਂਬੇ ਦੀਆਂ ਕਵਾਇਲਾਂ ਸਮੇਤ ਉਸ ਦਾ ਹੋਰ ਕੀਮਤੀ ਸਮਾਨ ਲੈ ਗਏ ਹਨ| ਪੁਲਿਸ ਥਾਣਾ ਲੋਹੀਆਂ ਵਿਖੇ ਆਪਣੀ ਸ਼ਿਕਾਇਤ ਦਿੰਦਿਆਂ ਗੁਰਜਿੰਦਰ ਸਿੰਘ ਪੁੱਤਰ ਗੁਲਜ਼ਾਰ ਸਿੰਘ ਵਾਸੀ ਨਵਾਂ ਪਿੰਡ ਦੋਨੇਵਾਲ ਨੇ ਦੱਸਿਆ ਕਿ ਇਸ ਚੋਰੀ ਸੰਬੰਧੀ ਜਦੋਂ ਸੀ. ਸੀ. ਟੀ. ਵੀ. ਕੈਮਰਿਆਂ ’ਚ ਦੇਖਿਆ ਤਾਂ ਸਿਰਾਂ ਤੋਂ ਮੋਨੇ ਦੋ ਵਿਅਕਤੀ ਚੋਰੀ ਕਰਨ ਆਏ, ਜਿਨ੍ਹਾਂ ਨੇ ਸਿਰ ’ਤੇ ਪਰਨੇ ਬੰਨੇ ਹੋਏ ਸਨ| ਉਨ੍ਹਾਂ ਕਿਹਾ ਕਿ ਪੁਲਿਸ ਨੂੰ ਚੋਰਾਂ ਦਾ ਹੁਲੀਆ ਅਤੇ ਅੰਦਾਜਨ ਪਤਾ ਵੀ ਦੱਸ ਦਿੱਤਾ ਗਿਆ ਹੈ, ਦੇਖਦੇ ਹਾਂ ਕਿ ਪੁਲਿਸ ਨੂੰ ਸਫ਼ਲਤਾ ਹੱਥ ਲੱਗਦੀ ਹੈ ਜਾਂ ਨਹੀਂ| ਇਸ ਸੰਬੰਧੀ ਥਾਣਾ ਲੋਹੀਆਂ ਦੇ ਮੁਖੀ ਸੁਖਜਿੰਦਰ ਸਿੰਘ ਖੈਹਿਰਾ ਨੇ ਕਿਹਾ ਕਿ ਸਾਨੂੰ ਸੂਚਨਾ ਮਿਲ ਗਈ ਹੈ ਤੇ ਜਲਦੀ ਹੀ ਚੋਰਾਂ ਨੂੰ ਗ੍ਰਿਫ਼ਤ ’ਚ ਲਿਆ ਕੇ ਜੇਲ ਦੀ ਹਵਾ ਖਵਾਈ ਜਾਵੇਗੀ|
