ਜਲੰਧਰ, 15 ਜੁਲਾਈ (ਐੱਮ. ਐੱਸ. ਲੋਹੀਆ) - ਸਥਾਨਕ ਕਪੂਰਥਲਾ ਚੌਕ ਨੇੜੇ ਚੱਲ ਰਹੇ ਪਸਰੀਚਾ ਹਸਪਤਾਲ ਨੇ ‘ਵਿਸ਼ਵ ਪਲਾਸਟਿਕ ਸਰਜਰੀ ਦਿਵਸ’ ਦੇ ਨਾਲ-ਨਾਲ ਆਪਣਾ ਸਥਾਪਨਾ ਦਿਵਸ ਵੀ ਮਨਾਇਆ। ਇਸ ਸਬੰਧੀ ਕਰਵਾਏ ਇਕ ਸਮਾਗਮ ਦੌਰਾਨ ਹਸਪਤਾਲ ਦੇ ਸੰਸਥਾਪਕ ਸਵਰਗੀ ਡਾ. ਕੇ. ਕੇ. ਪਸਰੀਚਾ ਦਾ ਜਨਮ ਦਿਨ ਮਨਾਉਂਦੇ ਹੋਏ ਹਸਪਤਾਲ ਦੇ ਪ੍ਰਬੰਧਕ ਡਾ. ਪੁਨੀਤ ਪਸਰੀਚਾ ਨੇ ਦੱਸਿਆ ਕਿ ਡਾ. ਕੇ. ਕੇ. ਪਸਰੀਚਾ ਪੰਜਾਬ ਦੇ ਪਹਿਲੇ ਮੈਡੀਕਲ ਸਪੈਸ਼ਲਿਸਟ ਸਨ। ਡਾ. ਪੁਨੀਤ ਪਸਰੀਚਾ ਅਤੇ ਡਾ. ਸੀਮਾ ਪਸਰੀਚਾ ਨੇ ਕਿਹਾ ਕਿ ਹਸਪਤਾਲ ਆਪਣੇ ਸੰਸਥਾਪਕ ਦੇ ਸੇਵਾ ਅਤੇ ਉੱਤਮਤਾ ਦੇ ਸਿਧਾਂਤਾਂ ਦੀ ਪਾਲਣਾ ਕਰਦਾ ਹੋਇਆ ਮਰੀਜ਼ਾਂ ਨੂੰ ਬੇਹਤਰ ਇਲਾਜ ਸਹੂਲਤਾਂ ਮੁਹੱਈਆ ਕਰ ਰਿਹਾ ਹੈ। ਨਿਊਰੋਸਰਜਨ ਡਾ. ਪੌਰੁਸ਼ ਪਸਰੀਚਾ ਨੇ ਇਸ ਮੌਕੇ ਆਪਣੇ ਦਾਦਾ ਜੀ ਨੂੰ ਸ਼ਰਧਾਂਜਲੀ ਭੇਟ ਕੀਤੀ ਅਤੇ ਹਸਪਤਾਲ ਦੇ ਨਿਊਰੋਸਰਜਰੀ ਵਿਭਾਗ ਦੀਆਂ ਪ੍ਰਾਪਤੀਆਂ ‘ਤੇ ਚਾਨਣਾ ਪਾਇਆ। ਪਲਾਸਟਿਕ ਸਰਜਨ ਡਾ. ਆਰੂਸ਼ ਪਸਰੀਚਾ ਨੇ ਕਿਹਾ ਕਿ ਪਲਾਸਟਿਕ ਸਰਜਰੀ ਦੀਆਂ ਜੜ੍ਹਾਂ ਭਾਰਤ ’ਚ ਹਨ। ਉਨ੍ਹਾਂ ਦੱਸਿਆ ਕਿ ਇਤਿਹਾਸ ਦੇ ਪਹਿਲੇ ਪਲਾਸਟਿਕ ਸਰਜਨ, ਮਹਾਂਰਿਸ਼ੀ ਸੁਸ਼ਰੁਤ ਨੇ ਲਗਭਗ 2,500 ਸਾਲ ਪਹਿਲਾਂ ਭਾਰਤ ’ਚ ਇਸ ਵਿਦਿਆ ਦਾ ਅਭਿਆਸ ਕਰਨਾ ਸ਼ੁਰੂ ਕੀਤਾ ਸੀ। ਪਲਾਸਟਿਕ ਸਰਜਰੀ ਕਿਵੇਂ ਜੀਵਨ ਨੂੰ ਬਦਲਦੀ ਹੈ, ਇਸ ਬਾਰੇ ਦੱਸਦੇ ਹੋਏ ਉਨ੍ਹਾਂ ਕਿਹਾ ਕਿ ਇਹ ਸਰਜਰੀ ਨਾਲ ਜਲਣ ਪੀੜਤਾਂ, ਫਟੇ ਹੋਏ ਬੁੱਲ੍ਹਾਂ, ਤਾਲੂ ਦੇ ਮਰੀਜ਼ਾਂ ਅਤੇ ਹੱਥਾਂ ਦੀਆਂ ਸੱਟਾਂ ਦਾ ਇਲਾਜ ਕਰਕੇ ਲੋਕਾਂ ਦੇ ਆਤਮ-ਵਿਸ਼ਵਾਸ ਨੂੰ ਵਧਾਉਂਦੀ ਹੈ। ਸਮਾਗਮ ਦੇ ਅੰਤ ’ਚ, ਡਾ. ਪੁਨੀਤ ਪਸਰੀਚਾ ਅਤੇ ਡਾ. ਸੀਮਾ ਪਸਰੀਚਾ ਨੇ ਹਸਪਤਾਲ ਦੇ ਸੀਨੀਅਰ ਸਟਾਫ਼ ਦਾ ਸਨਮਾਨ ਕੀਤਾ ਅਤੇ ਹਸਪਤਾਲ ’ਚ ਇਲਾਜ ਅਧੀਨ ਛੋਟੇ ਬੱਚਿਆਂ ਨੂੰ ਸਕੂਲ ਬੈਗ ਵੰਡੇ।
