ਜਲੰਧਰ, 31 ਜੁਲਾਈ (ਐੱਮ.ਐੱਸ. ਲੋਹੀਆ)- ਨੈਸ਼ਨਲ ਇੰਟੀਗ੍ਰੇਟੇਡ ਮੈਡੀਕਲ ਐਸੋਸੀਏਸ਼ਨ (ਨੀਮਾ) ਫੀਮੇਲ ਫੋਰਮ ਦੀ ਮੀਟਿੰਗ ਡਾ. ਰੀਨਾ ਕੱਕੜ ਦੀ ਪ੍ਰਧਾਨਗੀ ਹੇਠ ਹੋਈ, ਜਿਸ ਦੌਰਾਨ ਬਤੌਰ ਮੁੱਖ ਬੁਲਾਰੇ ਵਜੋਂ ਪ੍ਰਸਿੱਧ ਗਾਇਨੀਕੋਲੋਜਿਸਟ ਡਾ. ਸ਼ੈਲ ਕੌਰ ਅਤੇ ਬਤੌਰ ਮੁੱਖ ਮਹਿਮਾਨ ਡੀ.ਏ.ਵੀ. ਆਯੁਰਵੈਦਿਕ ਕਾਲਜ ਦੀ ਪ੍ਰਿੰਸੀਪਲ ਡਾ. ਰਜਨੀ ਠਾਕੁਰ ਨੇ ਸ਼ਿਰਕਤ ਕੀਤੀ। ਨੀਮਾ ਦੀਆਂ ਮੈਂਬਰ ਮਹਿਲਾ ਡਾਕਟਰਾਂ ਨੂੰ ਡਾ. ਸ਼ੈਲ ਕੌਰ ਨੇ ਬੱਚੇਦਾਨੀ ਦੀ ਸੋਜਸ਼ ਅਤੇ ਬੱਚੇਦਾਨੀ ਦੇ ਫਾਈਬ੍ਰਾਇਡਜ਼ ਬਾਰੇ ਵਿਸਥਾਰਪੂਰਵਕ ਜਾਣਕਾਰੀ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਇਹ ਉਹ ਬਿਮਾਰੀਆਂ ਹਨ, ਜੋ ਅਣਵਿਆਹੀਆਂ ਕੁੜੀਆਂ ਤੋਂ ਲੈ ਕੇ ਮੱਧ-ਉਮਰ ਦੀਆਂ ਔਰਤਾਂ ਤੱਕ, ਕਿਸੇ ਨੂੰ ਵੀ ਪ੍ਰਭਾਵਿਤ ਕਰ ਸਕਦੀਆਂ ਹਨ। ਇਹ ਸਮੱਸਿਆਵਾਂ ਮਾਂਹਵਾਰੀ ਦੌਰਾਨ ਗੰਭੀਰ ਦਰਦ ਦਾ ਕਾਰਨ ਬਣ ਸਕਦੀਆਂ ਹਨ। ਕੁੜੀਆਂ ਦੇ ਸਰੀਰ ’ਚ ਵਿਕਾਸ ਸੰਬੰਧੀ ਤਬਦੀਲੀਆਂ ਅਤੇ ਖਾਣ-ਪੀਣ ਦੀਆਂ ਮਾੜੀਆਂ ਆਦਤਾਂ ਵੀ ਇਸ ਸਥਿਤੀ ਨੂੰ ਪ੍ਰਭਾਵਤ ਕਰਦੀਆਂ ਹਨ। ਇਸ ਸਥਿਤੀ ਨੂੰ ਅਕਸਰ ਪੇਂਡੂ ਨਿਵਾਸੀਆਂ ਜਾਂ ਰੂੜੀਵਾਦੀ ਵਿਸ਼ਵਾਸਾਂ ਵਾਲੇ ਲੋਕਾਂ ਦੁਆਰਾ ਨਜ਼ਰਅੰਦਾਜ਼ ਕੀਤਾ ਜਾਂਦਾ ਹੈ, ਇਹ ਮੰਨਦੇ ਹੋਏ ਕਿ ਇਹ ਬਹੁਤ ਆਮ ਹੈ। ਉਨ੍ਹਾਂ ਕਿਹਾ ਕਿ ਇਹ ਯਕੀਨੀ ਬਣਾਉਣ ਲਈ ਕਿ ਔਰਤਾਂ ਨੂੰ ਬਹੁਤ ਜ਼ਿਆਦਾ ਦੁੱਖ ਨਾ ਹੋਵੇ, ਡਾਕਟਰ ਨਾਲ ਸਮੇਂ ਸਿਰ ਸਲਾਹ-ਮਸ਼ਵਰਾ ਜ਼ਰੂਰੀ ਹੈ। ਡਾ. ਰਜਨੀ ਠਾਕੁਰ ਨੇ ਇਸ ਸਥਿਤੀ ਲਈ ਆਯੁਰਵੈਦਿਕ ਇਲਾਜ ਬਾਰੇ ਦੱਸਿਆ। ਉਪਰੰਤ ਡਾ. ਰੀਨਾ ਕੱਕੜ ਨੇ ਸਾਰੇ ਮੈਂਬਰਾਂ ਨੂੰ 1 ਅਗਸਤ ਤੋਂ 8 ਅਗਸਤ ਤੱਕ ਚੱਲਣ ਵਾਲੇ ਬ੍ਰੈਸਟਫੀਡਿੰਗ ਹਫ਼ਤੇ ਬਾਰੇ ਆਪਣੇ ਕਲੀਨਿਕਾਂ ’ਚ ਗਰਭਵਤੀ ਅਤੇ ਦੁੱਧ ਚੁੰਘਾਉਣ ਵਾਲੀਆਂ ਔਰਤਾਂ ’ਚ ਜਾਗਰੂਕਤਾ ਪੈਦਾ ਕਰਨ ਲਈ ਕਿਹਾ। ਅੰਤ ਵਿੱਚ, ਨੀਮਾ ਪੰਜਾਬ ਦੀ ਪ੍ਰਧਾਨ ਡਾ. ਵੀਨਾ ਗੁੰਬਰ ਨੇ ਮੁੱਖ ਮਹਿਮਾਨ, ਬੁਲਾਰੇ ਅਤੇ ਹਾਜ਼ਰ ਮਹਿਮਾਨਾਂ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਡਾ. ਵੰਦਨਾ ਯਸ਼, ਡਾ. ਵਨੀਤਾ ਗੋਸਵਾਮੀ, ਨੀਮਾ ਜਲੰਧਰ ਦੇ ਪ੍ਰਧਾਨ ਡਾ. ਐਸ.ਪੀ. ਡਾਲੀਆ, ਪੰਜਾਬ ਨੀਮਾ ਦੇ ਜਨਰਲ ਸਕੱਤਰ ਡਾ. ਅਨਿਲ ਨਾਗਰਥ, ਡਾ. ਰਾਜੀਵ ਧਵਨ, ਡਾ. ਵਰੁਣ ਅਗਰਵਾਲ, ਡਾ. ਸੁਨੀਤਾ ਨਾਗਰਥ, ਡਾ. ਤਮੰਨਾ, ਡਾ. ਰੀਨਾ ਮਲਹੋਤਰਾ, ਡਾ. ਰੁਪਿੰਦਰ, ਡਾ. ਮੋਨਿਕਾ, ਡਾ. ਅਸੀਮ ਸਹਿਗਲ, ਡਾ. ਅਨੁਪਮਾ ਸੂਦ, ਡਾ. ਮੀਨਲ, ਡਾ. ਸੁਪ੍ਰੀਆ ਕਵਾਤਰਾ, ਡਾ. ਰੇਣੂ ਮਹਾਜਨ, ਡਾ. ਅਲਕਾ ਖੰਨਾ, ਡਾ. ਨਵਨੀਤ, ਡਾ. ਆਂਚਲ ਦੂਬੇ, ਡਾ. ਵਨੀਤਾ ਚੰਦਨਾ, ਡਾ. ਆਕਾਂਕਸ਼ਾ ਗੁਪਤਾ ਅਤੇ ਹੋਰ ਹਾਜ਼ਰ ਸਨ।
