ਦੋਦਾ, 18 ਅਪ੍ਰੈਲ (ਰਵੀਪਾਲ)-ਦੁਕਾਨ 'ਤੇ ਹੋਈ ਮਾਮੂਲੀ ਤਕਰਾਰ ਤੋਂ ਬਾਅਦ ਮਾਮੇ-ਭਾਣਜੀ ਦੀ ਕੁੱਟਮਾਰ ਕਰਨ 'ਤੇ ਥਾਣਾ ਕੋਟਭਾਈ ਪੁਲਿਸ ਨੇ 6 ਵਿਅਕਤੀਆਂ ਨੂੰ ਨਾਮਜ਼ਦ ਕਰਦੇ ਹੋਏ ਮੁਕੱਦਮਾ ਦਰਜ ਕੀਤਾ ਹੈ | ਪੁਲਿਸ ਨੂੰ ਦਿੱਤੇ ਬਿਆਨ ਵਿਚ ਨਿੱਕਾ ਸਿੰਘ ਪੁੱਤਰ ਗੁਰਚਰਨ ਸਿੰਘ ਵਾਸੀ ਪਿੰਡ ਭੁੱਟੀਵਾਲਾ ਨੇ ਦੱਸਿਆ ਕਿ ਉਹ ਮੌਜੂਦਾ ਬਲਾਕ ਸੰਮਤੀ ਮੈਂਬਰ ਤੇ ਮਿਹਨਤ ਮਜ਼ਦੂਰੀ ਦਾ ਕੰਮ ਕਰਦਾ ਹੈ | ਬੀਤੀ 14 ਅਪ੍ਰੈਲ ਨੂੰ ਉਹ ਰਾਜ ਕੁਮਾਰ ਦੀ ਦੁਕਾਨ ਵਿਚ ਬੈਠਾ ਸੀ ਤਾਂ ਸ਼ਾਮ 6 ਵਜੇ ਕਰਨਵੀਰ ਸਿੰਘ ਪੁੱਤਰ ਭੋਲਾ ਸਿੰਘ ਵਾਸੀ ਪਿੰਡ ਭੁੱਟੀਵਾਲਾ ਉਕਤ ਰਾਜ ਕੁਮਾਰ ਦੀ ਦੁਕਾਨ 'ਤੇ ਕੋਈ ਸਾਮਾਨ ਆਦਿ ਲੈਣ ਆਇਆ ਸੀ | ਇਸ ਦੌਰਾਨ ਕਰਨਵੀਰ ਸਿੰਘ ਉਸ ਨਾਲ ਰੌਹਬ ਨਾਲ ਗੱਲ ਕਰਨ ਲੱਗਾ | ਇਸ ਤੋਂ ਬਾਅਦ ਕਰਨਵੀਰ ਸਿੰਘ ਦੁਕਾਨ ਵਿਚੋਂ ਬਾਹਰ ਚਲਾ ਗਿਆ | ਕੁਝ ਸਮੇਂ ਬਾਅਦ ਉਹ ਮੁੱਸਲਾ ਡੰਡਾ, ਬੇਅੰਤ ਸਿੰਘ ਮੁੱਸਲਾ ਡੰਡਾ, ਅਜੇ ਸਿੰਘ ਮੁਸੱਲਾ ਕਾਪਾ, ਭੋਲਾ ਸਿੰਘ ਮੁੱਸਲਾ ਡੰਡਾ, ਖੰਡਾ ਸਿੰਘ ਮੁੱਸਲਾ ਸੋਟੀ, ਹੀਰਾ ਸਿੰਘ ਮੁੱਸਲਾ ਡੰਡਾ ਵਾਸੀਆਨ ਭੁੱਟੀਵਾਲਾ ਅਤੇ 7-8 ਅਣਪਛਾਤੇ ਆਦਮੀ ਜਿਨ੍ਹਾਂ ਕੋਲ ਡੰਡੇ ਤੇ ਸੋਟੀਆਂ ਸਨ ਮੌਕਾ 'ਤੇ ਆਏ ਅਤੇ ਉਸ ਦੀ ਕੁੱਟਮਾਰ ਕਰਨ ਲੱਗੇ | ਉਸ ਨੇ ਰੌਲਾ ਪਾਇਆ ਤਾਂ ਉਸ ਦੀ ਭਾਣਜੀ ਵੀਰਪਾਲ ਕੌਰ ਮੈਨੂੰ ਉਕਤਾਨ ਪਾਸੋਂ ਛੁਡਾਉਣ ਲੱਗੀ ਤਾਂ ਉਕਤਾਨ ਨੇ ਵੀਰਪਾਲ ਕੌਰ ਦੀ ਵੀ ਕੁੱਟਮਾਰ ਕੀਤੀ ਅਤੇ ਬਾਅਦ ਵਿਚ ਮੌਕੇ ਤੋਂ ਫਰਾਰ ਹੋ ਗਏ | ਸਾਨੂੰ ਦੋਵਾਂ ਨੂੰ ਮੇਰੇ ਜੀਜਾ ਜਸਵਿੰਦਰ ਸਿੰਘ ਨੇ ਇਲਾਜ ਲਈ ਸਿਵਲ ਹਸਪਤਾਲ ਦੋਦਾ ਵਿਖੇ ਭਰਤੀ ਕਰਵਾਇਆ, ਜਿੱਥੋਂ ਸਾਨੂੰ ਸਿਵਲ ਹਸਪਤਾਲ ਗਿੱਦੜਬਾਹਾ ਰੈਫ਼ਰ ਕਰ ਦਿੱਤਾ | ਵਜ੍ਹਾ ਰੰਜਿਸ਼ ਇਹ ਹੈ ਕਿ ਉਸ ਨੇ ਉਕਤ ਕਰਨਵੀਰ ਸਿੰਘ ਨੂੰ ਦੁਕਾਨ ਅੰਦਰ ਗ਼ਲਤ ਢੰਗ ਨਾਲ ਬੋਲਣ ਤੋਂ ਰੋਕਿਆ ਸੀ | ਉਕਤ ਮਾਮਲੇ ਵਿਚ ਪੁਲਿਸ ਨੇ ਕਰਨਵੀਰ ਸਿੰਘ, ਬੇਅੰਤ ਸਿੰਘ, ਭੋਲਾ ਸਿੰਘ, ਅਜੇ ਸਿੰਘ, ਖੰਡਾ ਸਿੰਘ, ਹੀਰਾ ਸਿੰਘ ਅਤੇ 7-8 ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਸ਼ੁਰੂ ਦਿੱਤੀ ਹੈ, ਜਦੋਂਕਿ ਮੁਕੱਦਮੇ ਵਿਚ ਨਾਮਜ਼ਦ ਵਿਅਕਤੀਆਂ ਦੀ ਗਿ੍ਫ਼ਤਾਰੀ ਅਜੇ ਬਾਕੀ ਹੈ |
