ਫ਼ਰੀਦਕੋਟ, 3 ਜੁਲਾਈ (ਸਰਬਜੀਤ ਸਿੰਘ)-ਇੱਥੋਂ ਦੇ ਹਰਿੰਦਰਾ ਨਗਰ ਬਾਬਾ ਫ਼ਰੀਦ ਸਕੂਲ ਨੂੰ ਜਾਂਦੀ ਸੜਕ ਦੇ ਨਾਲ-ਨਾਲ ਕੱਸੀ ’ਤੇ ਲੱਗੇ ਜ਼ਿਆਦਾਤਰ ਸਫੈਦੇ ਦੇ ਦਰੱਖਤ ਸੜਕ ਵਲ ਨੂੰ ਟੇਢੇ ਹੋਏ ਪਏ ਹਨ ਅਤੇ ਥੋੜ੍ਹੇ ਜਿਹੇ ਮੀਂਹ ਹਨੇਰੀ ਵਿਚ ਇਕ ਨਾ ਇਕ ਦਰੱਖਤ ਡਿੱਗਦਾ ਹੈ। ਦੋ ਦਿਨ ਪਹਿਲਾਂ ਆਏ ਹਨੇਰੀ ਤੂੰਫਾਨ ਨਾਲ ਵੀ ਇਕ ਦਰੱਖਤ ਦਾ ਵੱਡਾ ਸਾਰਾ ਟਾਹਣਾ ਅੱਧ ਵਿਚਾਲੇ ਤੋਂ ਟੁੱਟਣ ਕਾਰਨ ਲਮਕਦਾ ਪਿਆ ਸੀ ਅਤੇ ਅੱਜ ਤੜਕੇ ਡਿੱਗ ਗਿਆ। ਟਾਹਣਾ ਬਿਜਲੀ ਦੀਆਂ ਤਾਰਾਂ ’ਤੇ ਜਾ ਡਿੱਗਿਆ ਜਿਸ ਕਾਰਨ ਇਲਾਕੇ ਦੀ ਬਿਜਲੀ ਬੰਦ ਹੋ ਗਈ ਅਤੇ ਕਈ ਘੰਟਿਆਂ ਦੀ ਮੁਸ਼ੱਕਤ ਤੋਂ ਬਾਅਦ ਬਿਜਲੀ ਵਿਭਾਗ ਦੇ ਕਾਮਿਆਂ ਵਲੋਂ ਇਸ ਨੂੰ ਠੀਕ ਕੀਤਾ ਗਿਆ ਅਤੇ ਬਿਜਲੀ ਚਾਲੂ ਕੀਤੀ ਗਈ। ਅਜੇ ਤਾਂ ਬਚਾਅ ਵਾਲੀ ਗੱਲ ਹੈ ਕਿ ਇਸ ਕਾਰਨ ਕਿਸੇ ਦਾ ਜਨੀ ਨੁਕਸਾਨ ਨਹੀਂ ਹੋਇਆ। ਜਿਸ ਸਮੇਂ ਦਰੱਖਤ ਦਾ ਇਹ ਟਾਹਣਾ ਡਿੱਗਿਆ ਉਸ ਸਮੇਂ ਸਕੂਲ ਲੱਗਣ ਦਾ ਸਮਾਂ ਹੁੰਦਾ ਹੈ ਅਤੇ ਇਥੋਂ ਵੱਡੀ ਗਿਣਤੀ ਵਿਚ ਬੱਚੇ ਅਤੇ ਹੋਰ ਵਿਅਕਤੀ ਲੰਘਦੇ ਹਨ। ਕੱਸੀ ਦੇ ਨਾਲ-ਨਾਲ ਜ਼ਿਆਦਾਤਰ ਦਰਖੱਤ ਸਰਕਾਰੀ ਬਲਬੀਰ ਸਕੂਲ ਤੇ ਬਿ੍ਰਜਿੰਦਰਾ ਕਾਲਜ ਦੀਆਂ ਗਰਾਊਂਡਾ ਵਿਚ ਲੱਗੇ ਹਨ ਜੋ ਕਿ ਇਸ ਤਰਫ ਝੁੱਕੇ ਪਏ ਹਨ। ਆਸੇ ਪਾਸੇ ਰਹਿਣ ਵਾਲੇ ਅਤੇ ਉਥੋਂ ਲੰਘਣ ਟੱਪਣ ਵਾਲਿਆਂ ਨੂੰ ਬਚਾਅ ਕੇ ਲੰਘਣਾ ਪੈਂਦਾ ਹੈ ਕਿਤੇ ਇਹ ਸੜਕ ਵੱਲ ਉਲਰੇ ਹੋਏ ਦਰੱਖਤ ਡਿੱਗ ਹੀ ਨਾ ਪੈਣ। ਉਨ੍ਹਾਂ ਪ੍ਰਸ਼ਾਸ਼ਨ ਤੋਂ ਮੰਗ ਕੀਤੀ ਹੈ ਕਿ ਇਨ੍ਹਾਂ ਸਫੈਦੇ ਦੇ ਦਰੱਖਤਾਂ ਨੂੰ ਜਲਦ ਤੋਂ ਜਲਦ ਹਟਾਇਆ ਜਾਵੇ।
