ਮਾਨਸਾ, 4 ਅਪ੍ਰੈਲ (ਬਲਵਿੰਦਰ ਸਿੰਘ ਧਾਲੀਵਾਲ)-ਆੜ੍ਹਤੀਆ ਐਸੋਸੀਏਸ਼ਨ ਮਾਨਸਾ ਵਲੋਂ ਸਥਾਨਕ ਮਾਰਕਿਟ ਕਮੇਟੀ ਦੇ ਦਫ਼ਤਰ ਅੱਗੇ ਰੋਸ ਧਰਨਾ ਲਗਾਇਆ ਗਿਆ | ਪੰਜਾਬ ਸਰਕਾਰ ਖਿਲਾਫ ਤਿੱਖੀ ਨਾਅਰੇਬਾਜ਼ੀ ਕੀਤੀ ਗਈ | ਕਾਬਲੇ-ਗ਼ੌਰ ਰਹੇ ਆੜ੍ਹਤੀ ਪਹਿਲੀ ਅਪ੍ਰੈਲ ਤੋਂ ਹੜਤਾਲ 'ਤੇ ਚੱਲ ਰਹੇ ਹਨ | ਸੰਬੋਧਨ ਕਰਦਿਆਂ ਐਸੋਸੀਏਸ਼ਨ ਦੇ ਪ੍ਰਧਾਨ ਮੁਨੀਸ਼ ਕੁਮਾਰ ਬੱਬੀ ਦਾਨੇਵਾਲੀਆ ਨੇ ਦੋਸ਼ ਲਗਾਇਆ ਕਿ ਰਾਜ ਸਰਕਾਰ ਆੜ੍ਹਤੀਆਂ ਦੀਆਂ ਮੰਗਾਂ ਨੂੰ ਜਾਣਬੁੱਝ ਕੇ ਅਣਗੌਲਿਆ ਕਰ ਰਹੀ ਹੈ | ਉਨ੍ਹਾਂ ਦੱਸਿਆ ਕਿ ਜੂਨ 2024 'ਚ ਮੁੱਖ ਮੰਤਰੀ ਨੇ ਵਾਅਦਾ ਕੀਤਾ ਸੀ ਕਿ ਜੋ ਕੇਂਦਰ ਸਰਕਾਰ ਆੜ੍ਹਤੀਆਂ ਨੂੰ ਕਮਿਸ਼ਨ ਘੱਟ ਦੇ ਰਹੀ ਹੈ, ਦੀ ਭਰਪਾਈ ਸੂਬਾ ਸਰਕਾਰ ਕਰੇਗੀ ਪਰ ਪਿਛਲੇ ਦਿਨੀਂ ਮੀਟਿੰਗ ਦੌਰਾਨ ਉਹ ਵਾਅਦੇ ਤੋਂ ਮੁੱਕਰ ਗਏ | ਉਨ੍ਹਾਂ ਮੰਗ ਕੀਤੀ ਕਿ ਕਣਕ ਅਤੇ ਝੋਨੇ 'ਤੇ ਘੱਟੋ ਘੱਟ 2.50 ਫ਼ੀਸਦੀ ਆੜ੍ਹਤ ਲਾਜ਼ਮੀ ਲਾਗੂ ਕੀਤੀ ਜਾਵੇ | ਦਾਨੇਵਾਲੀਆ ਨੇ ਕਿਹਾ ਕਿ ਜਿਵੇਂ ਫ਼ਸਲਾਂ ਦੇ ਰੇਟ ਵੱਧ ਰਹੇ ਹਨ, ਆੜ੍ਹਤ ਦੀ ਪ੍ਰਤੀਸ਼ਤਤਾ ਘਟ ਰਹੀ ਹੈ | ਉਨ੍ਹਾਂ ਦੱਸਿਆ ਕਿ ਇਸ ਵੇਲੇ 2 ਪ੍ਰਤੀਸ਼ਤ ਤੋਂ ਆੜ੍ਹਤ ਘਟ ਗਈ ਹੈ ਜਦਕਿ ਆੜ੍ਹਤੀਆਂ ਨੂੰ ਜੋ ਖਰਚੇ ਪੈਂਦੇ ਹਨ, ਉਹ ਦਿਨੋ ਦਿਨ ਵਧ ਰਹੇ ਹਨ | ਧਰਨੇ ਨੂੰ ਜਨਰਲ ਸਕੱਤਰ ਰਮੇਸ਼ ਟੋਨੀ, ਵਾਈਸ ਪ੍ਰਧਾਨ ਰਾਕੇਸ਼ ਕਾਕੂ, ਚੰਦਰ ਕਾਂਤ ਕੂਕੀ ਨੇ ਵੀ ਸੰਬੋਧਨ ਕੀਤਾ | ਇਸ ਮੌਕੇ ਸੱਤਪਾਲ ਝੇਰਿਆਂਵਾਲੀ, ਸ਼ਸੀ ਨੰਦਗੜ੍ਹ, ਸਤੀਸ਼ ਗੋਬਿੰਦੀ, ਲਾਹਲਾ ਬਾਗੜੀ, ਤਰਸੇਮ ਕੱਦੂ, ਰੋਸ਼ਨ ਲਾਲ, ਮਨੀ ਬਾਂਸਲ, ਅਮਰ ਨਾਥ, ਜਸਪਾਲ ਸੱਦੇਵਾਲੀਆ, ਸੁਰੇਸ਼ ਰਾਏਪੁਰ, ਪੁਨੀਤ ਭੰਮਾ, ਭੋਲਾ ਫੱਤਾ, ਸੁਭਾਸ ਅੱਕਾਂਵਾਲੀ, ਵਿਵੇਕ ਵਿਸ਼ੂ ਭੈਣੀਵਾਲੇ, ਕੋਕ ਬਰਨਾਲਾ ਆਦਿ ਹਾਜ਼ਰ ਸਨ |
