ਸਰਦੂਲਗੜ੍ਹ, 26 ਜੂਨ (ਜੀ.ਐਮ.ਅਰੋੜਾ)- ਨੇੜਲੇ ਪਿੰਡ ਖੈਰਾ ਖ਼ੁਰਦ ਤੋਂ ਆਹਲੂਪੁਰ ਨੂੰ ਜਾਣ ਵਾਲੀ ਸੜਕ ਥਾਂ-ਥਾਂ ਤੋਂ ਟੁੱਟਣ ਕਾਰਨ ਆਉਣ-ਜਾਣ ਵਾਲੇ ਰਾਹਗੀਰਾਂ ਨੂੰ ਵੱਡੀਆਂ ਪ੍ਰੇਸ਼ਾਨੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਦੱਸਣਯੋਗ ਹੈ ਕਿ ਪਿਛਲੇ 10 ਸਾਲਾਂ ਤੋਂ ਰਤੀਆ ਸੜਕ ਟੁੱਟੀ ਹੋਣ ਕਾਰਨ ਭਾਰੀ ਅਤੇ ਹਲਕੇ ਵਹੀਕਲ ਇਸ ਲਿੰਕ ਰੋਡ ਉੱਤੋਂ ਦੀ ਰਤੀਆ ਨੂੰ ਜਾਂਦੇ ਹਨ, ਜਿਸ ਕਾਰਨ ਇਹ ਸੜਕ ਟੁੱਟ ਗਈ। ਪੰਜਾਬ ਸਰਕਾਰ ਵਲੋਂ ਰਤੀਆ ਸੜਕ ਬਣਾ ਦਿੱਤੀ ਗਈ ਪਰ ਇਸ ਰੋਡ ਨੂੰ ਅਜੇ ਤੱਕ ਨਹੀਂ ਬਣਾਇਆ ਗਿਆ, ਜਿਸ ਕਾਰਨ ਇਸ ਸੜਕ ਤੋਂ ਜਾਣ ਵਾਲੇ ਵਾਹਨ ਚਾਲਕਾਂ ਨੂੰ ਵੱਡੀ ਦਿੱਕਤ ਪੇਸ਼ ਆਉਂਦੀ ਹੈ। ਲੋਕਾਂ ਦੀ ਪੰਜਾਬ ਸਰਕਾਰ ਤੋਂ ਮੰਗ ਹੈ ਕਿ ਸੜਕ ਨੂੰ ਜਲਦੀ ਬਣਾਇਆ ਜਾਵੇ।
