ਫਗਵਾੜਾ, 4 ਫਰਵਰੀ (ਅਸ਼ੋਕ ਕੁਮਾਰ ਵਾਲੀਆ)- ਸੈਫਰਨ ਪਬਲਿਕ ਸਕੂਲ ਲਈ ਇਹ ਬਹੁਤ ਹੀ ਮਾਣ ਤੇ ਗੌਰਵ ਦਾ ਪਲ ਹੈ ਕਿ ਸਕੂਲ ਪਿ੍ੰਸੀਪਲ ਡਾ. ਸੰਦੀਪਾ ਸੂਦ ਤੇ ਸਕੂਲ ਕੋਆਰਡੀਨੇਟਰ ਸੀਮਾ ਰਾਣਾ ਨੂੰ ਗਲੋਬਲ ਐਜੂ ਲੀਡਰਜ਼ ਵੱਲੋਂ ਕਰਵਾਏ ਸਕੂਲ ਲੀਡਰਸ਼ਿਪ ਸਮਿੱਟ ਤੇ ਐਵਾਰਡ ਸਮਾਰੋਹ ਦੌਰਾਨ ਗਲੋਬਲ ਐਜੂ-ਲੀਡਰਜ਼ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ | ਇਹ ਪੋ੍ਰਗਰਾਮ ਦਿੱਲੀ ਦੇ ਆਈ. ਆਈ. ਟੀ. ਵਿਚ ਹੋਇਆ | ਡਾ. ਸੰਦੀਪਾ ਸੂਦ ਨੂੰ ਇੰਟਰਨੈਸ਼ਨਲ ਹਿੱਸੇਦਾਰੀ ਦੇ ਖੇਤਰ ਵਿਚ ਉਨ੍ਹਾਂ ਦੇ ਦੂਰਦਰਸ਼ੀ ਸੋਚ, ਵਿਸ਼ਵ ਪੱਧਰੀ ਦਿ੍ਸ਼ਟੀਕੋਣ ਅਤੇ ਸਕੂਲ ਨੂੰ ਅੰਤਰਰਾਸ਼ਟਰੀ ਪੱਧਰ 'ਤੇ ਉਚਾਈਆਂ ਤੱਕ ਲਿਜਾਣ ਲਈ ਕੀਤੇ ਗਏ ਉਪਰਾਲਿਆਂ ਲਈ ਇਹ ਸਨਮਾਨ ਦਿੱਤਾ ਗਿਆ | ਦੱਸ ਦਈਏ ਕਿ ਡਾ. ਸੰਦੀਪਾ ਸੂਦ ਦੀ ਅਗਵਾਈ ਹੇਠ ਸੈਫਰਨ ਪਬਲਿਕ ਸਕੂਲ ਨੇ ਫਗਵਾੜਾ ਦੇ ਸਿੱਖਿਅਕ, ਇਤਿਹਾਸ 'ਚ ਪਹਿਲੀ ਵਾਰ ਅੰਤਰਰਾਸ਼ਟਰੀ ਸਭਿਆਚਾਰਕ ਅਦਾਨ-ਪ੍ਰਦਾਨ ਲਈ ਅਮਰੀਕਾ, ਨਾਸਾ, ਕੈਨੇਡਾ ਤੇ ਇੰਗਲੈਂਡ ਸਮੇਤ ਕਈ ਦੇਸ਼ਾਂ ਦੀਆਂ ਸਿੱਖਿਅਕ ਤੇ ਸੱਭਿਆਚਾਰਕ ਯਾਤਰਾ ਦੀ ਸ਼ੁਰੂਆਤ ਕੀਤੀ ਤੇ ਅੰਤਰਰਾਸ਼ਟਰੀ ਪਾਠਕ੍ਰਮ ਨੂੰ ਸਫਲਤਾਪੂਰਵਕ ਲਾਗੂ ਕਰਕੇ ਸਿੱਖਿਆ ਨੂੰ ਵਿਸ਼ਵ ਪੱਧਰ 'ਤੇ ਨਵੀਂ ਪਹਿਚਾਣ ਦਿਵਾਈ | ਸਕੂਲ ਕੋਆਰਡੀਨੇਟਰ ਸੀਮਾ ਰਾਣਾ ਨੂੰ ਸਿੱਖਿਆ, ਧਾਰਮਿਕ ਤੇ ਸਮਾਜਿਕ ਖੇਤਰ ਵਿਚ ਵਧੀਆਂ ਪ੍ਰਾਪਤੀਆਂ ਲਈ ਇਹ ਮਾਨ ਮਿਲਿਆ | ਇਸ ਪ੍ਰਾਪਤੀ ਲਈ ਸਕੂਲ ਦੀ ਵਾਈਸ ਚੇਅਰਪਰਸਨ ਇੰਦਰਜੀਤ ਕੌਰ ਨੇ ਦੋਵਾਂ ਸਨਮਾਨਿਤ ਸ਼ਖ਼ਸੀਅਤਾਂ ਨੂੰ ਵਧਾਈ ਦਿੰਦਿਆਂ ਕਿਹਾ ਕਿ ਇਹ ਉਪਲਬਧੀ ਸੈਫਰਨ ਪਬਲਿਕ ਸਕੂਲ ਦੀ ਗੁਣਵੱਤਾਪੂਰਨ, ਵਿਸ਼ਵ ਪੱਧਰੀ ਸਿੱਖਿਆ ਨੂੰ ਅਦਾਨ ਪ੍ਰਦਾਨ ਕਰਨ ਦੀ ਪ੍ਰਾਪਤੀ ਦਾ ਮਾਣ ਹੈ |