ਨਡਾਲਾ, 10 ਅਪ੍ਰੈਲ (ਰਘਬਿੰਦਰ ਸਿੰਘ)-ਅੱਜ ਸ਼ਾਮ ਕਰੀਬ ਸਾਢੇ ਸੱਤ ਵਜੇ ਦੇ ਕਰੀਬ ਨਡਾਲਾ-ਬੇਗੋਵਾਲ ਰੋਡ ਸਥਿਤ ਸੰਨੀ ਜਨਰਲ ਸਟੋਰ 'ਤੇ ਇਕ ਵਿਅਕਤੀ ਦੁਕਾਨ ਤੋਂ ਖ਼ਰੀਦਦਾਰੀ ਕਰਕੇ ਪੈਸੇ ਦਿੱਤੇ ਬਿਨਾਂ ਉਥੋਂ ਰਫ਼ੂ ਚੱਕਰ ਹੋ ਗਿਆ | ਇਸ ਸੰਬੰਧੀ ਸਨੀ ਅਰੋੜਾ ਪੁੱਤਰ ਵਿਜੇ ਅਰੋੜਾ ਨੇ ਦੱਸਿਆ ਕਿ ਇਕ ਵਿਅਕਤੀ ਉਕਤ ਸਮੇਂ ਦੁਕਾਨ ਅੰਦਰ ਆਇਆ ਅਤੇ ਨੋਟਾਂ ਦੇ ਹਾਰ ਦੀ ਮੰਗ ਕਰਨ ਲੱਗਾ ਇਸ ਦੌਰਾਨ ਉਸ ਨੂੰ ਚਾਰ ਨੋਟਾਂ ਦੇ ਹਾਰ ਅਤੇ ਉਸਨੇ ਹੋਰ ਕੀਮਤੀ ਸਾਮਾਨ ਲਿਆ ਤੇ ਤਕਰੀਬਨ ਉਸ ਦਾ ਸਾਢੇ 11 ਹਜ਼ਾਰ ਰੁਪਏ ਦਾ ਬਿੱਲ ਬਣਿਆ, ਉਸ ਨੂੰ ਸਾਰਾ ਸਾਮਾਨ ਲਿਫ਼ਾਫ਼ੇ 'ਚ ਪਾ ਕੇ ਦੇ ਦਿੱਤਾ ਅਤੇ ਉਹ ਗੂਗਲ ਪੇਅ ਰਾਹੀਂ ਪੈਸੇ ਪਾਉਣ ਲਈ ਕਹਿਣ ਲੱਗਾ | ਇਸ ਦੌਰਾਨ ਦੁਕਾਨ ਤੇ ਹੋਰ ਵੀ ਗਾਹਕ ਸੀ ਤਾਂ ਉਹ ਇਕਦਮ ਦੁਕਾਨ ਦੇ ਬਾਹਰ ਗਿਆ ਤੇ ਆਪਣੇ ਸਾਥੀ ਨਾਲ ਸਕੂਟਰੀ 'ਤੇ ਬਹਿ ਕੇ ਢਿਲਵਾਂ ਰੋਡ ਵੱਲ ਫ਼ਰਾਰ ਹੋ ਗਿਆ | ਉਨ੍ਹਾਂ ਦੱਸਿਆ ਕਿ ਅਸੀਂ ਉਸ ਦਾ ਪਿੱਛਾ ਵੀ ਕੀਤਾ ਪਰ ਹਨੇਰੇ ਦਾ ਫ਼ਾਇਦਾ ਚੁੱਕ ਕੇ ਉਹ ਕਿਧਰੇ ਗਾਇਬ ਹੋ ਗਿਆ ਤੇ ਇਹ ਸਾਰੀ ਘਟਨਾ ਸੀ. ਸੀ. ਟੀ. ਵੀ. ਕੈਮਰੇ ਵਿਚ ਕੈਦ ਹੋ ਗਈ ਹੈ | ਉਨ੍ਹਾਂ ਦੱਸਿਆ ਕਿ ਇਸ ਸੰਬੰਧੀ ਨਡਾਲਾ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ |
