ਨਡਾਲਾ, 1 ਜੂਨ (ਰਘਬਿੰਦਰ ਸਿੰਘ)-ਅਕਾਲ ਅਕੈਡਮੀ ਰਾਏਪੁਰਪੀਰ ਬਖ਼ਸ਼ ਦੀ ਬਾਰਵੀਂ (ਸੀ.ਬੀ.ਐਸ.ਈ.) ਜਮਾਤ ਦੀ ਵਿਦਿਆਰਥਣ ਅਕਸ਼ਿਤਾ ਪੁੱਤਰੀ ਰੌਣਕੀ ਰਾਮ ਵਾਸੀ ਡਾਲਾ ਨੇ ਆਪਣੇ ਕੈਮਿਸਟਰੀ ਵਿਸ਼ੇ ਦੀ ਆਨਸਰ ਸ਼ੀਟ ਬਦਲੇ ਜਾਣ ਦਾ ਦੋਸ਼ ਲਗਾਇਆ ਹੈ | ਵਿਦਿਆਰਥਣ ਨੇ ਦੱਸਿਆ ਕਿ ਬਾਰਵੀਂ ਦੇ ਨਤੀਜੇ ਐਲਾਨੇ ਜਾਣ ਤੋਂ ਬਾਅਦ ਫਿਜ਼ਿਕਸ, ਕੈਮਿਸਟਰੀ ਅਤੇ ਮੈਥ ਵਿਸ਼ਿਆਂ ਵਿਚ ਉਮੀਦ ਤੋਂ ਘੱਟ ਅੰਕ ਆਉਣ ਕਾਰਨ ਉਸ ਨੂੰ ਸ਼ੱਕ ਹੋਇਆ | ਅਕਸ਼ਿਤਾ ਅਨੁਸਾਰ ਉਸ ਵੱਲੋਂ ਆਨਲਾਈਨ ਉਪਲਬਧ ਕਰਵਾਈਆਂ ਗਈਆਂ ਆਨਸਰ ਸ਼ੀਟਾਂ ਦੀ ਜਾਂਚ ਕੀਤੀ ਗਈ | ਇਸ ਦੌਰਾਨ ਫਿਜ਼ਿਕਸ ਅਤੇ ਮੈਥ ਦੀਆਂ ਆਨਸਰ ਸ਼ੀਟਾਂ ਉਸ ਦੀਆਂ ਹੀ ਪਾਈਆਂ ਗਈਆਂ, ਪਰ ਕੈਮਿਸਟਰੀ ਵਿਸ਼ੇ ਦੀ ਆਨਸਰ ਸ਼ੀਟ ਉਸ ਦੀ ਨਹੀਂ ਸੀ | ਉਸ ਦਾ ਕਹਿਣਾ ਹੈ ਕਿ ਆਨਲਾਈਨ ਪੋਰਟਲ 'ਤੇ ਉਸ ਦੇ ਰੋਲ ਨੰਬਰ ਨਾਲ ਕਿਸੇ ਹੋਰ ਵਿਦਿਆਰਥੀ ਦੀ ਆਨਸਰ ਸ਼ੀਟ ਅਪਲੋਡ ਕੀਤੀ ਗਈ ਹੈ | ਵਿਦਿਆਰਥਣ ਨੇ ਦਾਅਵਾ ਕੀਤਾ ਕਿ ਉਸ ਦਾ ਕੈਮਿਸਟਰੀ ਦਾ ਪੇਪਰ ਬਹੁਤ ਵਧੀਆ ਹੋਇਆ ਸੀ ਅਤੇ ਉਸ ਨੂੰ ਚੰਗੇ ਅੰਕਾਂ ਦੀ ਪੂਰੀ ਉਮੀਦ ਸੀ | ਉਸ ਨੇ ਸੰਬੰਧਿਤ ਸਿੱਖਿਆ ਬੋਰਡ ਅਤੇ ਅਧਿਕਾਰੀਆਂ ਤੋਂ ਮੰਗ ਕੀਤੀ ਹੈ ਕਿ ਮਾਮਲੇ ਦੀ ਨਿਰਪੱਖ ਜਾਂਚ ਕਰਵਾਈ ਜਾਵੇ ਅਤੇ ਉਸ ਦੀ ਅਸਲ ਆਨਸਰ ਸ਼ੀਟ ਦੇ ਆਧਾਰ 'ਤੇ ਨਤੀਜਾ ਦੁਬਾਰਾ ਤਿਆਰ ਕੀਤਾ ਜਾਵੇ | ਅਕਸ਼ਿਤਾ ਨੇ ਕਿਹਾ ਕਿ ਜੇਕਰ ਉਸ ਦੀ ਅਸਲ ਆਨਸਰ ਸ਼ੀਟ ਦੀ ਜਾਂਚ ਕੀਤੀ ਜਾਵੇ ਤਾਂ ਉਸ ਨੂੰ ਉਸ ਦੀ ਮਿਹਨਤ ਅਨੁਸਾਰ ਇਨਸਾਫ਼ ਮਿਲ ਸਕਦਾ ਹੈ | ਉਸ ਨੇ ਅਧਿਕਾਰੀਆਂ ਨੂੰ ਅਪੀਲ ਕੀਤੀ ਕਿ ਵਿਦਿਆਰਥੀਆਂ ਦੇ ਭਵਿੱਖ ਨਾਲ ਜੁੜੇ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲਿਆ ਜਾਵੇ
