ਢਿਲਵਾਂ, 7 ਜੂਨ (ਪ੍ਰਵੀਨ ਕੁਮਾਰ)-ਜਲੰਧਰ ਗਰੁੱਪ ਐਨ.ਸੀ.ਸੀ ਦੇ ਗਰੁੱਪ ਕਮਾਂਡਰ ਨੇ ਆਰਮੀ ਪਬਲਿਕ ਸਕੂਲ ਬਿਆਸ ਵਿਖੇ ਚੱਲ ਰਹੇ ਕੰਬਾਈਨਡ ਐਨੂਅਲ ਟ੍ਰੇਨਿੰਗ ਕੈਂਪ ਸੀਰੀਅਲ ਨੰਬਰ 34 ਤੇ ਇੰਟਰ ਯੂਨਿਟ ਥਲ ਸੈਨਿਕ ਕੈਂਪ ਦਾ ਦੌਰਾ ਕੀਤਾ | ਇੱਥੇ ਪਹੁੰਚਣ ਉਪਰੰਤ ਐਨ.ਸੀ.ਸੀ ਕੈਡਿਟਾਂ ਵੱਲੋਂ ਗਰੁੱਪ ਕਮਾਂਡਰ ਨੂੰ ਸ਼ਾਨਦਾਰ ਗਾਰਡ ਆਫ਼ ਆਨਰ ਪੇਸ਼ ਕੀਤਾ ਗਿਆ | ਇਸ ਮੌਕੇ ਉਨ੍ਹਾਂ ਨੇ ਐਸੋਸੀਏਟ ਅਫ਼ਸਰਾਂ ਅਤੇ 10 ਦਿਨਾਂ ਕੈਂਪ ਵਿਚ ਭਾਗ ਲੈ ਰਹੇ ਕੈਡਿਟਾਂ ਨਾਲ ਗੱਲਬਾਤ ਕੀਤੀ | ਆਪਣੇ ਸੰਬੋਧਨ ਦੌਰਾਨ ਉਨ੍ਹਾਂ ਨੇ ਕੈਡਿਟਾਂ ਦੀ ਅਨੁਸ਼ਾਸਨ, ਜੋਸ਼ ਅਤੇ ਸ਼ਾਨਦਾਰ ਟਰਨਆਊਟ ਦੀ ਸਰਾਹਨਾ ਕੀਤੀ ਤੇ ਕੈਂਪ ਦੌਰਾਨ ਮਿਲ ਰਹੀ ਸਿਖਲਾਈ ਦਾ ਪੂਰਾ ਲਾਭ ਉਠਾਉਣ ਲਈ ਪ੍ਰੇਰਿਤ ਕੀਤਾ | ਕਮਾਂਡਿੰਗ ਅਫ਼ਸਰ ਨੇ ਗਰੁੱਪ ਕਮਾਂਡਰ ਨੂੰ ਕੈਂਪ ਦੀਆਂ ਗਤੀਵਿਧੀਆਂ ਅਤੇ ਆਗਾਮੀ ਇੰਟਰ ਗਰੁੱਪ ਥਲ ਸੈਨਿਕ ਕੈਂਪ ਲਈ ਕੈਡਿਟਾਂ ਦੀਆਂ ਤਿਆਰੀਆਂ ਬਾਰੇ ਜਾਣਕਾਰੀ ਦਿੱਤੀ | ਗਰੁੱਪ ਕਮਾਂਡਰ ਨੇ ਸਿਖਲਾਈ ਦੇ ਉੱਚ ਮਿਆਰਾਂ ਅਤੇ ਸਟਾਫ਼ ਦੀ ਮਿਹਨਤ 'ਤੇ ਸੰਤੁਸ਼ਟੀ ਪ੍ਰਗਟ ਕੀਤੀ | ਉਨ੍ਹਾਂ ਨੇ ਟੀ.ਐੱਸ.ਸੀ ਕੈਡਿਟਾਂ ਨਾਲ ਵਿਸ਼ੇਸ਼ ਮੁਲਾਕਾਤ ਕਰਕੇ ਆਪਣੇ ਤਜਰਬੇ ਸਾਂਝੇ ਕੀਤੇ ਅਤੇ ਮੁਕਾਬਲੇ ਲਈ ਮਹੱਤਵਪੂਰਨ ਸੁਝਾਅ ਦਿੱਤੇ | ਉਨ੍ਹਾਂ ਨੇ ਕੈਡਿਟਾਂ ਨੂੰ ਪ੍ਰੇਰਿਤ ਕੀਤਾ ਕਿ ਉਹ ਆਉਣ ਵਾਲੇ ਇੰਟਰ ਗਰੁੱਪ ਵਿਚ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਜਲੰਧਰ ਗਰੁੱਪ ਦਾ ਨਾਂਅ ਰੌਸ਼ਨ ਕਰਨ | ਉਨ੍ਹਾਂ ਵਿਸ਼ਵ ਵਾਤਾਵਰਨ ਦਿਵਸ ਮੌਕੇ ਕੈਡਿਟਾਂ ਅਤੇ ਸਟਾਫ਼ ਨਾਲ ਮਿਲ ਕੇ ਸਕੂਲ ਕੈਂਪਸ ਵਿਚ ਪੌਦੇ ਲਗਾਏ | ਉਨ੍ਹਾਂ ਨੇ ਵਾਤਾਵਰਨ ਸੰਭਾਲ ਦੀ ਮਹੱਤਤਾ ਬਾਰੇ ਜਾਗਰੂਕ ਕਰਦਿਆਂ ਕੈਡਿਟਾਂ ਨੂੰ 'ਗ੍ਰੀਨ ਇੰਡੀਆ' ਮੁਹਿੰਮ ਦੇ ਸੱਚੇ ਦੂਤ ਬਣਨ ਦਾ ਸੱਦਾ ਦਿੱਤਾ | ਦੌਰੇ ਦੇ ਅੰਤ ਵਿਚ ਗਰੁੱਪ ਕਮਾਂਡਰ ਨੇ ਕੈਡਿਟਾਂ ਨਾਲ ਚਾਹ 'ਤੇ ਗੈਰ-ਰਸਮੀ ਗੱਲਬਾਤ ਕੀਤੀ | ਉਨ੍ਹਾਂ ਦੀ ਹੌਸਲਾ ਅਫ਼ਜ਼ਾਈ ਅਤੇ ਮਾਰਗ ਦਰਸ਼ਨ ਨਾਲ ਕੈਡਿਟਾਂ ਵਿਚ ਨਵਾਂ ਉਤਸ਼ਾਹ ਪੈਦਾ ਹੋਇਆ | ਇਹ ਦੌਰਾ ਕੈਂਪ ਦੇ ਕੈਡਿਟਾਂ ਤੇ ਸਟਾਫ਼ ਲਈ ਬਹੁਤ ਪ੍ਰੇਰਣਾਦਾਇਕ ਸਾਬਤ ਹੋਇਆ ਤੇ ਐਨ.ਸੀ.ਸੀ ਵੱਲੋਂ ਗੁਣਵੱਤਾ ਭਰੀ ਸਿਖਲਾਈ ਅਤੇ ਕੈਡਿਟ ਭਲਾਈ ਪ੍ਰਤੀ ਵਚਨਬੱਧਤਾ ਨੂੰ ਹੋਰ ਮਜ਼ਬੂਤ ਕੀਤਾ |
