ਫਗਵਾੜਾ, 18 ਜੁਲਾਈ ( ਹਰਜੋਤ ਸਿੰਘ ਚਾਨਾ)- ਥਾਣਾ ਸਿਟੀ ਪੁਲਿਸ ਦਾ ਹੁਣ ਇਹ ਹਾਲ ਹੋ ਚੁੱਕਾ ਹੈ ਕਿ ਜੇਕਰ ਕਿਸੇ ਨਾਲ ਕੋਈ ਘਟਨਾ ਵਾਪਰ ਜਾਂਦੀ ਹੈ ਤਾਂ ਉਸ ਦਾ ਕੇਸ ਦਰਜ ਕਰਨ ਦੀ ਥਾਂ ‘ਤੇ ਉਸ ਨੂੰ ਥਾਣੇ ਦੇ ਗੇੜੇ ਮਰਵਾ ਕੇ ਹੀ ਥਕਾ ਦਿੱਤਾ ਜਾਂਦਾ ਹੈ ਤਾਂ ਜੋ ਉਹ ਆਪਣੇ ਘਰ ਬੈਠਣਾ ਹੀ ਬਿਹਤਰ ਸਮਝੇ ਤੇ ਆਪਣਾ ਕੇਸ ਦਰਜ ਕਰਵਾਉਣ ਲਈ ਥਾਣੇ ਨਾ ਹੀ ਆਵੇ ਜਿਸ ਕਾਰਨ ਪੀੜਤ ਪ੍ਰੇਸ਼ਾਨ ਹਨ | ਅਜਿਹਾ ਹੀ ਇੱਕ ਮਾਮਲਾ ਅੱਜ ਸਾਹਮਣੇ ਆਇਆ ਜਿਸ ‘ਚ ਐਕਟਿਵਾ ਚੋਰੀ ਹੋਣ ਦੇ 49 ਦਿਨ ਬੀਤ ਜਾਣ ਦੇ ਬਾਵਜੂਦ ਵੀ ਪੁਲਿਸ ਨੇ ਕੇਸ ਦਰਜ ਕਰਨਾ ਜਾਇਜ਼ਾ ਨਹੀਂ ਸਮਝਿਆ | ਜਾਣਕਾਰੀ ਦਿੰਦਿਆਂ ਸੰਜੀਵ ਕੌੜਾ ਨੇ ਦੱਸਿਆ ਕਿ 30 ਮਈ ਦੀ ਸ਼ਾਮ ਨੂੰ ਉਹ ਆਪਣੀ ਐਕਟਿਵਾ ਐਸਡੀਐਮ ਦਫ਼ਤਰ ਨੇੜੇ ਦੀਪਕ ਕੋਲਡ ਡਿ੍ੰਕਸ ਦੀ ਦੁਕਾਨ ਦੇ ਬਾਹਰ ਖੜ੍ਹੀ ਕਰਕੇ ਕੁੱਝ ਮਿੰਟਾਂ ਲਈ ਅੰਦਰ ਗਿਆ ਸੀ ਤੇ ਜਦੋਂ ਵਾਪਸ ਆਇਆ ਤਾਂ ਦੇਖਿਆ ਕਿ ਉਸਦੀ ਐਕਟਿਵਾ ਗਾਇਬ ਸੀ ਜਿਸ ਦੀ ਸ਼ਿਕਾਇਤ ਉਸਨੇ ਪੁਲਿਸ ਨੂੰ ਦਿੱਤੀ | ਪੀੜਤ ਨੇ ਦੱਸਿਆ ਕਿ ਉਹ ਕਈ ਵਾਰ ਥਾਣਾ ਸਿਟੀ ਦੇ ਚੱਕਰ ਮਾਰ ਚੁੱਕਾ ਹੈ ਪਰ ਪੁਲਿਸ ਨੇ ਨਾ ਤਾਂ ਕੇਸ ਦਰਜ ਕੀਤਾ ਤੇ ਨਾ ਹੀ ਵਾਹਨ ਨੂੰ ਬਰਾਮਦ ਕਰਨ ਲਈ ਕੋਈ ਕਾਰਵਾਈ ਕੀਤੀ | ਉਸਨੇ ਮੰਗ ਕੀਤੀ ਕਿ ਇਸ ਮਾਮਲੇ ਦਾ ਕੇਸ ਦਰਜ ਕਰਕੇ ਉਸਨੂੰ ਇਨਸਾਫ਼ ਦੁਆਇਆ ਜਾਵੇ | ਇਸ ਸਬੰਧੀ ਜਦੋਂ ਐਸ.ਪੀ. ਮਾਧਵੀ ਸ਼ਰਮਾ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਦੀ ਉਨ੍ਹਾਂ ਨੂੰ ਜਾਣਕਾਰੀ ਨਹੀਂ ਸੀ ਤੇ ਥਾਣਾ ਸਿਟੀ ਮੁਖੀ ਨੂੰ ਤੁਰੰਤ ਕੇਸ ਦਰਜ ਤੇ ਮਾਮਲੇ ਦੀ ਜਾਂਚ ਕਰਨ ਦੀਆਂ ਹਦਾਇਤਾਂ ਦੇ ਦਿੱਤੀਆਂ ਗਈਆਂ ਹਨ |
