ਰਾਜਪੁਰਾ (ਪਟਿਆਲਾ), 21 ਜੁਲਾਈ (ਰਣਜੀਤ ਸਿੰਘ)- ਕਿਸਾਨਾਂ ਵਲੋਂ ਦਿੱਲੀ ਕੂਚ ਕਰਨ ਨੂੰ ਲੈ ਕੇ ਹਰਿਆਣਾ ਸਰਕਾਰ ਨੇ ਪੰਜਾਬ ਹਰਿਆਣਾ ਦੇ ਬੈਰੀਅਰ ਘੱਗਰ ਦਰਿਆ 'ਤੇ ਦੋਨੇਂ ਪਾਸੇ ਸਖ਼ਤ ਬੈਰੀਗੇਟਿੰਗ ਕਰਕੇ ਆਵਾਜਾਈ ਬਿਲਕੁਲ ਠੱਪ ਕਰ ਦਿੱਤੀ ਸੀ ਸਾਰਾ ਦਿਨ ਭਾਵੇਂ ਹਲਕੀ ਹਲਕੀ ਬੂੰਦਾਂਬੰਦੀ ਹੁੰਦੀ ਰਹੀ ਪਰ ਇਸਦੇ ਬਾਵਜੂਦ ਵੀ ਮਾਹੌਲ ਗਰਮਾਇਆ ਰਿਹਾ।
ਦੁਪਹਿਰ ਵੇਲੇ ਕਿਸਾਨ ਆਗੂ ਸਰਵਣ ਸਿੰਘ ਪੰਧੇਰ ਅਤੇ ਖੇਤੀਬਾੜੀ ਮੰਤਰੀ ਸ਼ਾਮ ਲਾਲ ਰਾਣਾ ਵਿਚਕਾਰ ਹੋਈ ਗੱਲਬਾਤ ਨੂੰ ਲੈ ਕੇ ਸ਼ਾਂਤੀ ਬਣੀ ਅਤੇ ਇਹ ਤੈਅ ਹੋਇਆ ਕਿ ਹਰਿਆਣਾ ਸਰਕਾਰ ਗਿਰਫ਼ਤਾਰ ਕੀਤੇ ਕਿਸਾਨ ਛੱਡ ਦੇਵੇਗੀ ਅਤੇ ਉਸਤੋਂ ਬਾਅਦ ਕਿਸਾਨ ਵੀ ਆਪੋ ਆਪਣੇ ਘਰ ਚਲੇ ਜਾਣਗੇ। ਪੰਧੇਰ ਨੇ ਦੱਸਿਆ ਕਿ ਉਨ੍ਹਾਂ ਦੀ ਖੇਤੀਬਾੜੀ ਮੰਤਰੀ ਨਾਲ ਗੱਲਬਾਤ ਕਰਵਾਈ ਜਾਵੇਗੀ ਇਸ ਗੱਲ ਨੂੰ ਲੈ ਕੇ ਕਿਸਾਨ ਆਗੂਆਂ ਨੇ ਧਰਨਾ ਚੱਕ ਦਿੱਤਾ ਹੈ।
ਹਰਿਆਣਾ ਸਰਕਾਰ ਵਲੋਂ ਬੈਰੀਗੇਟਿੰਗ ਖ਼ਤਮ ਕਰਕੇ ਇਕ ਪਾਸੇ ਦੀ ਆਵਾਜਾਈ ਬਹਾਲ ਕਰ ਦਿੱਤੀ ਗਈ ਹੈ ਤੇ ਦੂਜੇ ਪਾਸੇ ਦੀ ਆਵਾਜਾਈ ਵੀ ਜਲਦ ਹੀ ਬਹਾਲ ਕਰਨ ਦੀ ਗੱਲ ਕਹੀ ਜਾ ਰਹੀ ਹੈ। ਆਵਾਜਾਈ ਠੱਪ ਕੀਤੀ ਜਾਣ ਕਾਰਣ ਸਾਰਾ ਦਿਨ ਰਾਹਗੀਰ ਵੱਡੇ ਪੱਧਰ 'ਤੇ ਤੰਗ ਪਰੇਸ਼ਾਨ ਹੁੰਦੇ ਰਹੇ ਅਤੇ ਪੁਲਿਸ ਵਲੋਂ ਉਨ੍ਹਾਂ ਨੂੰ ਸੱਜੇ ਖੱਬੇ ਰਸਤਿਆਂ ਰਾਹੀਂ ਆਪਣੇ ਆਪਣੀ ਮੰਜ਼ਿਲ ਵੱਲ ਤੋਰਿਆ ਗਿਆ। ਸ਼ੰਭੂ ਬੈਰੀਅਰ ਤੇ ਪੰਜਾਬ ਪੁਲਿਸ ਦੇ ਸੀਨੀਅਰ ਅਧਿਕਾਰੀਆਂ ਸਮੇਤ ਵੱਡੀ ਗਿਣਤੀ ਵਿਚ ਪੁਲਿਸ ਬਲ ਤਾਇਨਾਤ ਰਹੀ।
