ਗੜ੍ਹਸ਼ੰਕਰ, 4 ਸਤੰਬਰ (ਧਾਲੀਵਾਲ)-ਭਾਜਪਾ ਦੀ ਹਲਕਾ ਗੜ੍ਹਸ਼ੰਕਰ ਤੋਂ ਇੰਚਾਰਜ ਨਿਮਿਸ਼ਾ ਮਹਿਤਾ ਨੇ ਹੜ੍ਹ ਨਾਲ ਦੇ ਪਾਣੀ ਨਾਲ ਪ੍ਰਭਾਵਿਤ ਪਿੰਡ ਕੁਨੈਲ ਤੇ ਸਿੰਬਲੀ ਦਾ ਦੌਰਾ ਕਰਕੇ ਇਨ੍ਹਾਂ ਪਿੰਡਾਂ 'ਚ ਹੋਈ ਨੁਕਸਾਨ ਦਾ ਜਾਇਜ਼ਾ ਲਿਆ | ਇਸ ਮੌਕੇ ਨਿਮਿਸ਼ਾ ਮਹਿਤਾ ਨੇ ਕਿਹਾ ਕਿ ਇਨ੍ਹਾਂ ਦੋਵੇਂ ਪਿੰਡਾਂ 'ਚ ਪਾਣੀ ਦੀ ਮਾਰ ਪੈਣ ਦਾ ਮੁੱਖ ਕਾਰਨ ਚੋਆਂ ਦੀ ਸਫ਼ਾਈ ਨਾ ਹੋਣਾ ਹੈ | ਉਨ੍ਹਾਂ ਕਿਹਾ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਆਉਣ 'ਤੇ ਪਿੰਡ ਸਿੰਬਲੀ ਦੇ ਚੋਅ ਦਾ ਉਦਘਾਟਨ ਮੁੱਖ ਮੰਤਰੀ ਪੰਜਾਬ ਵਲੋਂ ਖੁਦ ਕੀਤਾ ਗਿਆ ਸੀ ਪਰ ਫਿਰ ਵੀ ਅਧਿਕਾਰੀਆਂ ਵਲੋਂ ਇਸ ਕੰਮ ਨੂੰ ਬੁਰੀ ਤਰ੍ਹਾਂ ਅਣਗੌਲਿਆ ਗਿਆ ਅਤੇ ਚੋਅ 'ਚੋਂ ਨੜੇ ਤੇ ਬੂਟੀ ਵੀ ਸਾਫ਼ ਨਹੀਂ ਕਰਵਾਈ ਗਈ | ਉਨ੍ਹਾਂ ਕਿਹਾ ਕਿ ਨਾਜ਼ਰਪੁਰ ਵਾਲੀ ਪੁਲੀ ਦੀ ਹਾਲਤ ਵਿਚ ਖਸਤਾ ਹੈ ਤੇ ਇਸ ਪੁਲੀ ਦਾ ਸੁਧਾਰ ਕਰਨ ਦੀ ਬਜਾਏ ਐੱਨ. ਆਰ. ਆਈਜ਼ ਵਲੋਂ ਇਸ ਪੁਲੀ 'ਤੇ ਲਗਾਏ ਜਾਣ ਵਾਲੇ ਪੈਸੇ ਰਾਹੀਂ ਸੱਤਾਧਾਰੀ ਧਿਰ ਵਲੋਂ ਐਲਾਨ ਕਰਕੇ ਹੀ ਸਾਰ ਦਿੱਤਾ ਜਿਸ 'ਚ ਸਰਕਾਰ ਦਾ ਵੀ ਕੋਈ ਯੋਗਦਾਨ ਨਹੀਂ ਹੈ | ਉਨ੍ਹਾਂ ਕੁਨੈਲ ਵਿਖੇ ਨੁਕਸਾਨੀ ਸੜਕ ਦਾ ਜਾਇਜ਼ਾ ਲੈਂਦੇ ਹੋਏ ਕਿਹਾ ਕਿ ਅਫਸਰਾਂ ਦੀ ਗਲਤ ਇੰਜੀਨੀਅਰਿੰਗ ਕਾਰਨ ਇਹ ਸੜਕ ਬੁਰੀ ਤਰ੍ਹਾਂ ਬਰਬਾਦ ਹੋ ਗਈ ਹੈ | ਕੁਨੈਲ ਖੱਡ ਦਾ ਪਾਣੀ ਹੀ ਸੜਕ ਨੂੰ ਹੜ੍ਹਾ ਕੇ ਅੱਗੇ ਖੇਤਾਂ ਨੂੰ ਬਰਬਾਦ ਕਰਦਿਆਂ ਹੋਇਆ ਅਨੰਦਪੁਰ ਸਾਹਿਬ ਰੋਡ ਤੱਕ ਚਲਾ ਗਿਆ | ਨਿਮਿਸ਼ਾ ਮਹਿਤਾ ਨੇ ਕਿਹਾ ਕਿ ਭਾਰਤਾ ਸਰਕਾਰ ਨੇ ਪੰਜਾਬ ਨੂੰ ਸੜਕਾਂ ਲਈ ਪੈਸਾ ਭੇਜਿਆ ਅਤੇ ਉਸੇ ਤਹਿਤ ਸਦਰਪੁਰ ਕੁਨੈਲ 18 ਫੁੱਟੀ ਰੋਡ ਪ੍ਰਧਾਨ ਮੰਮਤਰੀ ਗ੍ਰਾਮ ਸੜਕ ਯੋਜਨਾ ਤਹਿਤ ਬਣੀ ਸੀ ਪਰ ਗਲਤ ਕਾਰਗੁਜ਼ਾਰੀ ਨਾਲ ਪ੍ਰਸ਼ਾਸਨ ਤੇ ਸਰਕਾਰ ਨੇ ਇਹ ਪੈਸਾ ਬਰਬਾਦ ਕਰ ਦਿੱਤਾ | ਉਨ੍ਹਾਂ ਕਿਹਾ ਕਿ ਪਿੰਡ ਕੁਨੈਲ 'ਚ ਚੋਅ ਦੀ ਸਫਾਈ ਨਾ ਹੋਣ ਕਰਕੇ ਅਤੇ ਬੀਤ ਇਲਾਕੇ ਵਿਚ ਅਤੇ ਕੁਨੈਲ ਪਿੰਡ 'ਚ ਚੱਲੀ ਅੰਨੇਵਾਹ ਮਾਈਨਿੰਗ ਤੇ ਜੰਗਲ ਦੀ ਕਟਾਈ ਕਰਕੇ ਪਾਣੀ ਨੇ ਤੇਜ਼ ਰਫਤਾਰ ਨਾਲ ਆ ਕੇ ਇਲਾਕੇ ਨੂੰ ਬੁਰੀ ਮਾਰ ਮਾਰੀ ਹੈ |
