ਰਾਏਕੋਟ, 19 ਦਸੰਬਰ (ਬਲਵਿੰਦਰ ਸਿੰਘ ਲਿੱਤਰ)-ਪਿਛਲੇ 2 ਦਿਨਾਂ ਤੋਂ ਪੈ ਰਹੀ ਸੰਘਣੀ ਧੁੰਦ ਕਾਰਨ ਰਾਏਕੋਟ ਦੇ ਬਰਨਾਲਾ ਚੌਂਕ ਵਿਚ ਇਕ ਟਰੱਕ ਸੜਕ ਕਿਨਾਰੇ ਬਣੀਆਂ ਝੁੱਗੀਆਂ ਵਿਚ ਜਾ ਵੜਿ੍ਹਆ, ਪਰ ਜਾਨੀ ਨੁਕਸਾਨ ਤੋਂ ਬਚਾਅ ਹੋ ਗਿਆ | ਇਸ ਮੌਕੇ ਪੁਲਿਸ ਥਾਣਾ ਸਿਟੀ ਰਾਏਕੋਟ ਦੇ ਐੱਸ.ਐੱਚ.ਓ. ਗੁਰਸੇਵਕ ਸਿੰਘ ਨੇ ਦੱਸਿਆ ਕਿ ਅੱਜ ਸਵੇਰੇ 4 ਵਜੇ ਦੇ ਕਰੀਬ ਬਰਨਾਲਾ ਸਾਈਡ ਤੋਂ ਇਕ ਟਰੱਕ ਲੁਧਿਆਣਾ ਸਾਈਡ ਵੱਲ ਨੂੰ ਜਾ ਰਿਹਾ ਸੀ, ਜਦ ਉਹ ਬਰਨਾਲਾ ਚੌਂਕ ਵਿਚ ਪੁੱਜਿਆ ਤਾਂ ਸੰਘਣੀ ਧੁੰਦ ਹੋਣ ਕਾਰਨ ਟਰੱਕ ਕਿਨਾਰੇ ਬਣੀਆਂ ਝੁੱਗੀਆਂ ਵਿਚ ਜਾ ਵੜਿ੍ਹਆ | ਇਸ ਝੁੱਗੀ ਵਿਚ ਰਹਿੰਦੇ ਪ੍ਰਵਾਸੀ ਮਜ਼ਦੂਰ ਹੇਤੀ ਲਾਲ ਵਾਸੀ ਯੂ.ਪੀ. (ਹਾਲ ਵਾਸੀ ਬਰਨਾਲਾ ਚੌਂਕ ਰਾਏਕੋਟ) ਨੇ ਦੱਸਿਆ ਕਿ ਉਹ ਇਸ ਝੁੱਗੀ ਵਿਚ ਆਪਣੀ ਪਤਨੀ ਸਮੇਤ ਇਕ ਬੇਟੀ ਨਾਲ ਰਹਿੰਦਾ ਹੈ | ਉਸ ਨੇ ਦੱਸਿਆ ਕਿ ਉਹ ਨਾਲ ਵਾਲੀ ਝੁੱਗੀ ਵਿਚ ਪਰਿਵਾਰ ਸਮੇਤ ਸੁੱਤਾ ਪਿਆ ਸੀ, ਜਿਸ ਕਰਕੇ ਇਸ ਦੁਰਘਟਨਾ ਵਿਚ ਪਰਿਵਾਰ ਨੇ ਬੜੀ ਮੁਸ਼ਕਿਲ ਨਾਲ ਆਪਣੀ ਜਾਨ ਬਚਾਈ, ਪ੍ਰੰਤੂ ਝੁੱਗੀ ਵਿਚ ਪਿਆ ਉਸ ਦਾ ਸਾਮਾਨ ਤੇ ਝੁੱਗੀ ਪੂਰੀ ਤਰ੍ਹਾਂ ਤਬਾਹ ਹੋ ਗਈ ਹੈ | ਉਨ੍ਹਾਂ ਰਾਏਕੋਟ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਉਸ ਨੂੰ ਆਰਥਿਕ ਮਦਦ ਦਿੱਤੀ ਜਾਵੇ ਤਾਂ ਜੋ ਉਹ ਦੁਬਾਰਾ ਆਪਣੇ ਪਰਿਵਾਰ ਲਈ ਰੈਣ-ਬਸੇਰਾ ਬਣਾ ਸਕੇ |