ਮਜਾਰੀ/ਸਾਹਿਬਾ, 1 ਸਤੰਬਰ (ਨਿਰਮਲਜੀਤ ਸਿੰਘ ਚਾਹਲ)-ਬੀਤੇ ਦਿਨਾਂ ਤੋਂ ਹੋ ਰਹੀ ਭਾਰੀ ਬਰਸਾਤ ਦਾ ਪਾਣੀ ਕਈ ਪਿੰਡਾਂ ਅੰਦਰ ਦਾਖਲ ਹੋ ਗਿਆ | ਅੱਜ ਸਵੇਰੇ ਪਿੰਡ ਅਟਾਲ ਮਜਾਰਾ ਤੋਂ ਆਉਂਦੀ ਖੱਡ ਟੁੱਟਣ ਕਾਰਨ ਪਾਣੀ ਪਿੰਡ ਛਦੌੜੀ 'ਚ ਆ ਵੜਿਆ ਤੇ ਕਈ ਘਰਾਂ 'ਚ ਦਾਖਲ ਹੋ ਗਿਆ ਤੇ ਸੜਕ 'ਚ ਪਾੜ ਪੈ ਗਿਆ | ਇਸੇ ਤਰਾਂ ਪਿੰਡ ਚਣਕੋਈ ਲਾਗੇ ਬਛੌੜੀ ਨੂੰ ਜਾਣ ਵਾਲੀ ਸੜਕ 'ਚ ਡੂੰਘਾ ਤੇ ਲੰਮਾ ਚੌੜਾ ਪਾੜ ਪੈ ਗਿਆ, ਜਿਸ ਕਾਰਨ ਇਸ ਪਾਸੇ ਤੋਂ ਚਣਕੋਈ ਦਾ ਪਿੰਡ ਬਛੌੜੀ ਤੇ ਕੌਲਗੜ੍ਹ ਨਾਲੋਂ ਲਿੰਕ ਟੁੱਟ ਗਿਆ | ਇਥੇ ਲੋਕਾਂ ਨੇ ਦੱਸਿਆ ਕਿ ਪਹਿਲਾਂ ਇਥੇ ਖੱਡ ਵੱਗਦੀ ਹੁੰਦੀ ਸੀ, ਜਿਸ ਨੂੰ ਲੋਕਾਂ ਨੇ ਆਪਣੀਆਂ ਜ਼ਮੀਨਾਂ ਵਿਚ ਮਿਲਾ ਲਿਆ | ਦੋ ਸਾਲ ਪਹਿਲਾਂ ਆਏ ਹੜ੍ਹਾਂ ਕਾਰਨ ਵੀ ਇਥੋਂ ਸੜਕ ਹੜ੍ਹ ਗਈ ਸੀ, ਜਿਸ ਨੂੰ ਕਿਸਾਨਾਂ ਵਲੋਂ ਹੀ ਮਿੱਟੀ ਪਾ ਕੇ ਬਣਾਇਆ ਗਿਆ ਸੀ | ਪੰਜਾਬ ਮੰਡੀ ਬੋਰਡ ਵਲੋਂ ਇਸ ਸੜਕ 'ਤੇ ਬਰਸਾਤੀ ਪਾਣੀ ਦੇ ਲੰਘਣ ਵਾਸਤੇ ਕੋਈ ਪੁੱਲੀ ਜਾਂ ਰੈਂਪ ਤੱਕ ਨਹੀਂ ਬਣਾਇਆ ਗਿਆ | ਇਸ ਟੋਟੇ 'ਤੇ ਪੱਥਰ ਪਾ ਕੇ ਸੜਕ ਬਣਾ ਦਿੱਤੀ ਸੀ | ਜੋ ਪ੍ਰੀਮਿਕਸ ਪੈਣ ਤੋਂ ਪਹਿਲਾਂ ਹੀ ਫਿਰ ਹੜ੍ਹ ਗਈ | ਇਸੇ ਤਰ੍ਹਾਂ ਵੇਈਾ ਦੀ ਲੰਮੇ ਸਮੇਂ ਤੋਂ ਸਫਾਈ ਨਾ ਹੋਣ ਕਾਰਨ ਉਪਰੋਂ ਆਉਂਦਾ ਪਾਣੀ ਪਿੰਡ ਬਕਾਪੁਰ ਦੇ ਸਕੂਲ ਦੀ ਗਰਾਊਾਡ, ਗੁਰਦੁਆਰਾ ਤੇ ਸ਼ਿਵ ਮੰਦਰ 'ਚ ਵੀ ਪਾਣੀ ਆ ਵੜਿਆ | ਭਾਰੀ ਬਰਸਾਤ ਕਾਰਨ ਸਾਰੇ ਪਾਸੇ ਪਾਣੀ ਪਾਣੀ ਨਜ਼ਰ ਆ ਰਿਹਾ ਹੈ |
