ਸੰਘੋਲ, 19 ਅਕਤੂਬਰ (ਪਰਮਵੀਰ ਸਿੰਘ ਧਨੋਆ)-ਸੜਕ ਸੁਰੱਖਿਆ ਫੋਰਸ ਵਲੋਂ ਡੀ.ਜੀ.ਪੀ ਟ੍ਰੈਫ਼ਿਕ ਅਤੇ ਸੜਕ ਸੁਰੱਖਿਆ ਪੰਜਾਬ ਦੇ ਦਿਸ਼ਾ ਨਿਰਦੇਸ਼ ਤਹਿਤ 'ਹੌਲੀ ਚਲੋ' ਮੁਹਿੰਮ ਚਲਾਈ ਜਾ ਰਹੀ ਹੈ | ਜਿਸ ਤਹਿਤ ਰਾਸ਼ਟਰੀ ਰਾਜ ਮਾਰਗ-5 'ਤੇ ਤਾਇਨਾਤ ਸੜਕ ਸੁਰੱਖਿਆ ਫੋਰਸ ਇੰਚਾਰਜ ਸੁਖਰਾਜ ਸਿੰਘ ਤੇ ਸਾਥੀਆਂ ਵਲੋਂ ਪਿੰਡ ਰਾਣਵਾਂ ਨੇੜੇ ਟਰਾਲੀਆਂ, ਟਰੱਕਾਂ ਅਤੇ ਹੋਰਨਾਂ ਵਾਹਨਾਂ 'ਤੇ ਰਿਫ਼ਲੈਕਟਰ ਸਟਿੱਕਰ ਲਗਾਏ ਗਏ | ਗੱਲਬਾਤ ਕਰਦਿਆਂ ਇੰਚਾਰਜ ਕਿਹਾ ਕਿ ਠੰਢ ਦਾ ਮੌਸਮ ਸ਼ੁਰੂ ਹੋਣ ਜਾ ਰਿਹਾ ਹੈ, ਜਿਸ ਦੌਰਾਨ ਧੁੰਦ ਕਾਰਨ ਸੜਕਾਂ 'ਤੇ ਹਮੇਸ਼ਾ ਦੁਰਘਟਨਾ ਦਾ ਡਰ ਬਣਿਆ ਰਹਿੰਦਾ ਹੈ | ਅਜਿਹੇ 'ਚ ਰਿਫ਼ਲੈਕਟਰ ਸਟਿੱਕਰ ਵਾਹਨਾਂ ਨੂੰ ਹਾਦਸੇ ਤੋਂ ਬਚਾਉਣ 'ਚ ਸਹਾਈ ਸਿੱਧ ਹੋਣਗੇ | ਸਟਿੱਕਰ ਲਗਾਏ ਜਾਣ ਮੌਕੇ ਵਾਹਨ ਚਾਲਕਾਂ ਨੂੰ ਸੁਰੱਖਿਅਤ ਡਰਾਈਵਿੰਗ ਬਾਰੇ ਜਾਗਰੂਕ ਵੀ ਕੀਤਾ ਗਿਆ |
