ਦੀਨਾਨਗਰ, 4 ਸਤੰਬਰ (ਸ਼ਰਮਾ/ਸੋਢੀ)-ਅਕਾਲੀ ਦਲ (ਬ) ਦੇ ਕੌਮੀ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੇ ਨਿਰਦੇਸ਼ਾਂ ਤਹਿਤ ਅਕਾਲੀ ਅਹੁਦੇਦਾਰਾਂ ਤੇ ਵਰਕਰਾਂ ਵਲੋਂ ਸੀਨੀਅਰ ਯੂਥ ਅਕਾਲੀ ਦਲ ਆਗੂ ਦਲਬੀਰ ਸਿੰਘ ਬਿੱਲਾ ਦੀ ਅਗਵਾਈ 'ਚ ਹੜ੍ਹ ਪੀੜਤਾਂ ਦੀ ਮਦਦ ਲਈ ਦਿਨ ਰਾਤ ਇਕ ਕੀਤਾ ਜਾ ਰਿਹਾ ਹੈ | ਜਾਣਕਾਰੀ ਦਿੰਦਿਆਂ ਯੂਥ ਆਗੂ ਦਲਬੀਰ ਸਿੰਘ ਬਿੱਲਾ ਨੇ ਦੱਸਿਆ ਕਿ ਹੜ੍ਹ ਪੀੜਤਾਂ ਦੀ ਸਹਾਇਤਾ ਲਈ ਹੁਣ ਤੱਕ ਵੱਖ-ਵੱਖ ਪਿੰਡਾਂ 'ਚ 20 ਜਨਰੇਟਰ, 400 ਲੀਟਰ ਡੀਜ਼ਲ, 10 ਹਜ਼ਾਰ ਵੇਰਕਾ ਦੁੱਧ ਦੇ ਪੈਕੇਟ, ਇਕ ਹਜ਼ਾਰ ਥੈਲਾ ਰਾਸ਼ਨ ਜਿਸ 'ਚ ਖੰਡ, ਦਾਲ, ਚਾਹ ਪੱਤੀ, ਮਿਰਚਾਂ, ਮਸਾਲਾ ਅਤੇ ਤੇਲ ਸ਼ਾਮਿਲ ਹੈ, 20 ਟਰਾਲੀਆਂ ਤੂੜੀ, 2 ਜੇ.ਸੀ.ਬੀ ਮਸ਼ੀਨਾਂ ਹੁਣ ਤੱਕ ਦਿੱਤੀਆਂ ਜਾ ਚੁੱਕੀਆਂ ਹਨ | ਇਸ ਤੋਂ ਇਲਾਵਾ 200 ਤੋਂ 300 ਟਰਾਲੀ ਰੋੜੇ, 500 ਤਰਪਾਲਾਂ ਤੇ 500 ਮੱਛਰਦਾਨੀਆਂ ਦਿੱਤੀਆਂ ਜਾ ਚੁੱਕੀਆਂ ਹਨ | ਦਲਬੀਰ ਸਿੰਘ ਬਿੱਲਾ ਨੇ ਦੱਸਿਆ ਕਿ ਹੜ੍ਹ ਪੀੜਤਾਂ ਦੀ ਇਹ ਸੇਵਾ ਅੱਗੇ ਵੀ ਜਾਰੀ ਰਹੇਗੀ, ਜਦ ਤੱਕ ਹੜ੍ਹ ਪੀੜਤਾਂ ਨੂੰ ਹੜ੍ਹ ਤੋਂ ਪੂਰੀ ਤਰ੍ਹਾਂ ਰਾਹਤ ਨਹੀਂ ਮਿਲਦੀ | ਹੜ੍ਹ ਪੀੜਤਾਂ ਦੀ ਮਦਦ ਕਰਨ ਵਾਲੀ ਟੀਮ 'ਚ ਵਿਜੇ ਮਹਾਜਨ, ਪਰਵੀਨ ਠਾਕੁਰ, ਭੁਪਿੰਦਰ ਸਿੰਘ ਜਕੜੀਆ, ਅਜੈਬ ਸਿੰਘ, ਸੁਖਵਿੰਦਰ ਸਿੰਘ, ਸਰਬਜੀਤ ਸਿੰਘ ਲਾਲੀਆ, ਗੁਰਨਾਮ ਸਿੰਘ, ਕੁਲਵਿੰਦਰ ਸਿੰਘ ਚਿੱਟੀ, ਵਿਨੇ ਭਰਿਆਲ, ਹੈਪੀ ਦੀਨਾਨਗਰ, ਦਲਬੀਰ ਸਿੰਘ ਸੁਲਤਾਨੀ ਅਤੇ ਅਰਜੁਨ ਕੱਤੋਵਾਲ ਸ਼ਾਮਿਲ ਹਨ |
