ਅਬੋਹਰ, 6 ਸਤੰਬਰ(ਵਿਵੇਕ ਹੂੜੀਆ)-ਭਾਰਤ-ਪਾਕਿਸਤਾਨ ਸਰਹੱਦ 'ਤੇ ਸਥਿਤ ਸੁਜਾਵਲਪੁਰ ਧਾਮ ਵਿਚ ਬਣੇ ਮੰਦਿਰ ਬਾਬਾ ਖੇਤਰਪਾਲ ਅਤੇ ਬਾਬਾ ਆਸ਼ਾ ਦੇਵਾ ਜੀ ਵੈੱਲਫੇਅਰ ਸੁਸਾਇਟੀ ਵਲੋਂ ਮੰਦਿਰ ਪ੍ਰਬੰਧਕ ਚਿਮਨ ਲਾਲ ਨਰੂਲਾ ਦੀ ਪੇ੍ਰਰਨਾ ਤੇ ਮਾਰਗਦਰਸ਼ਨ ਵਿਚ ਬਾਬਾ ਆਸ਼ਾ ਦੇਵਾ ਨੂੰ ਸਮਰਪਿਤ ਖ਼ੂਨਦਾਨ ਕੈਂਪ ਚੌਦਸ ਵਾਲੇ ਦਿਨ ਸੁਲਾਜਵਲਪੁਰ ਧਾਮ ਵਿਚ ਲਗਾਇਆ ਗਿਆ | ਇਸ ਦੌਰਾਨ ਗੱਦੀਨਸ਼ੀਨ ਰਜਨੀ ਬਾਬਾ ਅਤੇ ਅੰਗਰੇਜ਼ ਨਰੂਲਾ ਦੀ ਅਗਵਾਈ ਹੇਠ ਇਸ ਦੌਰਾਨ ਤਪੋਵਨ ਬਲੱਡ ਬੈਂਕ, ਰੁਦਰ ਤੇ ਬਿਹਾਨੀ ਬਲੱਡ ਬੈਂਕ ਟੀਮ ਸ੍ਰੀ ਗੰਗਾਨਗਰ ਵਲੋਂ ਖ਼ੂਨਦਾਨੀਆਂ ਤੋਂ ਖ਼ੂਨ ਇਕੱਠਾ ਕੀਤਾ ਗਿਆ | ਸਵੇਰੇ 9 ਵਜੇ ਤੋਂ ਦੁਪਹਿਰ ਤੱਕ ਚੱਲੇ ਇਸ ਖ਼ੂਨਦਾਨ ਕੈਂਪ ਵਿਚ ਲਗਭਗ 200 ਯੂਨਿਟ ਖ਼ੂਨਦਾਨ ਕੀਤਾ ਗਿਆ ਜਿਸ ਦੀ ਸ਼ੁਰੂਆਤ ਰਜਨੀ ਬਾਬਾ ਨੇ ਖ਼ੁਦ ਖ਼ੂਨਦਾਨ ਕਰਕੇ ਕੀਤੀ | ਇਸ ਤੋਂ ਬਾਅਦ ਸਾਰੇ ਸ਼ਰਧਾਲੂਆਂ ਨੇ ਉਤਸ਼ਾਹ ਨਾਲ ਖ਼ੂਨਦਾਨ ਕੀਤਾ | ਇਸ ਦੌਰਾਨ ਰਜਨੀ ਬਾਬਾ ਨੇ ਕਿਹਾ ਕਿ ਖ਼ੂਨਦਾਨ ਇੱਕ ਮਹਾਨ ਦਾਨ ਹੈ ਕਿਉਂਕਿ ਇਹ ਸੈਂਕੜੇ ਕੀਮਤੀ ਜਾਨਾਂ ਬਚਾ ਸਕਦਾ ਹੈ | ਇਸ ਮੌਕੇ ਮੰਦਰ ਦੇ ਪ੍ਰਬੰਧਕ ਚਿਮਨ ਲਾਲ ਨਰੂਲਾ, ਰਜਨੀ ਬਾਬਾ ਤੇ ਅੰਗਰੇਜ਼ ਨਰੂਲਾ ਨੇ ਖ਼ੂਨਦਾਨੀਆਂ ਨੂੰ ਅਸ਼ੀਰਵਾਦ ਦਿੱਤਾ ਤੇ ਮੈਡੀਕਲ ਟੀਮਾਂ ਨੂੰ ਵੀ ਸਨਮਾਨਿਤ ਕੀਤਾ ਗਿਆ |