ਅਬੋਹਰ, 23 ਦਸੰਬਰ(ਵਿਵੇਕ ਹੂੜੀਆ)-ਆਮ ਆਦਮੀ ਪਾਰਟੀ ਦਾ ਮੁੱਖ ਉਦੇਸ਼ ਇਲਾਕੇ ਦੇ ਵਸਨੀਕਾਂ ਨੂੰ ਬੁਨਿਆਦੀ ਸਹੂਲਤਾਂ ਪ੍ਰਦਾਨ ਕਰਨਾ ਹੈ | ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਆਮ ਆਦਮੀ ਪਾਰਟੀ ਦੇ ਹਲਕਾ ਇੰਚਾਰਜ ਅਰੁਣ ਨਾਰੰਗ ਨੇ ਇਕ ਪੈੱ੍ਰਸ ਕਾਨਫ਼ਰੰਸ ਦੌਰਾਨ ਸ਼ਹਿਰ ਵਿਚ ਚੱਲ ਰਹੇ ਵਿਕਾਸ ਪ੍ਰੋਜੈਕਟਾਂ ਬਾਰੇ ਜਾਣਕਾਰੀ ਦਿੰਦੇ ਹੋਏ ਕੀਤਾ | ਅਰੁਣ ਨਾਰੰਗ ਨੇ ਕਿਹਾ ਕਿ ਜਦੋਂ ਤੋਂ ਭਾਜਪਾ ਨੇ ਨਗਰ ਨਿਗਮ ਬਣਾਇਆ ਹੈ, ਪਾਰਟੀ ਨੇ ਜਾਣਬੁੱਝ ਕੇ ਸ਼ਹਿਰ ਵਿਚ ਵਿਕਾਸ ਪ੍ਰੋਜੈਕਟਾਂ ਨੂੰ ਅਧੂਰਾ ਛੱਡ ਦਿੱਤਾ ਹੈ | ਉਨ੍ਹਾਂ ਕਿਹਾ ਕਿ ਹੁਣ ਬਕਾਇਆ ਵਿਕਾਸ ਪ੍ਰੋਜੈਕਟਾਂ ਨੂੰ ਪੂਰਾ ਕਰਨ ਲਈ ਫ਼ੰਡ ਆ ਗਏ ਹਨ, ਅਤੇ ਆਉਣ ਵਾਲੇ ਦਿਨਾਂ ਵਿਚ ਸ਼ਹਿਰ ਵਿਚ ਸਾਰੇ ਰੁਕੇ ਹੋਏ ਵਿਕਾਸ ਪ੍ਰੋਜੈਕਟ ਮੁੜ ਸ਼ੁਰੂ ਹੋ ਜਾਣਗੇ | ਨਾਰੰਗ ਨੇ ਕਿਹਾ ਕਿ ਲਗਭਗ 5 ਤੋਂ 6 ਕਰੋੜ ਰੁਪਏ ਦੀ ਲਾਗਤ ਵਾਲੇ ਵਿਕਾਸ ਪ੍ਰੋਜੈਕਟਾਂ ਦਾ ਉਦਘਾਟਨ ਕੱਲ੍ਹ ਕੀਤਾ ਜਾਵੇਗਾ, ਜਿਸ ਵਿਚ ਸਰਕੁਲਰ ਰੋਡ, ਗਲੀ ਨੰਬਰ 6, ਨਵੀਂ ਕਾਲੋਨੀ ਦੀਆਂ ਖਸਤਾ ਹਾਲ ਸੜਕਾਂ, ਆਰੀਆ ਨਗਰੀ ਅਤੇ ਬੁਰਜ ਮੁਹਾਰ ਚੌਕ ਦਾ ਨਿਰਮਾਣ ਸ਼ਾਮਲ ਹੈ | ਇਸ ਤੋਂ ਇਲਾਵਾ, ਬੱਜਰੀ ਵਾਲੀਆਂ ਸੜਕਾਂ ਨੂੰ ਪੱਕਾ ਕਰਨ ਵਿਚ ਕੁੱਝ ਸਮਾਂ ਲੱਗੇਗਾ, ਕਿਉਂਕਿ ਇਹ ਕੰਮ ਸਰਦੀਆਂ ਤੋਂ ਬਾਅਦ ਹੀ ਸ਼ੁਰੂ ਹੋ ਸਕਦਾ ਹੈ | ਬਾਕੀ ਰਹਿੰਦੇ ਅਧੂਰੇ ਪ੍ਰੋਜੈਕਟਾਂ ਨੂੰ ਪੂਰਾ ਕਰਨ ਲਈ 5 ਕਰੋੜ ਦਾ ਇਕ ਹੋਰ ਟੈਂਡਰ ਮਨਜ਼ੂਰ ਕੀਤਾ ਜਾਵੇਗਾ | ਆਭਾ ਸਕੁਏਅਰ ਸਟੇਡੀਅਮ ਵਿਚ ਵਿਕਾਸ ਕਾਰਜ ਵੀ ਜ਼ਿਲ੍ਹਾ ਯੋਜਨਾ ਬੋਰਡ ਅਧੀਨ ਲਗਭਗ 40 ਤੋਂ 50 ਲੱਖ ਦੀ ਲਾਗਤ ਨਾਲ ਕੀਤੇ ਜਾਣਗੇ | ਅਰੁਣ ਨਾਰੰਗ ਨੇ ਦੱਸਿਆ ਕਿ ਉਨ੍ਹਾਂ ਨੇ ਪਹਿਲਾਂ 110 ਕਰੋੜ ਦੀ ਲਾਗਤ ਨਾਲ ਹਨੂਮਾਨਗੜ੍ਹ ਰੋਡ ਵਾਟਰ ਵਰਕਸ 'ਤੇ ਕੰਮ ਸ਼ੁਰੂ ਕੀਤਾ ਸੀ, ਜਿਸ ਨਾਲ ਪੂਰੇ ਸ਼ਹਿਰ ਨੂੰ ਸਾਫ਼ ਪਾਣੀ ਮਿਲਦਾ ਸੀ | ਨਾਰੰਗ ਨੇ ਅੱਗੇ ਕਿਹਾ ਕਿ ਨਗਰ ਨਿਗਮ ਦੇ ਮੇਅਰ ਕਹਿੰਦੇ ਸਨ ਕਿ ਸਰਕਾਰ ਫ਼ੰਡ ਨਹੀਂ ਦਿੰਦੀ, ਅਤੇ ਉਨ੍ਹਾਂ ਦੱਸਿਆ ਕਿ ਵਿਕਾਸ ਕਾਰਜ ਅਕਸਰ ਸਰਕਾਰ ਦੁਆਰਾ ਫ਼ੰਡ ਕੀਤੇ ਜਾਂਦੇ ਸਨ, ਪਰ ਨਿਗਮ ਨੇ ਜਾਣਬੁੱਝ ਕੇ ਇਸ ਨੰੂ ਰੋਕ ਦਿੱਤਾ, ਜਿਸ ਦੇ ਨਤੀਜੇ ਵਜੋਂ ਪੈਸੇ ਬਿਨਾਂ ਵਰਤੋਂ ਦੇ ਵਾਪਸ ਕਰ ਦਿੱਤੇ ਗਏ | ਉਨ੍ਹਾਂ ਕਿਹਾ ਕਿ ਆਉਣ ਵਾਲੀਆਂ ਨਗਰ ਨਿਗਮ ਚੋਣਾਂ ਵਿਚ 'ਆਪ' ਬੋਰਡ ਬਣਾ ਕੇ ਸ਼ਹਿਰ ਵਾਸੀਆਂ ਨੂੰ ਇਕ ਚੰਗਾ ਮੇਅਰ ਦਿੱਤਾ ਜਾਵੇਗਾ ਤਾਂ ਜੋ ਸ਼ਹਿਰ ਵਾਸੀਆਂ ਨੂੰ ਹਰ ਤਰ੍ਹਾਂ ਦੀਆਂ ਮੁੱਢਲੀਆਂ ਸਹੂਲਤਾਂ ਮਿਲ ਸਕਣ |
