ਲੁਧਿਆਣਾ, 31 ਅਕਤੂਬਰ (ਭੁਪਿੰਦਰ ਸਿੰਘ ਬੈਂਸ)- ਲੰਬੇ ਚਿਰ ਤੋਂ ਨਗਰ ਨਿਗਮ ਦੇ ਜੋਨ-ਏ ਤੋਂ ਬਾਹਰ ਨਾਜਾਇਜ਼ ਕਬਜ਼ਿਆਂ ਨੰੂ ਲੈਕੇ ਉਠ ਰਹੇ ਸਵਾਲਾਂ ਵਿਚਕਾਰ ਅੱਜ ਤਹਿਬਾਜ਼ਾਰੀ ਸ਼ਾਖਾ ਵਲੋਂ ਵੱਡੀ ਕਾਰਵਾਈ ਕੀਤੀ ਗਈ | ਨਗਰ ਨਿਗਮ ਦੀ ਤਹਿਬਾਜ਼ਾਰੀ ਸ਼ਾਖਾ ਦੇ ਇੰਸਪੈਕਟਰ ਵਿਪਨ ਹਾਂਡਾ ਦੀ ਅਗਵਾਈ ਹੇਠ ਟੀਮ ਨੇ ਜੋਨ ਏ ਦੇ ਬਾਹਰ ਵੱਖ ਵੱਖ ਥਾਵਾਂ ਤੇ ਲਗੇ ਨਜਾਇਜ ਠੇਲੇ, ਰੇਹੜੀਆਂ ਤੇ ਕਬਜ਼ਿਆਂ ਨੰੂ ਹਟਾ ਦਿੱਤਾ | ਇਸ ਦੌਰਾਨ ਕਬਜ਼ਾਧਾਰੀਆਂ ਨੰੰੂ ਚੇਤਾਵਨੀ ਜਾਰੀ ਕੀਤੀ ਗਈ ਕਿ ਉਹ ਮੁੜ ਇਸ ਤਰ੍ਹਾਂ ਦੇ ਕਬਜ਼ੇ ਨਾ ਕਰਨ | ਸ਼ਹਿਰ ਦੇ ਨਿਵਾਸੀਆਂ ਵਲੋਂ ਲੰਬੇ ਸਮੇਂ ਤੋਂ ਨਗਰ ਨਿਗਮ ਤੇ ਇਹ ਦੋਸ਼ ਲਗਾਏ ਜਾ ਰਹੇ ਸਨ ਕਿ ਨਿਗਮ ਸਿਰਫ ਸ਼ਹਿਰ ਦੇ ਕੁੱਝ ਹਿੱਸਿਆਂ ਵਿਚ ਹੀ ਕਾਰਵਾਈ ਕਰਦਾ ਹੈ | ਜਦਕਿ ਜੋਨ-ਏ ਦੇ ਬਾਹਰ ਕਬਜ਼ਿਆਂ ਤੇ ਅੱਖਾਂ ਬੰਦ ਲਈਆਂ ਜਾਂਦੀਆਂ ਹਨ | ਅੱਜ ਦੀ ਕਾਰਵਾਈ ਨੰੂ ਲੈਕੇ ਸਥਾਨਕ ਨਿਵਾਸੀਆਂ ਨੇ ਇੰਸਪੈਕਟਰ ਵਿਪਨ ਹਾਂਡਾ ਅਤੇ ਉਨ੍ਹਾਂ ਦੀ ਟੀਮ ਦੀ ਪ੍ਰਸ਼ੰਸਾ ਕੀਤੀ | ਪਰ ਸਵਾਲ ਇਹ ਉਠਦਾ ਹੈ ਕਿ ਇਹ ਕਾਰਵਾਈ ਸਿਰਫ ਇਕ ਦਿਨ ਦੀ ਦਿਖਾਵਾ ਮੁੁਹਿੰਮ ਤੱਕ ਸੀਮਿਤ ਰਹੇਗੀ ਜਾਂ ਨਿਗਮ ਇਸ ਨੰੂ ਨਿਯਮਿਤ ਤੌਰ 'ਤੇ ਜਾਰੀ ਰੱਖੇਗਾ ਤਾਂ ਜੋ ਇਹ ਕਬਜ਼ੇ ਮੁੜ ਨਾ ਹੋ ਸਕਣ | ਲੋੋਕਾਂ ਦਾ ਕਹਿਣਾ ਹੈ ਕਿ ਨਗਰ ਨਿਗਮ ਹਰ ਹਫਤੇ ਮਾਨੀਟਰਿੰਗ ਰਿਪੋਰਟ ਤਿਆਰ ਕਰੇ ਤੇ ਜਿੱਥੇ ਮੁੜ ਕਬਜ਼ੇ ਹੁੰਦੇ ਹਨ | ਉਥੇ ਸਖਤ ਜੁਰਮਾਨਾ ਲਗਾਇਆ ਜਾਵੇ |
