ਐੱਸ. ਏ. ਐੱਸ. ਨਗਰ, 2 ਜੂਨ (ਕਪਿਲ ਵਧਵਾ)-ਏ. ਐਨ. ਟੀ. ਐਫ. ਮੁਹਾਲੀ ਵਲੋਂ ਨਸ਼ੀਲੇ ਪਦਾਰਥ ਤੇ 4.83 ਲੱਖ ਰੁ. ਦੀ ਡਰੱਗ ਮਨੀ ਸਮੇਤ ਗਿ੍ਫ਼ਤਾਰ ਕੀਤੇ ਗਏ 3 ਮੁਲਜ਼ਮਾਂ ਨੂੰ ਮੁਹਾਲੀ ਦੀ ਅਦਾਲਤ ਵਲੋਂ ਨਿਆਂਇਕ ਹਿਰਾਸਤ ਤਹਿਤ ਜੇਲ੍ਹ ਭੇਜਣ ਦੇ ਹੁਕਮ ਸੁਣਾਏ ਗਏ ਹਨ | ਜਾਣਕਾਰੀ ਅਨੁਸਾਰ ਏ. ਐਨ. ਟੀ. ਐਫ. ਮੁਹਾਲੀ ਦੀ ਟੀਮ ਨੇ ਰੋਹਿਤ ਉਰਫ਼ ਤੇਜ਼ੀ, ਬੋਹੜ ਸਿੰਘ ਤੇ ਸਫ਼ਲ ਸਿੰਘ ਨੂੰ ਗੁਪਤ ਸੂਚਨਾ ਦੇ ਆਧਾਰ 'ਤੇ 510 ਗ੍ਰਾਮ ਹੈਰੋਇਨ ਅਤੇ 4.83 ਲੱਖ ਰੁ. ਦੀ ਡਰੱਗ ਮਨੀ ਸਮੇਤ ਗਿ੍ਫ਼ਤਾਰ ਕੀਤਾ ਸੀ | ਉਕਤ ਮੁਲਜ਼ਮਾਂ ਦੀ ਪੁੱਛਗਿੱਛ ਦੌਰਾਨ ਪੁਲਿਸ ਨੂੰ ਫ਼ਿਰੋਜ਼ਪੁਰ ਆਧਾਰਿਤ ਇਕ ਵਿਚੋਲੀਏ ਦੇ ਪਤਾ ਚੱਲਿਆ ਸੀ, ਜੋ ਕਿ ਸੂਬੇ ਤੇ ਹੋਰਨਾਂ ਰਾਜਾਂ ਦੇ ਨਸ਼ਾ ਤਸਕਰਾਂ ਨੂੰ ਨਸ਼ੀਲੇ ਪਦਾਰਥ ਦਿਵਾਉਣ 'ਚ ਮਦਦ ਕਰਦਾ ਸੀ | ਇਸ ਮੁਲਜ਼ਮ ਦੀ ਪਛਾਣ ਇਸਮਾਇਲ ਵਾਸੀ ਫ਼ਿਰੋਜ਼ਪੁਰ ਵਜੋਂ ਹੋਈ ਹੈ, ਜਿਸ ਨੂੰ ਪੁਲਿਸ ਨੇ ਮਾਮਲੇ 'ਚ ਨਾਮਜ਼ਦ ਕਰਕੇ ਕਾਬੂ ਕਰ ਲਿਆ ਹੈ | ਹੁਣ ਮੁਲਜ਼ਮ ਇਸਮਾਇਲ ਦੀ ਪੁੱਛਗਿੱਛ ਦੌਰਾਨ ਪੁਲਿਸ ਨੂੰ ਬਾਰਡਰ ਖੇਤਰ ਨਾਲ ਸੰਬੰਧਤ ਇਕ ਵੱਡੇ ਨਸ਼ਾ ਤਸਕਰ ਬਾਰੇ ਜਾਣਕਾਰੀ ਮਿਲੀ ਹੈ, ਜਿਸ ਨੂੰ ਕਾਬੂ ਕਰਨ ਲਈ ਪੁਲਿਸ ਵਲੋਂ ਛਾਪੇਮਾਰੀ ਕੀਤੀ ਜਾ ਰਹੀ ਹੈ |
