ਚੰਡੀਗੜ੍ਹ, 3 ਜੂਨ (ਰਾਮ ਸਿੰਘ ਬਰਾੜ)-ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਸਪੱਸ਼ਟ ਕੀਤਾ ਹੈ ਕਿ ਸੂਬਾ ਸਰਕਾਰ ਦਾ ਉਦੇਸ਼ ਹੈ ਕਿ ਸਾਰੇ ਯੋਗ ਲਾਭਕਾਰਾਂ ਨੂੰ ਸਮੇਂਬੱਧ ਤੇ ਪ੍ਰਾਥਮਿਕਤਾ ਆਧਾਰ 'ਤੇ ਯੋਗਤਾ ਪ੍ਰਮਾਣ ਪੱਤਰ ਮਿਲੇ | ਉਨ੍ਹਾਂ ਨੇ ਕਿਹਾ ਕਿ ਡੀ. ਐਸ. ਸੀ., ਓ. ਐਸ. ਸੀ., ਬੀ. ਸੀ. ਤੇ ਈ. ਡਬਲਿਊ. ਐਸ. ਵਰਗੇ ਪ੍ਰਮਾਣ ਪੱਤਰ ਸਮੇਂ 'ਤੇ ਪ੍ਰਾਪਤ ਹੋਣ ਇਸ ਦੇ ਲਈ ਨਿਰਦੇਸ਼ ਪਹਿਲਾਂ ਤੋਂ ਦੇ ਰੱਖੇ ਹਨ | ਉਨ੍ਹਾਂ ਨੇ ਸੰਬੰਧਿਤ ਵਿਭਾਗ ਦੇ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤੇ ਹਨ ਕਿ ਕਿਸੇ ਵੀ ਯੋਗ ਵਿਅਕਤੀ ਨੂੰ ਪ੍ਰਮਾਣ ਪੱਤਰ ਪ੍ਰਾਪਤ ਕਰਨ 'ਚ ਕੋਈ ਪ੍ਰੇਸ਼ਾਨੀ ਨਹੀਂ ਹੋਣੀ ਚਾਹੀਦੀ ਹੈ | ਹੁਣ ਤੱਕ ਦੇ ਆਂਕੜੇ ਦੇ ਬਾਰੇ 'ਚ ਵਿਭਾਗ ਵੱਲੋਂ ਦੱਸਿਆ ਗਿਆ ਹੈ ਕਿ 28 ਮਈ ਤੋਂ 3 ਅਪ੍ਰੈਲ ਤੱਕ ਸੂਬੇ ਵਿਚ ਕੁੱਲ 1,17,778 ਪ੍ਰਮਾਣ ਪੱਤਰ ਬਣਾਏ ਜਾ ਚੁੱਕੇ ਹਨ, ਜਦ ਕਿ ਵਿਭਾਗ ਨੂੰ ਲਗਪਗ 28,830 ਡੁਪਲੀਕੇਟ ਬਿਨੈ ਵੀ ਪ੍ਰਾਪਤ ਹੋਏ ਹਨ |