ਕੇਂਦਰ ਸਰਕਾਰ ਵਲੋਂ ਜੀ.ਐਸ.ਟੀ. ਦਰਾਂ 'ਚ ਕੀਤੀ ਗਈ ਵੱਡੀ ਕਟੌਤੀ ਦਾ ਚੰਡੀਗੜ੍ਹ ਵਪਾਰ ਮੰਡਲ ਵਲੋਂ ਸਵਾਗਤ <br/>
ਅਜੀਤ ਡੈਸਕ
05-09-2025
ਵਪਾਰ ਮੰਡਲ ਦੇ ਸੀਨੀਅਰ ਅਹੁਦੇਦਾਰਾਂ ਦੀ ਇਕ ਵਿਸ਼ੇਸ਼ ਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਸੰਜੀਵ ਚੱਡਾ ਨੇ ਕਿਹਾ ਕਿ ਜੀ.ਐਸ.ਟੀ. ਸਲੈਬਾਂ ਦੀ ਕਟੌਤੀ ਨਾਲ ਕਾਰੋਬਾਰੀਆਂ ਨੂੰ ਨਵੀਂ ਤਾਕਤ ਮਿਲੇਗੀ | ਉਨ੍ਹਾਂ ਇਸ ਫ਼ੈਸਲੇ ਲਈ ਕੇਂਦਰ ਸਰਕਾਰ ਦਾ ਧੰਨਵਾਦ ਵੀ ਕੀਤਾ | ਸੰਜੀਵ ਚੱਡਾ ਨੇ ਕਿਹਾ ਕਿ ਨਵਰਾਤਰਿਆਂ ਦੇ ਦਿਨਾਂ ਦੌਰਾਨ ਨਵੀਆਂ ਜੀ.ਐਸ.ਟੀ. ਦਰਾਂ ਦਾ ਲਾਗੂ ਹੋਣਾ ਵਪਾਰੀਆਂ ਲਈ ਹੋਰ ਵੀ ਲਾਭਕਾਰੀ ਸਾਬਤ ਹੋਵੇਗਾ | ਤਿਉਹਾਰੀਂ ਸੀਜ਼ਨ 'ਚ ਇਸ ਕਟੌਤੀ ਨਾਲ ਲੋਕਾਂ ਦੀ ਖ਼ਰੀਦਦਾਰੀ ਇੱਛਾ 'ਚ ਵਾਧਾ ਹੋਵੇਗਾ ਅਤੇ ਬਾਜ਼ਾਰ 'ਚ ਨਵੀਂ ਹਲਚਲ ਵਧੇਗੀ | ਉਨ੍ਹਾਂ ਉਮੀਦ ਜਤਾਈ ਕਿ ਕੇਂਦਰ ਸਰਕਾਰ ਵਲੋਂ ਭਵਿੱਖ ਵਿਚ ਵੀ ਵਪਾਰੀਆਂ ਅਤੇ ਖਪਤਕਾਰਾਂ ਦੇ ਹਿੱਤ 'ਚ ਹੋਰ ਸੁਧਾਰ ਕੀਤੇ ਜਾਣਗੇ | ਇਸ ਨਾਲ ਨਾ ਸਿਰਫ਼ ਕਾਰੋਬਾਰ ਵਿਚ ਤੇਜ਼ੀ ਆਵੇਗੀ ਬਲਕਿ ਆਰਥਿਕਤਾ ਨੂੰ ਵੀ ਮਜ਼ਬੂਤੀ ਮਿਲੇਗੀ |
ਜੀ.ਐਸ.ਟੀ. ਕੋਆਰਡੀਨੇਸ਼ਨ ਕਮੇਟੀ ਦੇ ਚੇਅਰਮੈਨ ਮੋਹਿਤ ਸੂਦ ਨੇ ਕਿਹਾ ਕਿ ਇਸ ਕਟੌਤੀ ਨਾਲ ਮੱਧਵਰਗ ਦੀ ਆਮਦਨ 'ਤੇ ਦਬਾਅ ਘਟੇਗਾ ਅਤੇ ਖ਼ਰੀਦਦਾਰੀ ਵਧਣ ਨਾਲ ਹਰ ਵਪਾਰੀ ਦੇ ਕਾਰੋਬਾਰ ਵਿਚ ਵਾਧਾ ਹੋਵੇਗਾ |
ਚੇਅਰਮੈਨ ਚਰਨਜੀਵ ਸਿੰਘ ਅਤੇ ਵਾਈਸ ਚੇਅਰਮੈਨ ਦਿਵਾਕਰ ਸਾਹੂਜਾ ਨੇ ਕਿਹਾ ਕਿ ਜੀ.ਐਸ.ਟੀ. ਦਰਾਂ ਦੀ ਕਟੌਤੀ ਲਾਹੇਵੰਦ ਹੈ, ਪਰ ਸਰਕਾਰ ਨੂੰ ਲੋੜ ਹੈ ਕਿ ਕਾਰਵਾਈਆਂ ਹੋਰ ਸਰਲ ਕੀਤੀਆਂ ਜਾਣ | ਉਨ੍ਹਾਂ ਨੇ ਪੁਰਾਣੇ ਵੈਟ ਮੁਲਾਂਕਣ ਕੇਸਾਂ ਨੂੰ ਖਤਮ ਕੀਤੇ ਜਾਣ ਦੀ ਮੰਗ ਵੀ ਕੀਤੀ ਤਾਂ ਜੋ ਵਪਾਰੀ ਆਪਣੀ ਊਰਜਾ ਮੌਜੂਦਾ ਕਾਰੋਬਾਰ ਵਿਚ ਲਗਾ ਸਕਣ |
