ਰੂਪਨਗਰ, 2 ਨਵੰਬਰ (ਸਤਨਾਮ ਸਿੰਘ ਸੱਤੀ)-ਹਲਕਾ ਰੂਪਨਗਰ ਦੇ ਵਿਧਾਇਕ ਐਡਵੋਕੇਟ ਦਿਨੇਸ਼ ਚੱਢਾ ਨੇ ਦੱਸਿਆ ਕਿ ਅੱਜ ਰੂਪਨਗਰ ਰੇਲਵੇ ਸਟੇਸ਼ਨ ਤੋਂ 12 ਹਜ਼ਾਰ ਡੀ. ਏ. ਪੀ. ਖਾਦ ਦੀਆਂ ਬੋਰੀਆਂ ਕਿਸਾਨਾਂ ਲਈ ਬਿਨਾਂ ਕਿਸੇ ਟੈਗਿੰਗ ਜਾਂ ਬੂਸਟਰ ਪੈਕਿੰਗ ਤੋਂ ਰਵਾਨਾ ਕੀਤੀਆਂ ਗਈਆਂ | ਇਹ ਕਦਮ ਹਾਲ ਹੀ ਵਿਚ ਖਾਦ ਡਿਸਟਰੀਬਿਊਟਰਾਂ ਤੇ ਦੁਕਾਨਦਾਰਾਂ ਵਲੋਂ ਖਾਦ ਦੇ ਨਾਲ ਜ਼ਬਰਦਸਤੀ ਬੂਸਟਰ ਜਾਂ ਬਾਇਓ ਪ੍ਰੋਡਕਟ ਵੇਚਣ ਦੇ ਮਾਮਲੇ ਬਾਅਦ ਚੁੱਕਿਆ ਗਿਆ ਹੈ | ਵਿਧਾਇਕ ਚੱਢਾ ਨੇ ਦੱਸਿਆ ਕਿ ਕਿਸਾਨਾਂ ਵਲੋਂ ਲਗਾਤਾਰ ਮਿਲ ਰਹੀਆਂ ਸ਼ਿਕਾਇਤਾਂ ਤੋਂ ਬਾਅਦ ਉਨ੍ਹਾਂ ਨੇ ਵਿਭਾਗ ਨੂੰ ਸਖ਼ਤ ਕਾਰਵਾਈ ਕਰਨ ਦੇ ਹੁਕਮ ਜਾਰੀ ਕੀਤੇ ਸਨ | ਇਸ ਦੌਰਾਨ ਇਕ ਡਿਸਟ੍ਰੀਬਿਊਟਰ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਵੀ ਕੀਤੀ ਗਈ | ਚੱਢਾ ਨੇ ਕਿਹਾ ਕਿ ਅੱਜ ਖਾਦ ਦੀਆਂ ਬੋਰੀਆਂ ਕਿਸਾਨਾਂ ਤੱਕ ਸਿੱਧੀਆਂ ਰਵਾਨਾ ਕੀਤੀਆਂ ਗਈਆਂ ਹਨ, ਜਿਨ੍ਹਾਂ ਨਾਲ ਨਾ ਕੋਈ ਬੂਸਟਰ ਜੁੜਿਆ ਹੈ, ਤੇ ਨਾ ਕੋਈ ਟੈਗਿੰਗ | ਹੁਣ ਕਿਸਾਨਾਂ ਨੂੰ ਬਿਨਾਂ ਕਿਸੇ ਜ਼ਬਰਦਸਤੀ ਜਾਂ ਲੁੱਟ ਖੋਹ ਤੋਂ ਸਹੀ ਕੀਮਤ 'ਤੇ ਖਾਦ ਮਿਲੇਗੀ | ਉਨ੍ਹਾਂ ਕਿਹਾ ਕਿ ਪਹਿਲਾਂ ਜਿਥੇ ਦੁਕਾਨਦਾਰ ਡਿਸਟਰੀਬਿਊਟਰਾਂ ਤੇ ਕੰਪਨੀਆਂ ਦਾ ਹਵਾਲਾ ਦੇ ਕੇ ਬੂਸਟਰ ਵੇਚਦੇ ਸਨ, ਹੁਣ ਇਹ ਗੱਲ ਸਾਫ਼ ਹੋ ਗਈ ਹੈ ਕਿ ਖਾਦ ਦੀ ਸਪਲਾਈ ਕਿਸੇ ਵੀ ਐਕਸਟਰਾ ਪੈਕਿੰਗ ਤੋਂ ਬਿਨਾਂ ਸੰਭਵ ਹੈ | ਚੱਢਾ ਨੇ ਕੇਂਦਰ ਸਰਕਾਰ ਨੂੰ ਅਪੀਲ ਕੀਤੀ ਕਿ ਇਹ ਮੁੱਦਾ ਸਿਰਫ਼ ਰੂਪਨਗਰ ਤੱਕ ਸੀਮਤ ਨਹੀਂ, ਸਗੋਂ ਪੂਰੇ ਦੇਸ਼ 'ਚ ਕਿਸਾਨਾਂ ਦੀ ਲੁੱਟ ਨਾਲ ਜੁੜਿਆ ਹੈ | ਜੋ ਕੰਪਨੀਆਂ ਖਾਦ ਨਾਲ ਜ਼ਬਰਦਸਤੀ ਬੂਸਟਰ ਵੇਚ ਰਹੀਆਂ ਹਨ, ਉਨ੍ਹਾਂ 'ਤੇ ਤੁਰੰਤ ਵੱਡੀ ਕਾਰਵਾਈ ਕੀਤੀ ਜਾਵੇ | ਇਸ ਮੌਕੇ ਚੇਅਰਮੈਨ ਭਾਗ ਸਿੰਘ ਮੈਦਾਨ, ਯੂਥ ਪ੍ਰਧਾਨ ਚੇਤਨ ਕਾਲੀਆ, ਰਜਿੰਦਰ ਧਿਮਾਨ ਤੇ ਸੋਸ਼ਲ ਮੀਡੀਆ ਕੋਆਰਡੀਨੇਟਰ ਰੋਪੜ ਹਾਜ਼ਰ ਸਨ |
