ਭੋਗ 'ਤੇ ਵਿਸ਼ੇਸ਼-ਸਰਦਾਰਨੀ ਸਤਿੰਦਰ ਕੌਰ ਬੀਸਲਾ

ਫੁੱਲਾਂਵਾਲ (ਲੁਧਿਆਣਾ), 21 ਦਸੰਬਰ-ਸਰਦਾਰਨੀ ਸਤਿੰਦਰ ਕੌਰ ਬੀਸਲਾ ਦਾ ਜਨਮ 24 ਸਤੰਬਰ 1962 ਨੂੰ ਲੁਧਿਆਣਾ ਜ਼ਿਲ੍ਹਾ ਦੇ ਕਸਬਾ ਮੋਗਾ ਵਿਖੇ ਸ਼ਮਸ਼ੇਰ ਸਿੰਘ ਗਿੱਲ ਦੇ ਘਰ ਮਾਤਾ ਮਨਜੀਤ ਕੌਰ ਦੀ ਕੁੱਖੋਂ ਹੋਇਆ | ਆਪ ਨੇ ਮੁੱਢਲੀ ਪੜ੍ਹਾਈ ਸੈਂਟ ਥੋਮਸ ਸਕੂਲ ਮੋਗਾ ਤੋਂ ਕੀਤੀ ਅਤੇ ਉਚੇਰੀ ਪੜ੍ਹਾਈ ਗੌਰਮੈਂਟ ਕਾਲਜ ਲੁਧਿਆਣਾ ਤੋਂ ਕਰਨ ਤੋਂ ਬਾਅਦ ਪੰਜਾਬ ਐਗਰੀਕਲਚਰ ਯੂਨੀਵਰਸਿਟੀ ਤੋਂ ਦੋ ਸਾਲ ਦਾ ਡਿਪਲੋਮਾ ਕਰਨ ਉਪਰੰਤ ਐਮ.ਏ. ਇੰਗਲਿਸ਼ ਕੀਤੀ | ਆਪ ਦੇ ਆਨੰਦ ਕਾਰਜ ਦਸੰਬਰ 1983 ਨੂੰ ਪਿੰਡ ਤਾਹਰਪੁਰ ਨਵਾਂਸ਼ਹਿਰ ਦੇ ਸ਼ੇਰਜਸਮੀਤ ਸਿੰਘ ਬੀਸਲਾ ਸਪੁੱਤਰ ਸਰਦਾਰ ਸੋਹਣ ਸਿੰਘ ਬੀਸਲਾ ਨਾਲ ਹੋਏ, ਜਿਨ੍ਹਾਂ ਤੋਂ ਆਪ ਦੇ ਘਰ ਇਕ ਪੁੱਤਰ ਅਤੇ ਪੁੱਤਰੀ ਨੇ ਜਨਮ ਲਿਆ, ਜਿਨ੍ਹਾਂ ਨੂੰ ਆਪ ਨੇ ਸੁੰਘੜ ਅਤੇ ਸਿਆਣੀ ਸੋਚ ਸਦਕਾ ਪੜ੍ਹਾ ਲਿਖਾ ਕੇ ਜ਼ਿੰਦਗੀ ਵਿਚ ਸਥਾਪਿਤ ਕੀਤਾ | ਆਪ ਦਾ ਸਪੁੱਤਰ ਸ਼ਿਵਕਰਨ ਸਿੰਘ ਬੀਸਲਾ ਸ਼ਹਿਰ ਦਾ ਉੱਘਾ ਵਪਾਰੀ ਬਣਿਆ ਅਤੇ ਪੁੱਤਰੀ ਅਨੁਪਿੰਦਰ ਕੌਰ ਦਾ ਵਿਆਹ ਪੰਚਕੂਲਾ ਦੇ ਬਾਜਵਾ ਘਰਾਣੇ ਵਿਚ ਕੀਤਾ | ਅੰਤ ਆਪ 15 ਦਸੰਬਰ 2025 ਨੂੰ ਪਰਮਾਤਮਾ ਪਾਸੋਂ ਮਿਲੀ ਸਵਾਸਾਂ ਰੂਪੀ ਪੂੰਜੀ ਦਾ ਸਦ ਉਪਯੋਗ ਕਰਦੇ ਹੋਏ ਆਪਣੀ ਹਰੀ ਭਰੀ ਪਰਿਵਾਰਿਕ ਰੂਪੀ ਫੁੱਲਵਾੜੀ ਨੂੰ ਸਦਾ ਲਈ ਅਲਵਿਦਾ ਆਖ ਵਾਹਿਗੁਰੂ ਦੇ ਚਰਨਾਂ ਵਿਚ ਜਾ ਵਿਲੀਨ ਹੋਏ | ਆਪ ਨਮਿਤ ਅੰਤਿਮ ਅਰਦਾਸ ਅਤੇ ਸ਼ਰਧਾਂਜਲੀ ਸਮਾਗਮ 22 ਦਸੰਬਰ ਦਿਨ ਸੋਮਵਾਰ ਨੂੰ ਬਾਅਦ ਦੁਪਹਿਰ 1 ਵਜੇ ਤੋਂ 2:30 ਵਜੇ ਤੱਕ ਲੁਧਿਆਣਾ ਦੇ ਗੁਰਦੁਆਰਾ ਸਿੰਘ ਸਭਾ ਸਰਾਭਾ ਨਗਰ ਵਿਖੇ ਹੋ ਰਿਹਾ ਹੈ |
-ਮਨਜੀਤ ਸਿੰਘ ਦੁੱਗਰੀ