ਠੱਠੀ ਭਾਈ, 4 ਸਤੰਬਰ (ਜਗਰੂਪ ਸਿੰਘ ਮਠਾੜੂ)-ਵਿਧਾਨ ਸਭਾ ਹਲਕਾ ਬਾਘਾ ਪੁਰਾਣਾ ਦੇ ਪਿੰਡ ਸੰਤੂ ਵਾਲਾ (ਸੁਖਾਨੰਦ) ਦੇ ਵਾਸੀ ਨਸੀਬ ਸਿੰਘ ਉਮਰ 35 ਪੁੱਤਰ ਜੀਤ ਸਿੰਘ ਦੀ ਅਚਾਨਕ ਹੋਏ ਹਾਦਸੇ ਵਿਚ ਮੌਤ ਦੀ ਖ਼ਬਰ ਨੇ ਇਲਾਕੇ ਭਰ 'ਚ ਸੋਗ ਦੀ ਲਹਿਰ ਦੌੜਾ ਦਿੱਤੀ ਹੈ | ਨਸੀਬ ਸਿੰਘ ਜੋ ਦੋ ਦਿਨ ਪਹਿਲਾਂ ਘਰੋਂ ਹਲਵਾਈ ਦਾ ਕੰਮ ਕਰਨ ਗਿਆ ਸੀ, ਬੀਤੀ ਰਾਤ ਕਰੀਬ 9:30 ਵਜੇ ਜਦੋਂ ਬੰਬੀਹਾ ਭਾਈ ਤੋਂ ਸੁਖਾਨੰਦ ਵੱਲ ਵਾਪਸ ਪਿੰਡ ਪਰਤ ਰਿਹਾ ਸੀ ਤਾਂ ਡਰੇਨ ਦੇ ਪੁਲ ਕੋਲ ਹਾਦਸੇ ਦਾ ਸ਼ਿਕਾਰ ਹੋ ਗਿਆ | ਇਸ ਦੁਖਦਾਈ ਹਾਦਸੇ ਵਿਚ ਉਸ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ | ਮਿ੍ਤਕ ਬੇਹੱਦ ਗਰੀਬ ਪਰਿਵਾਰ ਨਾਲ ਸਬੰਧਿਤ ਸੀ ਅਤੇ ਘਰ ਦਾ ਇਕਲੌਤਾ ਸਹਾਰਾ ਸੀ | ਉਸ ਦੇ ਪਿੱਛੇ ਪਤਨੀ, ਦੋ ਛੋਟੀਆਂ ਧੀਆਂ ਅਤੇ ਇਕ ਨਿੱਕਾ ਪੁੱਤਰ ਰਹਿ ਗਏ ਹਨ | ਕੁਝ ਲੋਕਾਂ ਵਲੋਂ ਦੱਸਿਆ ਜਾ ਰਿਹਾ ਹੈ ਕਿ ਸੁਖਾਨੰਦ ਅਤੇ ਬੰਬੀਹਾ ਭਾਈ ਦਰਮਿਆਨ ਡਰੇਨ ਦੇ ਪੁਲ ਦੀ ਭੰਨ ਤੋੜ ਕਾਰਨ ਇਹ ਹਾਦਸਾ ਵਾਪਰਿਆ |
