ਮੋਗਾ, 24 ਸਤੰਬਰ (ਸੁਰਿੰਦਰਪਾਲ ਸਿੰਘ)-ਦੇਸ਼ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਲੋਂ ਦੇਸ਼ ਵਿਚ ਰੇਲਵੇ ਵਿਭਾਗ ਨੂੰ ਆਧੁਨਿਕ ਦਿੱਖ ਦੇਣ ਲਈ ਵੰਦੇ ਭਾਰਤ ਟਰੇਨਾਂ ਚਲਾਉਣ ਨਾਲ ਅੱਜ ਭਾਰਤ ਵਿਸ਼ਵ 'ਚ ਰੇਲਵੇ ਦੀ ਦੁਨੀਆ ਵਿਚ ਸਭ ਤੋਂ ਮੋਹਰੀ ਬਣ ਗਿਆ ਹੈ ਅਤੇ ਇਹ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਦੇਸ਼ ਪ੍ਰਤੀ ਯੋਗ ਅਗਵਾਈ ਤੇ ਸਮਰਪਿਤ ਦੀ ਭਾਵਨਾ ਸਦਕਾ ਹੋਇਆ ਹੈ | ਇਹ ਪ੍ਰਗਟਾਵਾ ਭਾਜਪਾ ਦੇ ਸੀਨੀਅਰ ਆਗੂ ਅਤੇ ਹਲਕਾ ਨਿਹਾਲ ਸਿੰਘ ਵਾਲਾ ਦੇ ਇੰਚਾਰਜ ਸਾਬਕਾ ਐਸ.ਪੀ. ਮੁਖ਼ਤਿਆਰ ਸਿੰਘ ਸੰਧੂ ਨੇ ਕੀਤਾ | ਉਨ੍ਹਾਂ ਕਿਹਾ ਕਿ ਹੁਣ ਵੰਦੇ ਭਾਰਤ ਟਰੇਨ ਜੋ ਕਿ ਫ਼ਿਰੋਜ਼ਪੁਰ ਤੋਂ ਦਿੱਲੀ ਸ਼ੁਰੂ ਕੀਤੀ ਹੈ ਇਹ ਪੰਜਾਬ ਨੂੰ ਇਕ ਤੋਹਫ਼ੇ ਦੀ ਸੌਗਾਤ ਹੈ ਅਤੇ ਇਸ ਟਰੇਨ ਨਾਲ 486 ਕਿੱਲੋਮੀਟਰ ਦਾ ਸਫ਼ਰ ਕੇਵਲ ਪੌਣੇ ਸੱਤ ਘੰਟਿਆਂ ਵਿਚ ਹੀ ਮੁਕੰਮਲ ਹੋ ਜਾਵੇਗਾ ਅਤੇ ਇਹ ਟਰੇਨ ਹਫ਼ਤੇ ਵਿਚ 6 ਦਿਨ ਚੱਲਦੀ ਹੋਈ ਸਵੇਰੇ 7:55 'ਤੇ ਰਵਾਨਾ ਹੋ ਕੇ ਦੁਪਹਿਰ ਸਮੇਂ 2:30 ਵਜੇ ਦਿੱਲੀ ਪਹੁੰਚੇਗੀ ਅਤੇ ਇਸ ਟਰੇਨ ਨਾਲ ਆਮ ਲੋਕਾਂ ਅਤੇ ਵਪਾਰਕ ਕਾਰੋਬਾਰੀਆਂ ਨੂੰ ਬਹੁਤ ਲਾਭ ਹੋਵੇਗਾ |
