ਲੌਂਗੋਵਾਲ, 4 ਸਤੰਬਰ (ਵਿਨੋਦ, ਖੰਨਾ) - ਸੰਤ ਲੌਂਗੋਵਾਲ ਇੰਸਟੀਚਿਊਟ ਆਫ਼ ਇੰਜੀਨੀਅਰਿੰਗ ਐਂਡ ਟੈਕਨੌਲੋਜੀ ਸਲਾਇਟ ਲੌਂਗੋਵਾਲ ਨੇ ਅਖਿਲ ਭਾਰਤੀ ਇੰਜੀਨੀਅਰਿੰਗ ਰੈਂਕਿੰਗ 2025 ਵਿਚ 79ਵਾਂ ਸਥਾਨ ਪ੍ਰਾਪਤ ਕੀਤਾ ਹੈ | ਇਹ ਨਤੀਜੇ ਸਿੱਖਿਆ ਮੰਤਰਾਲੇ ਵਲੋ ਨੈਸ਼ਨਲ ਇੰਸਟਿਟਿਊਸ਼ਨਲ ਰੈਂਕਿੰਗ ਫਰੇਮਵਰਕ ਐਨ.ਆਈ.ਆਰ. ਐਫ 2025 ਅਧੀਨ ਜਾਰੀ ਕੀਤੇ ਗਏ ਹਨ | ਡਾਇਰੈਕਟਰ ਸਲਾਈਟ ਪ੍ਰੋ. ਮਨੀ ਕਾਂਤ ਪਾਸਵਾਨ ਨੇ ਦੱਸਿਆ ਕਿ ਇਹ ਸਨਮਾਨ ਸਾਡੇ ਫੈਕਲਟੀ, ਗੈਰ-ਫੈਕਲਟੀ ਮੈਂਬਰਾਂ ਅਤੇ ਵਿਦਿਆਰਥੀਆਂ ਦੀ ਸਾਂਝੀ ਪ੍ਰਤੀਬੱਧਤਾ ਅਤੇ ਮਿਹਨਤ ਦਾ ਨਤੀਜਾ ਹੈ | ਸਾਨੂੰ ਮਾਣ ਹੈ ਕਿ ਸਲਾਇਟ ਲਗਾਤਾਰ ਤਰੱਕੀ ਕਰ ਰਿਹਾ ਹੈ ਅਤੇ ਇਹ ਰੈਂਕਿੰਗ ਸਾਡੀ ਉਸ ਦਿ੍ਸ਼ਟੀ ਦਾ ਸਬੂਤ ਹੈ ਜਿਸ ਵਿਚ ਅਸੀਂ ਇਸ ਸੰਸਥਾ ਨੂੰ ਉੱਚ-ਗੁਣਵੱਤਾ ਵਾਲੀ ਸਿੱਖਿਆ ਅਤੇ ਰਾਸ਼ਟਰ ਨਿਰਮਾਣ ਦਾ ਕੇਂਦਰ ਬਣਾਉਣਾ ਚਾਹੁੰਦੇ ਹਾਂ | ਉਨ੍ਹਾਂ ਕਿਹਾ ਕਿ ਲਗਾਤਾਰ ਯਤਨਾਂ ਨਾਲ ਅਸੀਂ ਆਉਣ ਵਾਲੇ ਸਾਲਾਂ ਵਿਚ ਹੋਰ ਵੀ ਉਚਾਈਆਂ ਨੂੰ ਛੂਹਣ ਦਾ ਟੀਚਾ ਰੱਖਦੇ ਹਾਂ | ਰਜਿਸਟਰਾਰ ਸ਼੍ਰੀ ਹਰੀ ਮੋਹਨ ਅਰੋੜਾ ਨੇ ਕਿਹਾ ਕਿ ਇਹ ਉਪਲਬਧੀ ਡਾਇਰੈਕਟਰ ਪ੍ਰੋ. ਡਾ. ਮਣਿਕਾਂਤ ਪਾਸਵਾਨ ਦੀ ਦੂਰ-ਦਰਸ਼ੀ ਅਗਵਾਈ ਹੇਠ ਸੰਭਵ ਹੋਈ ਹੈ, ਜਿਨ੍ਹਾਂ ਦੇ ਲਗਾਤਾਰ ਯਤਨਾਂ ਨੇ ਸੰਸਥਾ ਨੂੰ ਅਕਾਦਮਿਕ ਕਮਾਲ, ਨਵੀਨਤਾ ਅਤੇ ਵਿਕਾਸ ਵੱਲ ਤੋਰਿਆ ਹੈ |
